YAKUUB 4

1’Peni mana yayin ma nyor mo dhali ’peni mana askina um ibwam um mo? A’di diki ta en’dap̱ bum ’taa? kun askin e tom buŋgwar is bum mo? 2Um ’kona gwo ibwa mo tani dhali um ’koki gam a’di mo. Wakan um ki ’kosha ’kosh mo. Dhali um ’thoṯẖa bwa mo tani dhali um mol a’di bu’th mo. Wakan um askin mo dhali gama nyor mo. Um ’koki gam to mo haali/ um ’koki doṯ to mo be. 3Um doṯki to mo tani dhali um ’koki bu’th a’di mo haali/ um doṯki to ki doṯ thus mo mmo’baar a’di jin ’dap̱a um e mo be. 4Um ’kwaniny c̱al, ’kona um ki mish mo mo ki mmonyaḵ to mii ki ’kwaniny’cesh mo tani a’di ta ’kup̱ ka Arumgimis mo? Haali/ a’di wakan mo tani a’di yin jin ona bwa ki ta mugu gi ’kwaniny’cesh mo tani kar is piti mo mmota ’kup̱ ka Arumgimis mo be. 5Walla a/ṯosha um ki Gwo ma Arumgimis jin ’kwarkunu mo o gwo ka wuny is mo mmo/o gwo mo ki: A’di jin shwana dhap̱ana nyor ap̱o/ shi/in jin kara a’di mo mmoc̱a’b e ana mo? 6Hili a’di c̱iki’da ’the ki nyanye/ mo be. Dhali wakan a’di o gwo mo ki: Arumgimis ceshki mo mo gom uni gun dhu ’ba/ ki ca mo hili a’di ki c̱iya ’the gom uni gun dhu is buni ki gwa’d mo be. 7C̱i is bum wakan ka Arumgimis mo ma. Roc̱i tap̱a ma ruma ’cesh mo ma dhali a’di midi gus mo ’peni um mo be. 8’Dishi Arumgimis is mo ma dhali a’di midi ’dish um is mo be. Lami me’d bum mo ma, um ’kwani kun ta imanmii miinthus mo dhali dheleli adum bum mo ma, um ’kwani kun ’kona bwa ka susu/ mo. 9Tayi buyem pa mo ma dhali koyi mo dhali ki kony jabu’th mo. Dhalki momp̱e’th bum wara’d ki moŋko mo dhali dhalki bwaŋ ’kunyu’d bum wara’d ki mondiṯ bwa mo. 10Dhuyi is bum ki gwa’d mo ibwambori Tap̱a Arumgimis mo ma dhali a’di midi dhu um ki ca mo be. 11Dhalku/ gwonthus ki o ka rem ’kup̱ mo ma, iwaḵ pem. Haali/ a’di jin oki gwonthus ap̱owa kam piti mo walla dwalla kam piti gwo mo tani a’di oki gwo ap̱o/ gwoŋḵan jin c̱inu mo dhali dwall gwoŋḵan jin c̱inu gwo mo. Hili waḵki e ki dwall gwoŋḵan jin c̱inu gwo mo tani /e tana manmii gwoŋḵan jin c̱inu mo yisa hili /e tana mandwall gwo mo be. 12Amanc̱i gwoŋḵan jin c̱inu mo tani di’d ’de/ mo dhali amandwall gwo di’d ’de/ si’da/ mo, a’di jin mishi’da mish woṯẖ mo dhali mmo’ce’da/ ’ce’d sho’k mo. Hili ki /e ja dwallkina mannyaḵ c̱a’b pini gwo mo? 13Iiyu/ shwane/ mo ma, um uni gun o gwo mo ki: Shwane/ walla ka’thamo/ ana mina ii mo e mo ciki/ dhali ciki/ e bampa/ mo dhali ’baar yil mo imun mo dhali yol to mo dhali gam nyunycina/ mo. 14Hili um ’koki mish to gun mini mii ka’thamo/ mo. Moŋ’koki/em bum wakata mo? Haali/ um tana wulp̱e/ kun piyin ki ari mo mo dhali la p̱i mo be. 15Gom kan ḵa ba/ gun o gwo mo ki: Waḵki/ Tap̱a ona bwa mo tani ana mina ’ko ki e mo dhali ana ki mii to yansan mo walla to c̱aan mo. 16A’di ta a’di, um dhuki ’bam bum ki gwo jin baha um mo. Aris mo jin dhunu is ki ca mo tani uni ta tonthus mo. 17A’di yin jin mish jim ’boro’d mo mmomii mo dhali diki mii a’di mo tani gom a’di mo a’di ita miinthus mo be.

will be added

X\