IBRANIYIIN 11

1Moŋgam gwo is a’di imishu ki isa duŋ gana/ ki a’di ta to gom mo ma ’teŋ kap̱e/ mo, mmosuka du mo gom to kun ’konuki p̱ar e mo. 2Haali/ ki a’di mo tani jwahaŋ ’kwanin dhamo/ uni bu’thki mo jin nyo/uwa nyo/ mo be. 3Ki moŋgam gwo is mo tani ana mishkina gwo ’ban mo ki mony’cesh uḵkunu ki gwo ma Arumgimis mo, wakan ki a’di jin p̱arkunu e mo tani uḵkunu ki to kun ’koki piyu/ is ka pije/ mo be. 4Ki moŋgam gwo is mo tani aHabiil a’di miiki’da Arumgimisa bas mo jin mishu bu’th mo mmobol ji ma Kayiin e mo ki mii jin bu’thkina a’di mo jin nyo/uwa nyo/ mo me’d wathiŋ ḵar/e mo. Haali/ Arumgimis ḵalki gwo o mo gom tom piti jin c̱ina a’di ki me’d mo jin bu’thkunu mo. A’di wuki’d mo, hili ki moŋgam gwo is piti mo tani a’di di’d ki e mo naskina/ mmo/o gwo mo be. 5Ki moŋgam gwo is mo tani a/Aḵnuuḵ a’di bu’thkunu bway momis mo, wakan ki a’di midi ’taki diki p̱ar wu e mo. Dhali a’di yisa gamkunuwa, haali/ Arumgimis bu’thki a’di bway momis mo. Dhali nṯwa/a/ ki a’di dinuki bu’th bway momis mo tani a’di ḵalkunu gwo o mo ki a’di miiki to jin ’borki’da Arumgimis bwa mo be. 6Ki dar gi moŋgam gwo is mo tani a’di molu mii mo mmo’bora Arumgimis bwa i is mo be. Haali/ a’diyin jin midi ’taki ’disha Arumgimis is mo tani midi mii gam gwo is ki a’di diki’d mo, dhali ki a’di midi c̱i uni gwansan to kun ish ḵumma/ mo kun ŋap̱i a’di mo be. 7Ki moŋgam gwo is mo tani aNuuh, a’di rumkunu ka Arumgimis mo isi goma yirto jin dina a’di ki mish naskina/ mo tani a’di yip̱i unu ’kup̱ mo ki moŋḵo/ is jin ta’da gayiin mo, a’di ki dhera ḵur mo gom kuŋ gu’b piti jin minu ta is ki me’d mo be. Ki mii yan mo tani a’di ki mii miiwaḵ gom gwon dwall jin toru gwo ’twa/a ’cesh mo gom ’kwaniny’cesh mo dhali a’di warki’d ka manḵal mal gom mo ma ḵar/e mo jin p̱u’dki’d ki moŋgam gwo is mo be. 8Ki moŋgam gwo is mo tani a/Ibrahiim haki gwo e mo ki a’di yuḵkunu mo mmoya ka pije/ mo e mo jin mina a’di bu’th mal mo. Dhali ki a’di yaki’d ka pije/ mo tani, mo misha a’diya jin yana a’di ya mo? 9Ki moŋgam gwo is mo tani a’di warki’d ki yilkina/ e mony’cesh jin onu gwo is mo, e mony’cesh jin diki ta jim pitiŋ gana/ mo, mmoc̱a’b e gu’b burrinye/ jin nyaŋu mo nyaḵka Is/hak mo dhala Yakuub mo, uni gun ta imanḵal mal mo nyaḵki a’di mo ki gwon ’de/ jin onu is mo be. 10Haali/ a’di hilki’d gom ’peŋkuman bampa/ jin midi p̱u’du/ yilaŋ kamu/ mo, a’di jin ḵa’bu/ mo, a’di jin nyaŋkin ma Arumgimis mo dhali a’di jin uḵkina a’di mo be. 11Ki moŋgam gwo is mo tani aSaarah, ayim ki is piti bu’thki mom’bi’th mo mmobwaa mo, isi kani ka yim ’baarkina yila dho’th piti mo, haala yim nyiṯẖki a’di ki a’di jin ta isiŋ gana/ mo, a’di jin oki gwo is mo be. 12Wakan, ’peni wathin ’de/ mo tani, dhali a’di wana e ki wathiny jwa mo tani, emen tana ris ka ris dho’thkunu mo me’da cul gi momis mo dhali wa e ki emen ma si’b kun ishkin e bwaman ma gap̱ mo kun molu deŋ e mo be. 13Aris uni gwansani ’baar mo wukin mo e moŋgam gwo is mo dhali yisa bu’th to jin onu gwo isa. Hili uni p̱arki a’di e mo dhali the a’di me’d ’pena dhana/ mo, dhali uni ’kokin mo me’d ’kwani kun ’kon ka pije/ mo ’peni bampaŋ kamu/ mo dhali me’d uni gun ’kon e bwaman ’kwanin tiya mo e mony’cesh mo be. 14Haali/ ’kwani kun o gwo kan mo tani kar a’di eya tente/ mo ki uni ŋap̱ki mo mo jin minu nyaŋ gu’b buni nycine/ mo be. 15Waḵki/ uni mini kulum gwo ibwa mo gom mony’cesh c̱aan jin iikina uni ka pije/ ’peni cine/ mo tani uni mini ’taki ta gi embula ’borga/yi mmodoḵ ka nyaŋ’ko’d i a’di mo be. 16Hili, gom a’di gi wakan mo tani uni ’kokina gwo ibwa mo gom bampa/ jin dina jaro/ ki she/ mo, a’di yansan jin ta bampan ṯal ’de/ jin ta ji gi momis mo be. Ki mii gi wakan mo tani Arumgimis dina is ki ’the mo ki a’di minu yuḵ ka Arumgimis buni mo haali/ a’di thosonki uni ’peŋkuman bampa/ mo be. 17Ki moŋgam gwo is mo tani a/Ibrahiim ki a’di palkunu mo tani c̱iki’da Is/hak mo, dhali a’di jin bu’thki gwo jin onu is mo tani thosonki is mo mmoc̱i ya/m pitin ṯal ’deŋ gana/ mo be, 18ma e a’di jin onu gwo is mo ki: Eya Is/hak mo tani emen pini minu ’cem gway mo be. 19A’di nyiṯẖki’d ka Arumgimis mishki ’kwani ’de’k mo isi kani ’peni mowu mo. Wakan, ki gwo jin wayina e kan jin okunu mo ki a’di bu’thki a’di ka nyaŋ’ko’d mo be. 20Ki moŋgam gwo is mo tani a/Is/hak ’thoki’d gom mom’bor mii yilaŋ kamu/ ap̱owa Yakuub mo dhala Iisu mo be. 21Ki moŋgam gwo is mo tani aYakuub ki a’di murki’di wu mo tani a’di ’borki iya/ ma Yuusup̱ mii ka ’deṯe/ ’deṯe/ mo, mmogaŋkina a’di is ka ’cesh mo mmoluŋa luŋ mo ap̱o/ ’kucwa jin guna a’di ime’d mo. 22Ki moŋgam gwo is mo tani aYuusup̱ ki a’di dina mondiki/em piti ’kup̱ mo tani a’di ṯorki gwo eya tente/ mo gom ya ma pije/ gi Uc̱i ma Israyiil mo dhali a’di ki ḵan gwo mo gom isi kan piti jin minu kan a’di mo be. 23Ki moŋgam gwo is mo tani aMusa ki a’di dho’thkunu mo tani a’di bagkunu ka ppe ’kup̱i kwara mo ki icom mo haali/ uni mishkin ka ’ci shina jaro/ ime’d mo. Dhali uni ’koki ḵo/ is mo gom gwoŋḵan ma maliḵ mo. 24Ki moŋgam gwo is mo tani aMusa ki a’di caki’d mo tani ushki’d mo mmoyuḵkunu a’di ki ya/ gi ’bwa/ ma P̱irawn mo. 25A’di ki dhal mii e i is mo mmokwany mo gi mii ma ha’th’ko’d mo nyaḵki ’kwani ma Arumgimis mo, ma mmodiki ’kuny bwa mo nyaḵki uni gwansan e mo jin ’konu ki ’kol ’ce e miinthus mo ki mo jin minu tor sho’k ka pupush mo be. 26A’di nyiṯẖki’d mo ma sor jin ’koshu is ka nyor goma Ḵrisṯẖos mo mmota pa ki pa mo mmobol dhan to gi Pam Masir kun ish ḵumma/ e mo, haali/ a’di hilki’d gom to jin ish ḵumma/ jin minu c̱i mo be. 27Ki moŋgam gwo is mo tani a’di dhalki Pam Masir ’pen mo, yisa mmoḵo/kina a’di anyor ma maliḵa, haali/ a’di ’dimki ’kup̱ mo mmohilkina a’di a’di jin molu mish mo be. 28Ki moŋgam gwo is mo tani a’di karki mo jin penuwa Pe’kup̱anyolos mo dhali ḵukusa bas mo, wakan ka Man’ce’da bwanyara/ sho’k mo midi ’taki diki ta uni is ki me’d mo be. 29Ki moŋgam gwo is mo tani ’kwani ’ciṯẖki Ḵumma/ Yi’de/ jin ta gi ’Per mo me’d mony’cesh jin ḵuthaḵu’th mo. Hili ’Kwani gi Pam Masir, ki uni palki mii mo mmomii mii jin nyaḵki’d kan mo tani uni loskina yi’de/ mo be. 30Ki moŋgam gwo is mo tani adhana gaŋgara/ gi Pa Ariiha biṯki’da ’cesh mo ’ko’di uni kukulki a’di is mo ka cim pesu/ mo. 31Ki moŋgam gwo is mo tani aRahab, a’di jin ta’da yim c̱al mo, diki ’ce’d sho’k mo nyaḵki uni gwansan mo, uni gun ush gwo ha e mo, haala yim a’di miiki mii mo mmohan ’kwani kun dhuyunu ’pen mo mmo’kar mo mo be. 32Dhali ki gwo gi wakatinta imiga/ o moye? Haali/ mo midi har moyi gom aha/ mo mmoṯor gwo mo goma Gidyuun mo dhala Barag mo dhala Shamshuun mo dhala Yap̱taah mo dhala Dawuu’d mo dhala Samu/iil mo dhali imanc̱i Gwo ma Arumgimis kadhamo/ mo – 33uni ki moŋgam gwo is mo tani p̱iki bampan tiya e mo mmobu’th mo, dhali mmotor gwowa ’bora ’cesh mo gom mo jin dhunuwa dhu ka ḵar/e mo, dhali bu’th gwo kun onu is mo, dhali mu’th aris ’twa/ ma dhop̱ mo, 34dhali mmo/us o’d jin biliṯki’d ka le’d mo, dhali ye shemen gandala turga/ mo, dhali mmogam mii adu is ki mom’bi’th mo ’peni moŋ’ka’d is mo dhali war ki a’di jin ’bitha’bi’th mo e mo ma mee mo, dhali dhu ’kwanin tiya kun tana thuruḵ ma mee mo mmoso mo. 35Up̱ bu’thki kum buni kun wukin mo ki mompi jin piyunu/ mo. Kun tiya ’koshkunu is ka nyor ka ’cem ’cem mo, mmo/ush mo bu’th mo, mo jin ’cuḵuwa ’cuḵ mo, ki uni mini ’taki piyu mo doḵ/e e mondiki/e jin dina jaro/ ki she/ mo. 36Kun tiya ’kosha is ka nyor ki mii jin miinu uni ka maḵ mo dhali kun tiya dorkunu ki yis bip̱ mo dhali isi kani kun tiya deḵkunu mo ka maḵḵiya mo dhali kun tiya takina habuus mo. 37Uni ’koshkunu ki wosh mo. Dhali kun tiya ’ciṯẖu/ is bwa ka ’co’colo’c mo. Dhali uni palkunu mo. Dhali uni ’koshkunu jwa mo ki gandala turga/ mo. Uni iikin ki iiny c̱a/ mo mmo’tamkina uni ayi’c ḵa’bal i is mo dhali ayi’c mi mo, mmo/ii is ’teŋ gana/ mo, dhali mmoṯo’ckunu uni bwa ki mii ma ha’th’ko’d mo – 38Gom uni mo tani mony’cesh diki ha me’d mo. Uni takina c̱a/ mo e bwam ma si’b mo dhali e moŋ’kuwosha turga/ mo dhali eya risa jurum wosh mo dhali e jis ga/ gi mony’cesh mo be. 39Dhali aris uni gwansan mo, ba uni nyo/u ki nyo/ jin ’boro’d gom moŋgam gwo is buni mo tani uni ’koki bu’th to kun onu gwo is mo be. 40Haali/ Arumgimis p̱arki to e nṯwa/a/ mo jin ’boro’d ki ’bor gana/ mo gom ana mo ki uni minu ’taki ’koki dhu ki uni kun isin mo ki dar gi ana mo be.

will be added

X\