IBRANIYIIN 3

1Wakan iwaḵ kun ḵogu mo, um gun pwaḵkunu to gi momis mo ka yuḵ jin yuḵu mo, mmoḵwo’c jasi eya Yesus mo, a’di jin karkunu ki she/ mo dhali ta’da gasiis jin ca’d mo gom gwom bana jin pikina ana mo. 2A’di ta a’di jin ta a’di isiŋ gana/ mo gom a’di jin karki a’di ’pen ka pije/ mo, me’da Musa mo mmotakina a’di isiŋ gana/ mo si’da/ e gu’b ma Arumgimis mo. 3Hila Yesus a’di karkunu ki a’di jin haki me’d ki haŋ gana/ mo e monyca mo mmobola Musa e mo, me’da mannyaŋ gu’b jin taḵkunu kagahara mo mmobol gu’b e mo be. 4(Haali/ aris gu’b ki she/ ki she/ nyaŋkunu ki ’kwani mo, hili amannyaŋa ris to ’baar mo tani a’di ta’da Arumgimis mo be. ) 5Dhala Musa a’di ta a’di jin ta isiŋ gana/ mo mmomiiya ris to ’baar mo e gu’b ma Arumgimis mo me’da manmii to mo, mmoṯesa ris gwo gom to ’baar mo kun minu mii ṯori ’ko’d mo be. 6Hila Ḵrisṯẖos a’di ta a’di jin ta isiŋ gana/ mo ap̱o/ gu’b ma Arumgimis mo me’d ya/ mo. Dhali ana tana kuŋ gu’b piti mo waḵki/ ana mina bu’th gwo ki nyeŋ mo, gwo gom mom bana jin wukina ana a’di jwa i is mo dhali dhu ’ba/ ki ca mo e mo ma ’teŋ kap̱em bana mo be. 7Wakan, me’d gwo jin okina Shi/in Dheleladhelel mo ki: Shwane/, ki um mini ciḵ ’twam piti mo tani 8dhalka dum bum ki ’bi’th mo me’d mii jin ushkunuwa ush mo eya tee jin palkunu um mo e mombwaasho mo 9e mo yin jin palkina ibabam bum aha/ mo dhali mish miim pem ki yila issu/ mo. 10Wakan aha/ c̱i’thkunuwa du mo ki ’kwani ma nyaḵum yil gwansan mo, dhali o gwo mo ki: Uni isa yempa/ iikini dheres mo eya dum buni mo dhali uni ’koki mish bway pem mo. 11Me’d jin thulka/ me’da p̱o/ gwo mo goma nyor pem jin deḵga/ mo tani uni mini ’koki cic̱ mo e mo ma si/is pem ki sule/ sule/ mo be. 12Hili ki ’bore/ iwaḵ mo isi ciki/ ki jin ṯal ’deŋ kamu/ ’peni bwam um mo midi diki ’taki ta ga du jin ta thus ki thus mo mmo/ush gwo gam is mo, mmosus um mmoṯa’k mo ’peni bway ma Arumgimis jin di ki e mo be. 13Malasiya malas ka rem ’kup̱ isa yempa/ mo isi me’d jin tana a’di atee jin yuḵu ka Tee Yan mo, jin mina miinthus diki he’k jan ṯal ’deŋ kamu/ e mo ki mo ma he’k em piti mo mmo’bi’th uma du mo. 14Haali/ ana pwaḵkunu to eya Ḵrisṯẖos mo waḵki/ ana jasi ’te/ mo mina bu’th monyjwam bana jin wuna ana a’di i isi ṯwa/a/ mo mmoṯel sho’k mo ntagi ’pemen mo, 15ki a’di ’konu mo mmo/o si’da/ mo ki: Shwane/, ki um ciḵki ’twam piti mo tani dhalka dum bum ki ’bi’th mo me’d mii jin ushkunuwa ush mo. 16Ki ija si’da/ uni i’kokin mo mmociḵ a’di mo dhali ’ko mo mmo/usha ush mo naskina/? ’Kona uni ki ta uni gwansani ’baar mo kun dhalki Pam Masir ’pen mo e bwaŋ’kwariny mii jin shun ma Musa ashu/um bway mowa? 17Dhali ki ija a’di ic̱i’thki a’di adu ki yila issu/ mo? A’di diki ta uni gwansan kun miiki miinthus mowa, kun ishkina buŋgwar is buni e bwam ma sho mowa? 18Dhali ki ija si’da/ ithulkina a’di me’da p̱o/ gwo mo mmo/o ki uni mini ’koki ’taki cic̱ mo e mo ma si/is piti ki sule/ sule/ mo, hili a’di diki ta uni gwansan kun ushki gwo ha e mo mmomii mowa? 19Wakan ana p̱arkina uni e mo ki uni molki cic̱ mo haali/ uni ushki gwo gam is mo be.

will be added

X\