KULUUSI 2

1Haali/ aha/ ona bwa ki um mini mish mo mo ka dhan mii jin picirkika/ mo gom um mo dhali uni gwansan kun ’kon mo e Pa Lawudikiyya mo dhali goma ris uni ’baar mo kun ’koki p̱ar jis/em pem e mo 2ka dum buni minu ’taki ’bi’th is mo me’d jin re’dkunu uni mo mmonṯal ’de/ mo e mo/en mo, mmota ga ris mo kun tanu pa ki pa mo gi momish mo mo ’pena duŋ gana/ mo dhali monyiṯẖa/ Arumgimis gwom bag yan mo a’di jin ta’da Ḵrisṯẖos mo. 3E a’di mo tani aris moyuḵ kun ishki ḵumma/ mo dhali mo jin nyiṯẖuwa nyiṯẖ mo be. 4Aha/ ona gwo yansan mo wakan ki wathin ṯal ’deŋ kamu/ midi ’taki diki he’k um e mo ki gwo ma maḵ jin onu mo. 5Ba aha/ p̱ina e buŋgwar is mo tani hili aha/ dina e um ki shi/in mo, mmo’kuny bwa mo mmop̱ar miim ’boron bum kun miina um ka p̱ara p̱o/ e mo dhali mom bum jin ṯela um sho’k mo ki moŋgam gwo is bum eya Ḵrisṯẖos mo be. 6Wakan, me’d jin bu’thkina uma Ḵrisṯẖos jin ta’da Yesus jin ta Tap̱a mo tani wakan ’koyi e a’di mo, 7mmotana um ka birman mo e a’di mo dhali mmonyaŋa um is mo e a’di mo dhali mmoṯela um sho’k mo e moŋgam gwo is mo, jasi me’d gwo jin ṯorkunu um mo, mmoso ki sho’k bum e mo jin ’boruwa ’bor bwa i is mo be. 8Jiyi mo ki e ki ’bore/ mo ki wathin ṯal ’deŋ kamu/ midi diki ’kwar um ka gwap̱i/ mo ki gwoŋ ’kwaniŋ gaŋgasha/ mo dhali ki gwo kun hekuwa he’k e kun ’ko bwa ’te/ mo, isi ki gwoŋ ’kwani en’thin dhamo/ mo kun luḵu mo, isi ki gwo ma bwa nyara/ gom gwoŋḵan gi mony’cesh yan mo, dhali yisa isi ki gwo ma Ḵrisṯẖos mo. 9Haali/ e a’di mo tani mon’tu’d ka ’bimpil mo jin ta ji ma Arumgimis mo mmotana a’di Arumgimis mo tani c̱a’bki’d e buŋgwar is piti mo. 10Dhali um p̱u’dkin mo mmo’tu’da/ ’tu’d mo e mondiki/em piti mo, a’di jin ta’da ’kaŋ’kup̱ goma ris montap̱a kun tanu mo dhala ris moshirr mo be. 11Dhali e a’di mo si’da/ um ’kokunu mo mmo’ciṯẖa/ munyjal yis mo ka munyjal yis jin ’ciṯẖu/ ki dar gi me’d mo, ki mii jin dhalu buŋgwar is gi shuman is ’pen mo e mo ma munyjal yis jin ’ciṯẖu/ jin ta ji ma Ḵrisṯẖos mo. 12Dhali um ’kokunu mo mmokan mo nyaḵki a’di mo e mo jin cuc̱uwa cuc̱ mo dhali e mii jin ’kokunu mmocu um mis mo si’da/ nyaḵki a’di e moŋgam gwo is mo e mo/um ma Arumgimis mo, a’di jin ’de’kki a’di mo ’peni mowu mo be. 13Dhali um, um kun ’kokin mo mmowu mo e gwon dhaŋ mo dhali e mo ma munyjal yis bum jin ’konuki ’ciṯẖ um mo e shuman is bum mo tani Arumgimis a’di ki dhu ki e mmonṯal ’de/ nyaḵki a’di mo, mmodhalkina a’di ana aris gwon dhaŋ bana ’pen mo, 14mmo’koshkina a’di gwo jin ’kwarkunu mo jin diki’da p̱o/ ana mo, a’di jin theke’thki’da theke’th mo gom gwoŋḵan mo be. A’di yansan idhalkina a’di ka p̱o/ mo, mmoṯelkina a’di a’di ka musmaar mo ap̱o/ cwany’ciṯẖan dhul mo. 15A’di dininki mom’bi’th kun molu gadhir she/ mo dhali mom’bi’th mo, dhali a’di ki ṯor uni eya tente/ mo jin mina uni ta she/mm mo mmop̱ikina a’di uni e ki mii mo be. 16Wakan dhalki wathin ṯal ’deŋ kamu/ ki dhal bway mo mmokar gwo waḵ ap̱o/ um mo e gwo jin doṯuwa doṯ mo gom tonṯe/ mo dhali tomp̱i mo walla gom mo ma yuḵ jin yuḵu ka tul ’kup̱ mo walla goma appen this mo walla goma cim ma pesu/ mo. 17Uni gwansan ta jasa ḵashira/ gom to kun mini p̱u’du/ mo, hili buŋgwar is gi mii mo tani uni ta ku ma Ḵrisṯẖos mo be. 18Dhalku/ ki dhal wathin ’deŋ kamu/ bway mo mmoṯẖu’th um thum mo, mmodi’b um is mo mmowu is ka ’cesh mo dhali luŋ iman’doyu gwo mo, mmodoshkina a’di ap̱o/ tonyjan piti mo, mmose mo ki ’pura/ ’pura/ ki dar gi ’kup̱ mii mo ki bwa gi buŋgwar is ’te/ mo. 19Dhali yisa mmoṯela a’di e a’di jin ta’da ’Kaŋ’kup̱ mo. ’Peni a’di mo tani buŋgwar is ka ’bimpil thip̱ki’da thip̱ mo dhali re’di monṯal ’de/ ki mom piti gun gamu is mo dhala billa/ mo mmo’twaḵ mo ki mon’twaḵ jin di’d ’peni Arumgimis mo be. 20Waḵki/ um wukin mo nyaḵka Ḵrisṯẖos mo gom gwo ma bwa nyara/ gom gwoŋḵan gi mony’cesh yan mo tani gomatinta ’kokina um ki moŋ’ko mo jin cila ’kwaniny’cesh mo? Atinta ’dap̱kina um ’twa/ mo ki gwoŋḵan jin ’tashuwa ’tash bway mo? 21Uni gun o gwo mo ki: Dhalku/ to ki bu’th is ki me’d mo. Dhali, Dhalku/ to ki nyoḵ mo. Dhali, Dhalku/ to ki ta is ki me’d mo. 22(Uni ta to gwansani ’baar mo kun minu ’ce’d sho’k mo mmomii uni mo), isi ki gwoŋḵan gi ’kwani en’thi/ mo dhali gwo kun ṯoru mo? 23Uni gwansan ka jiŋ gana/ miikunu ’pena p̱or ma pije/ mo mmoshusha du mo gom mii ma gayiin jin ta’da teṯeŋ gana/ mo dhali mo jin wunu is ka ’cesh mo dhali diki ’tash buŋgwar is ’twa/ mo, hili uni ’koki ta to gun ’bitha she/ ki ’bi’th mo mmonona non mo ’peni mii gi buŋgwar is jin din ma du ki ’thup̱ mo.

will be added

X\