LUUKA 18

1Dhali a’di ki ṯor uni gwo ki gwom ’bi’th/e mo jin ta gi ’pemen jin mina uni ḵa mii ’tho mo isa yempa/ mo dhali mmo’koki dhoṯẖa du mo be. 2A’di ki o gwo mo ki: E ’peŋkuman bampaŋ kamu/ mo tani wathi/ diki’d mo jin ta’da mandwall gwo mo. A’di si’da/ jin diki ḵo/a Arumgimis mo walla diki taḵ ’kwani mo be. 3Dhala ’boma kamu/ jin wun ma kaṯẖ si’da/ mo tani diki’d e ’peŋkuman bampa/ c̱aan mo, a’di jin rashki ya ka yempa/ e a’di mo dhali o gwo mo ki: Miiyi aha/ ka ḵar/e mo ma ap̱o/ a’di jin yeri aha/ is ki gway mo. 4Dhali hili ki a’di di’d mmo/ush mo tani hili yan’ko’d a’di ki o gwo ki is piti mo ki: Ba aha/ yisa ḵo/ka Arumgimis yisa walla taḵa ’kwani yisa 5hili goma ’bom yansan jin wun ma kaṯẖ mo mmoṯu/ulkina a’di aha/ ki mii mo tani aha/ mina mii ka ḵar/e goma yim mo, wakan ka yim midi diki wuyaa/ is e mo ki yam piti jin rashina a’di mo be. 6Dhali Tap̱a ki o gwo mo ki: Ciḵi gwo mo ma, jin on ma mandwall gwo jin diki ta amanmii ka ḵar/e mo. 7Dhali min ma Arumgimis diki mii ka ḵar/e gom kum piti kun kwanykina a’di mo ’taa? uni gun gwoki ’twa/ i a’di ki montee ilu/ mo dhali ki mon’thiny mo ’taa? Mina a’di itaya adiiṯe/ ap̱o/ uni mo ’taa? 8Aha/ ṯora um gwo ki a’di midi mii ka ḵar/e gom uni ki jahanne/ mo. Bahili ki Ya/ gi ’Kwani midi p̱u’du/ mo tani mina a’di gam moŋgam gwo is e mony’cesh mo ’taa? 9A’di si’da/ ki ṯor gwom ’bi’th/e yansan ki uni gun gam ’twa/ ’kup̱ ki is buni mo ki uni ta kuŋ ḵar/e mo dhali waḵ kun tiya mo. 10’Kwani su/ iikin mo e gu’b gi mondheleladhelel mo mmo’tho mo. Jan ’de/ ta Wathim P̱arisi mo. Dhali jamu/ ta’da mantera thulp̱a/ mo be. 11Wathim P̱arisi doshki’d mo dhali ’tho kan ki is piti mo ki: Arumgimis, aha/ ’bora /e bwa i is mo ki aha/ dinaki waki ’kwanin tiya mo kun ta imanḵwal to mo dhali kun ’koki ta kuŋ ḵar/e mo dhali imanmii miinyc̱al mo walla mmodiki wa e ka mantera thulp̱a/ yansan mo be. 12Aha/ ga/a to mo me’di su/ ka dhas mo. Aha/ c̱ina to mo jin taḵu Arumgimis ’peni to ’baar mo jin gamkika/ mo be. 13Hila mantera thulp̱a/ a’di doshki’d isa dhana/ mo, a’di diki ’de’k em piti ’kup̱ ki momis mo, hili a’di dorki’da bor piti ki me’d mo mmo/o gwo mo ki: Arumgimis, miiyi mii ap̱o/ aha/ jin tana amanmii miinthus mo. 14Aha/ ṯora um gwo mo ki: wathi/ yansan yaki’d ka luŋgu’b bway gu’b piti mo ki mo ma ḵar/e mo, ma mo dhalka kamu/ mo. Haali/ aris ’kwani ’baar mo ka ’deṯe/ ’deṯe/ mo kun dhu is buni ki ca mo tani uni minu dhu ki gwa’d mo, hili a’di jin karki is piti ki gwa’d mo tani minu kar ki ca mo be. 15Dhali uni ’kokin mo si’da/ mmosusi usha ’pereny i a’di mo ki a’di midi ta uni is ki me’d mo. Dhali ki imanciḵ a’di gwo p̱arki a’di e mo tani uni ḵucurki uni ki gwo mo be. 16Hila Yesus yuḵki uni i a’di mo mmo/o gwo mo ki: Dhalki ushi uc̱i iiyini aha/ mo ma, dhalki uni ki non mo. Haali/ ku gi wakan mo tani ’kon e Bampa/ ma Arumgimis mo be. 17Ka jiŋ gana/ aha/ ona um gwo mo ki: a’diyin jin midi diki bu’th Bampa/ ma Arumgimis me’d ara ’ci mo tani midi diki cic̱ a’di mo be. 18Dhali tap̱aŋ kamu/ doṯ a’di gwo mo ki: Manṯor Gwo jin ’boro’d. Aha/ mina mii kata mo mmogam mal gi mondiki/e ki sule/ ya ye ’ba/ mo sa/? 19Dhala Yesus ki thoḵ a’di gwo mo ki: Atinta yuḵa /e aha/ ki jim ’boro’d mo? Wathin ṯal ’deŋ kamu/ yisa di’da jin ’boro’d mo, hili Arumgimis a’di ’de/ mo be. 20/e mishi gwoŋḵan kun ’kwarkunu mo kun o gwo mo ki: Dhalku/ c̱al ki mii mii mo ma, dhali, Dhalka ’kosh ki mii ’kosh mo ma, dhali, Dhalku/ to ki mii ḵwal mo ma, dhali, Dhalki gwonthus ki mii aḵ mo ma, dhali, Taḵi cim dhali kwan mo ma. 21Dhali a’di ki thoḵ a’di gwo mo ki: Aris to gwansan dhukika/ mo ’peni yil pem jin taka/ dhuru’c mo be. 22Dhali ka Yesus ciḵki a’di mo tani a’di ki o a’di gwo mo ki: Ton ṯal ’deŋ kamu/ di’d jin aṯẖa /e mo be. Yoli aris to gwansan kun tana /e mo ma dhali c̱iki uni gwansan kun hatha’ko’d mo dhali /e mini gam mo jin isha to ḵumma/ e momis mo dhali yayu/ mo dhali baṯẖaa/ isho’k mo. 23Hili ki a’di ciḵki gwo gwansan mo tani a’di warkina bwa ki diṯ mo haali/ a’di ta wathi/ jin ta pa ki pa mo be. 24Yesus hilki a’di mo dhali o gwo mo ki: Mii wa’di diṯa/ gom uni gwansan kun ta pa ki pa mo mmocic̱ Bampa/ ma Arumgimis mo be. 25Haali/ a’di ’ka’da mii gom kalman mo mmoya ki solol e jisa ’dip̱ira/ mo mmodhal wathi/ jin ta pa ki pa e i is mo mmocic̱ Bampa/ ma Arumgimis mo be. 26Uni gwansan kun ciḵki a’di mo tani o gwo mo ki: Waḵki/ wakan mo tani ija iminu iwoṯẖ mo sa/? 27Hili a’di o gwo mo ki: To jin molu mii ki ’kwani mo tani a’di mishu mii ka Arumgimis mo be. 28Dhala Buṯerus ki o a’di gwo mo ki: Hili mo mo ma, am dhalkina gu’b bam ’pen mo dhali baṯẖ /e nsho’k mo be. 29Dhali a’di ki o uni gwo mo ki: Ka jiŋ gana/ aha/ ona um gwo mo ki: wathiŋ kamu/ yisa di’da jin dhalki gu’b piti ’pen mo walla ashim piti mo walla ikam piti mo walla icom mo walla uc̱im piti mo gom gway gi Bampa/ ma Arumgimis mo 30a’di jin midi diki gam to jin maru is ki nyanye/ ki mo yansan mo dhali ki she/ yil jin midi p̱u’du/ mo tani a’di midi gam mondiki/e ki sule/ ya ye ’ba/ mo be. 31Dhali a’di ki sus uniŋ ’kume’d i’ce’dka su/ mo dhali a’di ki o uni gwo mo ki: Hili mo mo ma, ana iina ka gagamis mo e Pa Urushaliim mo be dhali aris to kun ’kwarkunu mo gom Ya/ gi ’Kwani mo ki imanc̱i gwo ma Arumgimis kadhamo/ mo tani minu thim mo be. 32Haali/ a’di minu c̱i ’kwani kun ’koki ta ’Kwani Yahuuda/ mo dhali uni mini mii a’di ka maḵ mo dhali kar a’di ki mon’the is jin shi/ashi/ mo dhali ’taḵ a’di manya/ i is mo. 33Dhali uni mini dor a’di mo dhali ’kosh a’di mo, dhali ka cim kwara mo tani a’di midi cuyi mis mo be. 34Hili uni ’koki mish gwo ’ban gom gwo gwansan mo. Haali/ gwo yansan bagkunu mo ’peni uni mo dhali uni ’koki nyiṯẖ gwo jin okina a’di mo be. 35Dhali ki a’di ’dishki Pa Ariiha is mo tani wathiny ja’daŋ kamu/ c̱a’bki’d e shemen bway tur mo mmo’tho to mo be. 36Dhali a’di ciḵki’da waambuhany ’kwani mmo/iikina uni ki iim pe mo. A’di ki doṯ gwo mo ki: Ii yan ta’da tinta mo? 37Dhali uni ki ṯor a’di gwo mo ka: Yesus gi Pa Naasira a’di yaki’d ki yampe mo be. 38Dhali a’di cuu’d ki: Yesus Ya/ ma Dawuu’d, miiyi mii ap̱o/ aha/ mo ma. 39Dhali uni gwahan kun ’koni buŋ’kup̱ mo tani ḵucurki a’di ki gwo mo mmoṯor a’di gwo mo mmoc̱a’b ki shwam mo. Dhali hili a’di cuu’d kagahara doḵ/e ki nyanye/ ki: Ya/ ma Dawuu’d, miiyi mii ap̱o/ aha/ mo ma. 40Dhala Yesus doshki’d mo dhali ḵan a’di gwo mo ki a’di minu susu mo e a’di mo. Dhali ki a’di ’dishki a’di is mo tani a’di ki doṯ a’di gwo mo ki: 41Atinta o /e bwa ki aha/ mina mii gom /e mo? A’di thoḵ a’di gwo mo ki: Tap̱a, dhalki aha/ budha momish mo mo. 42Dhala Yesus ki o a’di gwo mo ki: Budhi momish mom pini mo ma. Moŋgam gwo is pini a’di woṯẖki /e mo be. 43Dhali ki jahanne/ a’di bu’thki momish mo mo dhali a’di ki baṯẖ a’di nsho’k mo mmokara Arumgimis ki ca mo dhali aris ’kwani, ki uni p̱arki a’di e mo tani uni c̱ina Arumgimis momaŋ mo be.

will be added

X\