GALATHIYYA 2

1Dhali yan’ko’d ’ko’di yili ’kume’d i’ce’dka doŋon mo tani aha/ yakina ka gagamis mo doḵ/e e Pa Urushaliim mo nyaḵka Barnaaba mo mmosusa Tiithus nyaḵki aha/ mo be. 2Aha/ yakina mo ki gwo jin ’ceenu mo, dhali aha/ karkina a’di ibwambori uni mo (hili ki kup̱ mo e bwambori uni gwansan kun dhunu ki uni gun tana shu/um bway mo) gom gwom ’borga/ mo a’di jin c̱ika/ mo e bwaman ’kwani kun ’koki ta ’Kwani Yahuuda/ mo, isi ciki/ ki aha/ mina ’taki gus mo walla ki aha/ guskina ’te/ ki p̱e’th mo. 3Hili isi kani aTiithus a’di jin nyaḵki ya ki aha/ mo, a’di yisa ṯucu mo mmo’ciṯẖa/ munyjal yis piti mo, ba a’di ta Wathiŋ Griḵi mo be. 4Hili haali/ gom iwaḵ kun ta thus mo kun susu mo ibwaman mo ki kup̱ mo tani uni kun hurki bwaman mo mmo’kar mom bam jin ’kona am ki ’kus e mo, a’di jin takina aman eya Ḵrisṯẖos jin ta’da Yesus mo, ki uni mini ’taki sus am e mo jin deḵuwa deḵ mo be. 5E uni mo tani aman ’konaki dhas is bam bway mo isi kan gom ari mo mo, ki gwoŋ gana/ gi gwom ’borga/ minu dhu mo gom um mo be. 6Dhali ’peni uni gwansan si’da/ kun onu ki uni tana shu/um bway mo gom toŋ kamu/ mo (A’di jin tana uni mo tani midi diki mii toŋ kamu/ gom aha/ mo. Arumgimis diki ṯor mii ma gwar ’de/ mo). Uni gwansan, aha/ ona gwo mo, e uni kun onu ki uni tana shu/um bway mo tani mini ’koki mar toŋ kamu/ is gom aha/ mo be. 7Hili ki gwony c̱a’ckon mo, ki uni p̱arki mii e mo ki aha/ karkunu mo mmoc̱i gwom ’borga/ ki ’kwani kun ’kon ka munyjal yisi e mo me’d jin karkunu aBuṯerus mo mmota amanc̱i gwom ’borga/ gom uni gun ’ciṯẖuwa munyjal yis mo be. 8(Haali/ a’di jin miiki’da ṯu’c mo ka Buṯerus mo gom gwo gi hashu mo e uni gun ’ciṯẖuwa munyjal yis mo tani miiki’da ṯu’c mo e aha/ si’da/ mo gom ’kwani kun ’koki ta ’Kwani Yahuuda/ mo. ) 9Dhali ki uni nyiṯẖkina ’the jin c̱ikunu aha/ mo tani aYakuub dhala Sap̱a dhala Yohaan uni gun onu ki uni tana atiŋkiliŋ mo tani c̱iki aha/ bway mo dhala Barnaaba mo abim poros gi mmonyaḵ to mii mo, ki aman mina ’taki ii mo e ’kwani kun ’koki ta ’Kwani Yahuuda/ mo, dhali uni e ’kwani kun ’ciṯẖuwa munyjal yis mo be. 10Jasi uni ona bwayi ki aman mina ka uni gun hatha’ko’d e mo, a’di jin ta to yan gana/ jin gananka/ ’ba/ mo ka daran du mo mmomii mo be. 11Hili ka Sap̱a p̱u’dki’d mo e Pa Anthaakiya mo tani aha/ ceshkina a’di mo ka ḵarambuye/ mo ki jis/em piti mo haali/ a’di doshki’d mo mmowaḵkunu a’di mo be. 12Haali/ nṯwa/a/ mo, ki ’kwanin tiya p̱u’dkin mo ’pena Yakuub mo tani a’di nyaḵki to shwa ki ’kwani kun ’koki ta ’Kwani Yahuuda/ mo. Hili ki uni p̱u’dkin mo tani a’di guki is piti ka nyaŋ’ko’d mo dhali ḵwa/ is piti bwa mo mmoḵo/kina a’di ’kwani kun ’ciṯẖuwa munyjal yis mo be. 13Dhali nyaḵki a’di mo tani ’Kwani Yahuudan tiya kun boc̱kin mo tani nyaḵki mii yan mii mo ki mii washila/ mo. Wakan ka Barnaaba si’da/ a’di ḵalkunu shoki mis ki miim buni jin miikina uni ki washila/ mo be. 14Hili ki aha/ mishkina ki uni ’konuki dosh ka ji sho’k mo gom gwoŋ gana/ gi gwom ’borga/ yan mo tani aha/ okina Sap̱a ibwambori uni ’baar mo ki: Waḵki e ba ta ji Yahuuda/ mo tani dhali diki mii me’d wathi/ jin diki ta Wathi/ Yahuuda/ mo tani dhali diki mii me’d Wathi/ Yahuuda/ mo tani /e mini mish ’kwani kun ’koki ta ’Kwani Yahuuda/ dhu me’d ’Kwani Yahuuda/ kata mo? 15Ana ki is bana ana kun tana ’Kwani Yahuuda/ ka dho’th mo dhali yisa ’kwani kun ’koki ta ’Kwani Yahuuda/ kun ta imanmii miinthus mo, 16dhali ana gun misha mo mo ki wathi/ dinuki kar ki mo ma ḵar/e ki mii gi gwoŋḵan jin c̱inu mo, hili ki moŋgam gwo is eya Yesus Ḵrisṯẖos mo, isi kani ana gamkina gwo is eya Ḵrisṯẖos jin ta’da Yesus mo. Ki mii gi wakan mo mmodhuwa dhu ki mo ma ḵar/e mo ki moŋgam gwo is eya Ḵrisṯẖos mo dhali yisa ki mii gi gwoŋḵan jin c̱inu mo haali/ ki mii gi gwoŋḵan jin c̱inu mo tani jan ṯal ’deŋ kamu/ yisa di’da jin minu kar ki mo ma ḵar/e mo be. 17Hili waḵki/ miim bana jin pala ana ki ana minu dhu ki mo ma ḵar/e eya Ḵrisṯẖos mo tani ana ki is bana minu gam mo ki ana tana imanmii miinthus mo a/aḴrisṯẖos a’di karu mo mmomii miinthusa? Dhalku/ ki ṯosh kan mo. 18Hili waḵki/ aha/ ki nyaŋ to gwansan is doḵ/e mo, uni gun ’tuḵka/ mo tani yan’ko’d aha/ nyo/a is pem mo ka mandhaŋ gwo mo be. 19Haali/ ki gwoŋḵan jin c̱inu mo tani aha/ wuna mo e gwoŋḵan jin c̱inu mo ki aha/ mina di mo goma Arumgimis mo be. 20Aha/ nyaḵkunu ’kosh ki cwany’ciṯẖan dhul nyaḵka Ḵrisṯẖos mo. Dhali a’di yisa ta aha/ jin dina ki eya, hili aḴrisṯẖos a’di jin diki’d ki e e aha/ mo. Dhali mondiki/e jin dika/ ki e e buŋgwar is mo shwane/ tani aha/ dina ki e ki moŋgam gwo is mo e Ya/ ma Arumgimis mo, a’di jin enki aha/ mo dhali c̱i is piti mo gom aha/ mo be. 21Aha/ dinaki p̱uuwa ’the ma Arumgimis mo. Haali/ waḵki/ mo jin dhunuwa dhu ka ḵar/e diki’d mo e gwoŋḵan jin c̱inu mo tani, kan, Ḵrisṯẖos wuki’d mo ki dar gi ’kup̱ miiŋ gana/ mo be.

will be added

X\