IBRANIYIIN 6

1Wakan, dhalki ana dhala gwo ma bwa nyara/ kun ṯoru ’pen mo goma Ḵrisṯẖos mo dhali yip̱ ’kup̱ki isi yip̱ gana/ mo e mo jin isuwa is mo, yisa mmomina ana n’thi toŋ kamu/ doḵ/e ap̱o/ mo jin ḵa’bu/ e mo jin rijuwa du is mo ’peni mii kun wukin mo, dhali moŋgam gwo is ’kup̱ ka Arumgimis mo yisa, 2ki gwo jin yedhu sho’k mo gom gwo gi mo jin lamuwa lam is mo ki miin dhamo/ mo, dhali mo jin ’thikunu mii ’ko’di me’d mo, dhali mompi ’peni mowu mo, dhali mo jin toru gwon dwall ’twa/a ’cesh ki sule/ mo. 3Dhali mii yansan a’di imina ana imii mo waḵki/ Arumgimis midi dhal ana bway mo be. 4Haali/ a’di molu mii mo mmotash mii e mo doḵ/e gom mo jin rijuwa du is mo gom uni gwansan kun takin gi e ma du kun ’twaḵki mo ki ’twaḵ jin shi/i’d ’thissa/ mo, uni gun nyoḵki to gi momis jin c̱inu ki me’d mo dhali war ki uni gun pwaḵkunu Shi/in Dheleladhelel mo be, 5dhali uni kun nyoḵki mo jin ’kunya gwo ma Arumgimis mo dhali aris mom’bi’th kun mini p̱u’du/ ki she/ yil mo, 6waḵki/ uni mini c̱i mii jin dhalu gwo ’pen mo, me’d jin ’koshkina uni Ya/ ma Arumgimis jwa mo ki cwany’ciṯẖan dhul mo gom gwo ki bwam buni mo dhali ’de’k a’di imis mo ki a’di midi bu’th mo jin waḵuwa waḵ mo be. 7Haali/ mony’cesh jin p̱iki yi’den sho’k mo jin ṯa’kki ’twa/ me’d ka ris ap̱o/ a’di mo dhali a’di ki dho’th ’cemen to kun ha me’d mo gom gway gi uni gwansan kun ḵorki a’di mo tani mony’cesh bu’thki mom’bor mii ’peni Arumgimis mo be. 8Hili waḵki/ a’di dho’thki’da risa ’de/ mo dhali arisa liṯ mo tani a’di ushki me’d mo dhali ’dishkina ’twa/ mo ki a’di minu jee mo. Dhali ’pemen piti mo tani a’di minu pur ki o’d mo be. 9Hili um gun enu mo, aman lalkunu sho’k ki gwo mo eya dum bam mo gom um mo, mmomisha aman tom ’borga/ ’peni um mo kun ta kum bway gi mowoṯẖ mo, ba gwo gi wakan mo tani a’di i/okina aman gwo mo be. 10Haali/ Arumgimis diki mola ḵar/e ta mo wakan mmoshampar miin tom bum ki e mo dhali mo/en jin ṯorkina um gom gway piti mo e miin to gun miikina um mo gom uni kun dhunu ki she/ ki dhelel dhelel mo, me’d mii gun ’kokina um mmomii a’di shwanesan mo. 11Dhali aman ona bwa ki isi oŋ gana/ ki um ka ’deṯe/ ’deṯe/ mo mini ṯor mii yan ka daran du mo mmonyiṯẖa/ nyiṯẖ ki mii jin shi/i’d mo mmomish ki isa duŋ gana/ gom mo ma ’teŋ kap̱e/ jin midi di ntagi ’pemen mo be, 12wakan, ki um minu ’taki ’koki soroṯẖ mo, hili thoḵi uni gwansan mii mo uni gun takin gi mal mo e gwo kun onu is mo ki moŋgam gwo is mo dhali ki bwa jin ’kuc̱u ki ’kari’th mo be. 13Haali/ ka Arumgimis oki gwo is goma Ibrahiim mo me’d jin dara a’di gi jin ṯal ’deŋ kamu/ jin eḵa/ eḵ ki a’di jin thulkina a’di gwo me’da p̱o/ mo tani a’di ki is piti a’di ki thul a’di gwo me’da p̱o/ ki is pitiŋ gana/ mo 14mmo/o gwo mo ki: Ka jiŋ gana/ aha/ mina ’bor /e mii mo dhali mar /e is mo be. 15Dhali wakan a/Ibrahiim taki’d gi bwa jin ’kuc̱kina a’di ki ’kari’th mo mmobu’th gwo jin onu is mo. 16’Kwani ka jiŋ gana/ thulki gwo me’da p̱o/ ki a’di jin caaca mmobol uni e ki is buniŋ gana/ mo, dhali eya ris gwom buni kun suka uni mo tani gwo jin thulu me’da p̱o/ mo a’di ta gwo jiŋ ’ko’d jin toruwa bora ’cesh mo. 17Wakan ka Arumgimis dina gwo ibwa mo mmoṯor mo jin p̱ina a’di gwo jip̱i e ki nyanye/ mo gom uni gun mini ḵal mal gi gwo jin onu is mo tani a’di diki aḵ buyempam pitiŋ gana/ e mo gom ’kup̱ bwaŋ ganam piti mo tani a’di hurki ’pen bway bwaman mo ki gwo jin thulkina a’di me’da p̱o/ mo be. 18Wakan ki gwo kun ’koni su/ kun ’konuki aḵ e mo tani e mo jin moluwa Arumgimis nyo/ mo ki a’di ta thus mo tani ana kun takina gi mo jin sokina ana mo gom jwam bana jin sokina ana mo mmohur mo e a’di mo tani minu ’taki ’bitha du is mo mmobu’th mo ma ’teŋ kap̱e/ jin karkunuwa bori ana mo be. 19Ana takina gi a’di yansan mo mmomish mo ki isa duŋ gana/ mo dhali ṯelu sho’k mo ka ḵar ’kup̱ toŋḵuthu’d goma ḵashira/ mo dhali mo ma ’teŋ kap̱e/ c̱aan jin jidhirki’d mo dhali cic̱ mo e mo yan jin ḵogu mo ibwamp̱o/ burrinye/ jin karu ka yolol mo mmodiḵ mo e mo, 20mo c̱aan jin yakin ma Yesus nṯwa/a/ mo gom gway bana mo mmotakina a’di agasiis jin ca’d mo ki sule/ sule/ mo mmothuḵ mii ma Malkisaadag mo be.

will be added

X\