GALATHIYYA 4

1Gwo jin oka/ mo gom mal mo a’dihe/ be. Me’d jin tana a’di a’ci mo tani a’di jin midi ḵal mal mo diki bol mii jin tanu c̱iŋkina/ e ki ’bor mo, ba a’di ita a’di jin cila mali ’baar mo. 2Hili a’di diki’d mo e bwaŋ’kwariny imanhil a’di jin aṯẖa she/ mo dhali imandhu tom piti mo ntaga tee jin karkina com a’di mo be. 3Wakan gom ana mo. Ki ana takina uc̱i mo tani ana takina c̱iŋkina/ gi gwo ma bwa nyara/ gom gwoŋḵan gi mony’cesh yan mo. 4Hili ka tee p̱u’dki’d mo mmothimkunu a’di mo tani Arumgimis hashki Ya/m piti mo, a’di jin dhodhu ’pena ’bom mo dhali a’di jin dho’thkunu mo e bwaŋ’kwariny gwoŋḵan jin c̱inu mo be, mmowan uni gwansan ’ba/ mo, uni kun ’kokin mo e bwaŋ’kwariny gwoŋḵan jin c̱inu mo, 5wakan ki ana mina bu’th mo jin thip̱uwa thip̱ me’d iya/ mo be. 6Dhali haali/ um ta iya/ mo tani Arumgimis hashki Shi/in gi Ya/m piti eya dum bana mo mmocuu gwo mo ki: Abba. Ababa. 7Wakan eya Arumgimis mo tani um yisa ’koni mmo’ko mo mmota c̱iŋkina/ mo, hili um ta iya/ mo, dhali waḵki/ um ta iya/ mo tani um ta gi mal mo be. 8Kadhamo/ ki um ’koki mish Arumgimis mo tani um ’kokin mo ki mondeḵ is mo e moŋ’ko gi uni gun ’koki ta gi buyempa ma rum kun luŋu mo. 9Hili shwane/ mmop̱u’dkina um mo mmomisha Arumgimis mo tani, walla ki mii jin dhalu e i is mo ki um mishu ka Arumgimis mo tani um mini mish doḵ ka nyaŋ’ko’d kata mo e gwo ma bwa nyara/ gom gwoŋḵan gi mony’cesh gwansan kun ’ka’da is ki ’ka’d mo dhali kun hatha’ko’d ki ha’th kan mo? Um ona bwa mmota c̱iŋkinam buni mo doḵ/eya? 10Um ’kon mmodhuwa tee mo dhala ppe mo dhali yir jin aḵka’da aḵ mo dhali yil mo be. 11Aha/ ḵo/ka is mo ki aha/ miikina ṯu’c ap̱o/ um ki p̱e’th mo. 12Iwaḵa, aha/ yuḵa um mo, wayi e ki aha/ mo ma haali/ aha/ si’da/ wana e ki um mo. Um ’koki ṯẖuthaa/ mii mo be. 13Haali/ um mishkin mo ki mo jin ’ba’thka/ mo e buŋgwar is pem mo tani a’di c̱ikika/ um gwo gom gwom ’borga/ yani ṯwa/a/ mo be. 14Dhali ba mondim pem yin a’di ta mompal gom um mo tani um yisa ushi aha/ mo walla waḵ aha/ mo, hili um bu’thki aha/ mo me’da man’doyu gwo ma Arumgimis mo dhali me’da Ḵrisṯẖos jin ta’da Yesus mo be. 15Mane monṯem bum jin surki’d ki um mo be ’te/? Haali/ aha/ tana man/o gwo gom um mo ki um mini ’taki buḵ aha/ em bum ka pije/ mo dhali c̱iyu/ uni ki aha/ mo waḵki/ a’di mishu mii mo be. 16A/ki aha/ wara ka manta ’kup̱ gi um mmoṯorka/ um gwoŋ gana/ mo? 17Uni ta malgin ki malgin gom um mo, dhali hili yisa gom ’kup̱ miiŋ gana/ mo. Uni ona bwa mmomu’th um ’twa/ mo ’peni aha/ mo ki um mini ’taki ta malgin gom uni mo be. 18Haali/ gom ’kup̱ miim ’borga/ mo tani a’di ’boro’d mmoc̱i gwo maŋ ki shem ’boro’d mo isa yempa/ mo dhali yisa ki aha/ dikina nyaḵki um mo ’te/. 19Ushi uc̱im pema, aha/ shwana bwan dho’th mo doḵ/e ntaga Ḵrisṯẖos minu uḵ mo e um mo be. 20Aha/ ona bwayi mmo’taki di nyaḵki um mo ishunsan dhali aḵ ’twam pem e jin ṯorka/ gwo mo haali/ aha/ duŋkurkunuwa du is mo gom um mo be. 21Ṯori aha/ gwo mo ma, um gun ona bwa mmo’ko mo e bwaŋ’kwariny gwoŋḵan jin c̱inu mo. A/’kona um ki ciḵ gwoŋḵan jin c̱inu mowa? 22Haali/ me’d gwo jin ’kwarkunu mo ka: Ibrahiim ta gi iya/i su/ mo, jan ’de/ ta ji gi c̱iŋkina/ mo dhali jan ’de/ ta ji ma ’bom jin di’d ki ’kus mo be. 23Hili ya/ ma ’bom jin ta c̱iŋkina/ mo tani a’di dho’thkunu mo me’d isi gwo gom buŋgwar is mo dhali ya/ ’pena ’bom jin di ki ’kus mo tani a’di e gwo jin onu is mo be. 24Dhali a’di yansan ibe’dki gwo gi ’pemena kamu/ mo. Ki up̱ su/ gwansan ita gwo gun gamu me’d mo. Jan ’de/ ’peni Wosh Sinaa/ mo mmodho’th uc̱i gom miiny c̱iŋkina/ mo. Ayim jin ta’da Haagar mo be. 25Dhala Haagar a’di ta Wosh Sinaa/ e Pa Arabiyya mo. Ayim a’di nyaḵka’d ki Pa Urushaliim jin di’d shwane/ mo, haali/ a’di ta c̱iŋkina/ jin yolu nyaḵki uc̱i ma yim mo be. 26Dhali hili Urushaliim jin di’di momis mo tani a’di di ki ’kus mo dhala yim a’di ta’da ata’dam bana mo be. 27Haali/ me’d gwo jin ’kwarkunu mo ki: ’Kunyi bwa mo ma, ayy /en ’de/ yin jin tana burum mo jin diki dho’th mo. C̱eyi ’twa/ mo ma dhali cuuyi mo, /e jin dina bwa ma dho’th ki shwa mo. Haali/ ayim ma’du/ a’di ta’d gi uc̱i ki nyanye/ mo mmobola yim e, a’di jin ta’d ga kaṯẖ mo be. 28Dhali ana iwaḵ mo, wana e ga Is/hak mo mmota uc̱i gi gwo jin onu is mo be. 29Hili ki me’d c̱aan a’di jin dho’thkunu isi ki gwo gi buŋgwar is mo tani ṯo’cki a’di bwa mo a’di jin dho’thkunu mo isi ki gwo gi Shi/in mo. Dhali a’di wakan shwane/ mo be. 30Hili Gwo ma Arumgimis kun ’kwarkunu mo o gwo kataye? O ki ura yim c̱iŋkina/ ka pije/ mo dhali ya/ ma yim mo haali/ ya/ ’pena yim jin ta c̱iŋkina/ jin yolu mo tani a’di midi diki gam mal mo nyaḵki ya/ ma ’bom jin di ki ’kus mo be. 31Wakan iwaḵa, ana ’konaki ta uc̱i gi c̱iŋkina/ jin yolu mo, hili ana tana uc̱i ma ’bom jin di ki ’kus mo be.

will be added

X\