YAKUUB 5

1Iiyu/ shwane/ um gun ta pa ki pa mo mmoko mo dhali mmowol cuuwa/ mo gom monṯo’c bwa gun p̱u’dkina p̱o/ um mo. 2Tom bum kun tana um pa ki pa mo tani p̱u/kin mo dhali burrinyem bum shwan ma dhurany mo. 3’Dolkon ganam bum dhali ’dolkon kush bum wu gure/ mo dhali gurem buni kun wuna uni mo tani mini ta gwonṯor ap̱o/ um mo dhali a’di midi shwa buŋgwar is bum mo me’d o’d mo be. Um tul to gun ish ḵumma/ is mo goma cim kun ’koni ’ko’d mo be. 4Hili to gi gama uni gun miina ṯu’c mo, uni gun ’ciṯẖi/ to mo e bwam buntom bum mo kun baga um ka wun mo tani gwokin kagahara mo. Dhali ko jin gwona iman’ciṯẖ to mo tani a’di jidhirki’d mo e bwany’ce gi Tap̱a Arumgimis gi momis mo be. 5Um ’koni mony’cesh ki ’kom bum mo dhali ki bwam bum mo. Um momoṯkina dum bum mo eya tee jin ’ciṯẖu/ to ’kus mo. 6Um ta imanwaḵa waḵ mo. Um ’koshki wathiŋ ḵar/e jwa mo. A’di diki roc̱ um mo be. 7’Kuc̱i bwa mo ma ki ’kari’th wakan, iwaḵ pem, ntaga cim jin mina Tap̱a p̱u’du/ mo. Hili mo mo ma, amanḵor to c̱orki maman to jin tana aane/ e mony’cesh mo mmo’kuc̱a a’di bwa mo ki ’kari’th ap̱o/ a’di ntagi a’di bu’thki’da sho’k jin ṯwa/a/ dhala sho’k jiŋ ’ko’d mo be. 8Um si’da/ ’kuc̱i bwa mo ma ki ’kari’th mo dhali ṯela dum bum sho’k mo gom ya gi mina Tap̱a p̱u’du/ e me’d hila/ mo. 9Dhalku/ ki miiya gumgum mo, iwaḵ pem, ap̱o/ ka rem ’kup̱ mo ma, ki um minu ’koki dwall gwo mo. Hili mo mo ma, amandwall gwo a’di doshki’da p̱o/ campur mo be. 10Me’d gi she/mm gi isa nyor mo dhali bwa jin ’kuc̱u mo ki ’kari’th mo tani iwaḵ pem, budhi imanc̱i gwo ma Arumgimis mo, uni gun c̱iki gwo gom gway gi Tap̱a Arumgimis mo. 11Hili mo mo ma, ana yuḵa uni gwansan ki ku gi ’bora bwa mo, uni gun ’kokunu mo mmoṯel sho’k mo. Um ciḵki gwo mo goma Ayuub ṯelki sho’k mo dhali um p̱arki ’pemen jin di’di bwan Tap̱a e mo, bahili Tap̱a Arumgimis a’di jin hilki’da hil mo dhali mmomiimii mo be. 12Hili ap̱owa ris to ’baar mo tani iwaḵ pem, dhalku/ ki o gwo is mmothul me’d mo walla gom momis mo walla gom mony’cesh mo walla ma e gwo jin onu isa tiya mo, hili dhalka nyem bum ta’da nye mo dhali hili dhalka yisam bum ta’da yisa mo, ki um mini ’koki ṯa’k mo e miiwaḵ mo be. 13A/wathiŋ kamu/ ibwam um ’kosha is ka nyor mo ’taa? Dhalki a’di ’tho’d mo. Dhali a/wathiŋ kamu/ di’d jin ’bora bwa mo ’taa? Dhalki a’di yuḵ gway gi momaŋ mo. 14A/wathiŋ kamu/ ibwam um ’ba’thki’d mo ’taa? Dhalki a’di yuḵ ’kwani gwanyjaḵa/ ma ḵaniisa mo dhali dhalki uni ’thon mo gom a’di mo dhali wol a’di ayini ’kup̱ ki gway gi Tap̱a mo 15dhali ki mon’tho gi moŋgam gwo is mo tani a’di midi woṯẖ wathi/ jin ’batha’d mo dhali Tap̱a a’di midi cu a’di mis mo dhali waḵki/ a’di miiki miinthus mo tani a’di minu gwam mo be. 16Dhali ki mii gi wakan mo tani piyi gwo miinthus bum ka rem ’kup̱ mo ma dhali ’thoyi ka rem ’kup̱ mo ma, ki um minu wac̱ mo be. Haali/ mon’tho gi wathiŋ ḵar/e mo tani ta gi mom’bi’th e a’di mmowagas mo be. 17Iliyya a’di ta wathi/ jin nyaḵa e ’dap̱ ki ana mo dhali a’di ’thoki’d ka daran du mo jin min ma shoki diki he’th mo, dhali ki yili kwara mo tani dhali ka appe ’kona ’kup̱i pe’de/ mo tani asho’k diki he’th ap̱o/ mony’cesh mo be. 18Dhali yan’ko’d a’di ’thoki’d mo doḵ/e dhali momis c̱iki’da sho’k mo dhali mony’cesh dho’thki maman tom piti mo be. 19Iwaḵ pem, waḵki/ jan ṯal ’deŋ kamu/ ’peni bwam um dhereski’d mo ’peni gwoŋ gana/ mo tani dhali jamu/ ki sus a’di ka nyaŋ’ko’d mo tani 20dhalki a’di mishi’d ki a’di yin jin susu’da manmii miinthus ka nyaŋ’ko’d ’peni bway dheres piti mo tani midi woṯẖ a’di aḵashiram piti ’peni mowu mo dhali midi kuma ma’diny miinthus ’kup̱ mo be.

will be added

X\