GALATHIYYA 3

1Ayy um ’Kwani gi Paŋ Galathiyya kun ta p̱us mo. Um gun ṯorkunuwa Yesus Ḵrisṯẖos eya tente/ mo ibwambori jis/em bum mo a’di jin ’koshkunu ki cwany’ciṯẖan dhul mo tani aja iceshki um ki en dhathu/ mo? 2Dhalki aha/ doṯa um jasi gwo gom gway yansan mo. A/ki um bu’thki Shi/in ki mii gi gwoŋḵan jin c̱inu mowa? Walla ki gwo jin ciḵkina um ki moŋgam gwo is mo? 3Ayy, um ’kona isi p̱usi mana? Mmoṯelkina um mii ’pen mo ki Shi/in mo, a/dhali um shwane/ daḵki ’kup̱ mo ki buŋgwar is mowa? 4A/ki gwo gi wana um kani bwa imiikina um aris to ki p̱e’th mo kana? — ba a’di ’te/ wari ka jiŋ gana/ ita jim p̱e’th mo. 5Dhali a’di si’da/ jin thip̱ki’da thip̱ ki Shi/in e um mo dhali mii miimer e bwam um mo tani a/a’di ki mii a’di ki gwoŋḵan jin c̱inu mo walla ki gwo jin ciḵu ki moŋgam gwo is mo? 6Wakan a/Ibrahiim gamki’da Arumgimis gwo is mo, dhali a’di karkunu mo gom a’di ki mo ma ḵar/e mo. 7Wakan um mini hil mii i e ki a’di ta mii gi ’kwani gi moŋgam gwo is mo kun ta iya/ ma Ibrahiim mo be. 8Dhali Gwo ma Arumgimis kun ’kwarkunu mo, mmonyiṯẖkina a’di nṯwa/a/ mo ka Arumgimis midi dhu ’kwani kun ’koki ta ’Kwani Yahuuda/ ki mo ma ḵar/e ki moŋgam gwo is mo tani a’di c̱iki gwo ki gwom ’borga/ nṯwa/a/ ka Ibrahiim mo mmo/o gwo mo ki: E /e mo tani aris kal gi ’kwaniny’ceshi ’baar mo tani minu ’bor mii mo be. 9Wakan mo, ’kwani gwansan kun ta ku gi gami gwo is mo tani uni ’boru mii mo nyaḵka Ibrahiim mo a’di jin ta’d gi moŋgam gwo is mo be. 10Haali/ aris uni ’baar mo kun ’ko ’ko’d e mii gi gwoŋḵan jin c̱inu mo tani uni ’kon e bwaŋ’kwariny monyjee mo. Haali/ a’di ’kwarkunu mo ki: Monyjee midi di mo goma ris ’kwani ’baar ka ’deṯe/ ’deṯe/ mo, uni gun ’koki ’ko ’ko’d eya ris to ’baar mo kun ’kwarkunu mo e gwoŋḵan jin c̱inu mo dhali mii uni mo be. 11Dhali a’di di’d eya tente/ be ki wathi/ en’thiŋ kamu/ yisa di’da jin minu kar ki mo ma ḵar/e mo ibwambor ma Arumgimis ki gwoŋḵan jin c̱inu mo. Haali/ a’di ’kwarkunu mo ki: A’di jin karu ki mo ma ḵar/e ki moŋgam gwo is mo tani a’di midi di ki e mo be. 12Hili gwoŋḵan jin c̱inu mo tani diki di ap̱o/ mo jin gamu gwo is mo, haali/ gwo ’kwarkunu mo ki: A’di jin mii uni mo tani a’di midi di ’ko’di uni mo be. 13AḴrisṯẖos a’di wanki ana ’ba/ mo ’peni monyjee gi gwoŋḵan jin c̱inu mo mmowarkina a’di ki monyjee gom ana mo — haali/ a’di ’kwarkunu mo ki: Monyjee midi di goma ris ’kwani ’baar ka ’deṯe/ ’deṯe/ mo, uni kun shirki is buni ap̱o/ cwa mo — 14Ki eya Ḵrisṯẖos jin ta’da Yesus mo tani mo jin ’boruwa Ibrahiim mii mo midi ’taki p̱u’du/ ap̱o/ ’kwani kun ’koki ta ’Kwani Yahuuda/ mo ki ana mina ’taki bu’th gwo jin onu is mo gom Shi/in e moŋgam gwo is mo be. 15Aha/ mina c̱i um mii gi wathi/ en’thi/ gom she/mm mii mo, iwaḵ mo. Wathiŋ kamu/ yisa di’da jin midi p̱uu gwo gom mal gi wathi/ mo walla mar gwom piti is mo ’ko’di a’di ṯekunu shoka ’cesh mo. 16Dhali gwo kun okunu is mo dhukunu mo goma Ibrahiim mo dhali gom emen piti mo. A’di diki o gwo mo ki: Dhali e emen piti mo, mmo/o gwo goma ris mo. Hili mmo/o gwo mo gom a’din ’de/ mo ki: Dhali gom emen pini mo, a’di jin ta’da Ḵrisṯẖos mo be. 17A’di ta ’pemen gwo jin oka/ mo. Ki gwoŋḵan jin c̱inu mo jin p̱u’dki’d ki yil kun ’koni iss ’kwanimpa i/iss ’de/ i’ce’dki iss ’de/ i’ce’dka ’kume’da p̱o/ mo ŋ’ko’d mo tani a’di diki kar gwo mmop̱uu mo, gwo jin gamu me’d mo ’thissa/, a’di jin ṯen ma Arumgimis shoka ’cesh mo. Wakan ki gwo jin onu is mo minu kar ki jim p̱uu mo be. 18Haali/ waḵki/ mal ta ji gi gwoŋḵan jin c̱inu mo tani a’di yisa di mo ’ko’di gwo jin onu is mo, hili Arumgimis ki c̱i a’di ka Ibrahiim ki gwo jin onu is mo be. 19Kata c̱inu gwoŋḵan jin c̱inuye? A’di karkunuwa p̱o/ mo gom gwon dhaŋ mo ntagi emen midi ’taki p̱u’du/ mo e a’di jin okunu gwo is mo. Dhali a’di karkunu ’pen ka pije/ mo ki iman’doyu gwo mo ki a’di jin doshki’di bwaman mo mmowoṯẖa/ woṯẖ mo. 20Dhali a’di jin doshki’d e bwaman mo mmowoṯẖa/ woṯẖ mo tani a’di diki ta ’pemen mmodi jasi ’de/ mo. Hili Arumgimis a’di ṯal ’de/ mo be. 21A/dhali gwoŋḵan jin c̱inu mo a’di di’da p̱o/ gwo jin on ma Arumgimis is mowa? Dhalku/ ki ṯosh kan mo. Haali/ waḵki/ gwoŋḵan jin c̱inu mo minu ’taki c̱i mo mmokar mo jin ’konu ki e mo tani yan’ko’d mo ma ḵar/e midi ’taki di mo ka jiŋ ganayi ki gwoŋḵan jin c̱inu mo be. 22Hili Gwo jin ’kwarkunu mo tani tulki’da ris to ’baar mo ’twa/ mo e miinthus mo, ki gwo jin onu is mo e moŋgam gwo is eya Yesus Ḵrisṯẖos mo tani minu ’taki c̱iki uni gwansan kun gami gwo is mo be. 23Dhali nṯwa/a/ ki moŋgam gwo is diki p̱u’d mo tani ana ’kokunu mo mmohem mo e bwaŋ’kwariny gwoŋḵan jin c̱inu mo, mmodhukunu ana e bwaŋ’kwariny mo jin ’tashuwa ’tash ’twa/ mo ntagi moŋgam gwo is minu ṯor eya tente/ mo be. 24Wakan gwoŋḵan jin c̱inu mo tani a’di ta’da mansus bana mo ntaga Ḵrisṯẖos p̱u’dki’d mo, ki ana minu dhu ki mo ma ḵar/e ki moŋgam gwo is mo be. 25Hili shwane/ moŋgam gwo is a’di p̱u’dki’d mo, i/ana doḵ/e yisa i’kona mmo’ko mo e bwaŋ’kwariny a’di jin suski’da sus mo 26haali/ eya Ḵrisṯẖos jin ta’da Yesus mo tani umi ’baar mo ta iya/ ma Arumgimis mo ki moŋgam gwo is mo be. 27Haali/ aris umi ’baar mo kun miikunu ki yi’de/ mo eya Ḵrisṯẖos mo tani hi’thkina Ḵrisṯẖos i’ba/ mo be. 28Wakan walla Wathi/ Yahuuda/ yisa di’da walla Wathiŋ Griḵi mo, walla wathi/ jin ta c̱iŋkina/ jin yolu mo yisa di’da walla moŋ’ko ki ’kus mo, walla kun tana gwaṯẖ yisa di’da walla iyima ’bomi mo. Haali/ umi ’baar mo ṯal ’de/ mo eya Ḵrisṯẖos jin ta’da Yesus mo be. 29Dhali waḵki/ um ta ku ma Ḵrisṯẖos mo tani um ta emen ma Ibrahiim mo, mmota gi mal isi ki gwo jin onu is mo be.

will be added

X\