IBRANIYIIN 13

1Dhalki mo/en jin en ma waḵ ka rem ’kup̱ mo ṯikir di mo. 2Dhalku/ ki mii mii ma p̱inykin is mo mmoṯor mii jin minu ta gu’b bum ŋal mo goma ris yilkina/ mo, haali/ gom mii gi wakan mo tani kun tiya suski iman’doyu gwo gu’b buni mo ki mii jin molkina uni uni mo be. 3Kayi uni gwansan e mo kun ’kokin eya sijin mo, ma me’d jin nyaḵkina um ’ko eya sijin nyaḵki uni mo. Dhali nyaḵki uni gwansan kun miinu ka jin thus e mo, haali/ um si’da/ nyaḵki ’ko e buŋgwar is mo be. 4Dhalki mash jin mashu ki mash gana/ mo karu ki montaḵi bwaman umi ’baar mo dhali dhalki mo gi miinu miimash karu ki jiŋ ḵogu mo haali/ Arumgimis midi dwall gwo mo gom uni gun ha’k ’pen ’ceŋ gwaṯẖ mo dhali up̱ kun ta kumana ’ka mo dhali uni gun mii miinyc̱al mo. 5Dhuyi moŋ’koki/em bum ki ’kus mo ’peni mo jin enuwa guurush mo dhali kap̱i um mo ki to jin tana um mo, haali/ a’di oki gwo mo ki: Aha/ mina diki ush me’d ki sule/ sule/ mo gom um mo walla aha/ mina diki dhal um ’pen mo be. 6Wakan, ana mina kar dhan mo jin wuna ana a’di jwa i is mo mmo/o gwo mo ki: Tap̱a a’di ta’da Manwoṯẖ pem mo be. Dhali aha/ mina diki ta ḵo/is mo. Ki to gi wakata imina ’kwani mii aha/ mo? 7Kayi imanshu/um bway e mo, uni gwansan kun oki um gwo ma Arumgimis mo dhali nyiṯẖi/ adu’d mii mo gom moŋ’koki/em buni mo dhali thoḵiya thoḵ mo gom moŋgam gwo is buni mo. 8Yesus Ḵrisṯẖos ta a’di ma tili/ mo dhali ji gi shwane/ mo dhali gom ki sule/ sule/ mo, a’di jin diki war mo. 9Dhalku/ ki ta uni kun minu susi per mo ki gwo kun ṯoru kun ’kona e ki she/ ki she/ mo dhali kun molu mo naskina/. Haali/ a’di ’boro’d mo ka du minu ’bi’th is ka ’the mo, yisa ki tonṯe/ mo, a’di jin midi diki ha me’d mo gom uni gun shwaki uni mo. 10Ana tana ga gwaṯa/ jin miinuwa basa ’cesh mo, dhali ’peni a’di mo tani uni gun miiki to mo gom gu’b burrinye/ mo tani ’konuki dhal bway mo mmoshwa to mo be. 11Haali/ buŋgwar is gi to/e gwansan kun wolkunuwa bas buni kun ḵalkunu mo e mo jin ḵogu mo ka gasiis jin ca’d mo gom mii kun ’ciṯẖu/ a’di a’cesh mo gom miinthus mo tani uni c̱i’thkunu ki o’d mo ka pije/ ’peni gu’ba’ku/ mo be. 12Wakan Yesus si’da/ ’koshkina is ka nyor mo ka pije/ mo ’peni ’twaŋkala goŋ mo, ki mii gi wakan mo tani ki a’di midi dhagam ’kwani ka bas pitiŋ gana/ mo be. 13Wakan, dhalki ana ḵala ya ka bor mo e a’di ka pije/ mo ’peni gu’ba’ku/ mo, mmoḵala sor jin minu sor ana gom a’di mo be. 14Haali/ mmahan mo tani ana dara gi ’peŋkuman bampa/ jin ta a’di jin midi di ki sule/ sule/ mo, hili ana simma ’peŋkuman bampa/ e mo jin midi p̱u’du/ mo be. 15E a’di mo tani dhalki ana si’da/ ṯikira ’ko mo mmoc̱i mo jin miinuwa basa ’cesh mo mmomaŋa Arumgimis mo, a’di jin ta gwo mo kun mini pi ’peni ’twam bana kun ta maman mo ’peni mo jin nyiṯẖu/ gway piti mo be. 16Dhalku/ ki mii mii ma p̱inykin is mo mmomii mii kun ’boron mo dhali mmopwaḵ to bwa mo a’di jin tana um mo, haali/ ki to gi wakan kun ’ciṯẖuwa basa ’cesh mo tani a’di ’borki’da Arumgimis bwa mo be. 17Hayi uni gwo e mo uni kun tana shu/um bway gom um mo dhali ’dap̱i ’twa/a ’cesh e uni mo. Haali/ uni ’kon mo mmotima ḵashiram bum mo me’d ’kwani kun ’kokin mo kun mini mii c̱i gwo mo. Dhalki uni mii a’di yansan ki bwaŋ ’kunyga/ mo, dhali yisa ki bwa kun biṯu ka luŋgu’b yisa, haali/ a’di midi ’taki diki ta shi/ miim ’boro’d gom umi. 18’Thoyi gom aman mo, haali/ aman misha ki isa duŋ gana/ mo ki aman dhelelkina ’twa/ ma dum bam ki dhelel mo mmo/o bwa mo mmomii mii kun minu taḵa taḵ mo eya ris to ’baar mo be. 19Aha/ ṯirrishkina gwo ka daran du kagahara mo ki um mini mii to gwansan mo, ki mii gi wakan mo tani ki aha/ minu ’taki waru/ mii is ka nyaŋ’ko’d mo e um mo ki ’dishe/ mo be. 20Shwane/ dhalka Arumgimis gi moŋḵu’th is, a’di jin guyi Tap̱a Yesus bana ’peni mowu mo doḵ/e, a’di jin ta’da Amanhil ḵa’bal, ka bas gi gwo jin gamu me’d jin midi di ki sule/ sule/ ya ye ’ba/ mo 21mmoṯe um ka ris to kun ’boroni ’baar mo ki um mini mii bwam piti mo, mmo/umkina a’di e um mo a’di jin ’bor a’di bwa mo e bwambori jis/em piti mo, eya Yesus Ḵrisṯẖos mo, e a’di jin mina monyca icil ki sule/ sule/ mo dhali ki sule/ sule/ mo. Amen. 22Aha/ yip̱a ’kup̱ ’kup̱ki um iwaḵ mo. Thonaa/ me’di ’ko’d mo ki gwom pem jin malaskika/ um mo haali/ aha/ ’kwarkina um gwo ki e ’pe’pere/ mo. 23Um mini ’taki mish gwo ’ban mo goma kam bana ka Ṯimuṯẖawuus mo gom ’cuḵ jin ’cuḵkunu a’di mo. Ki a’di mo tani aha/ mina p̱ar um e mo waḵki/ a’di midi p̱u’du/ ki ’dishe/ mo be. 24Theki aris imanshu/um bway me’d mo dhali aris uni gun dhunu ki she/ ki dhelel dhelel mo. Uni gwansan kun p̱u’dkin mo ’peni Pa Ithaaliya mo hashki um monthe me’d mo be. 25A’the midi di gom umi ’baar mo. Amen.

will be added

X\