Mii Gun Minu Mo 23

1Dhala Buulus mmohilkina a’di ap̱o/ montul is yan ka ’thime/ mo tani a’di o gwo mo ki: Iwaḵ pema aha/ tana jany ’cesh gi bampa/ ibwambor ma Arumgimis mo e mii ’baar mo kun ta isi bwaŋ gana/ ntaga tee yan mo be. 2Dhala gasiis jin ca’d jin ta’da Hananiyya ḵanki uni kun doshkin ki ’dishe/ i a’di gwo mo mmodor a’di ’twa/ ki me’d mo. 3Ŋ’ko’d aBuulus oki a’di gwo mo ki: Arumgimis midi dor /e mo, /e jin tana gaŋgara/, jin kushu mo e mis ’te/ kan mo dhali /e ki c̱a’b mmodwall aha/ gwo mowa gom gwoŋḵan jin c̱inu mo dhali /e ki ḵan gwo ki aha/ minu dor mo ki gwoŋḵan jin c̱inu mo jin ’ce’du ’pen ’te/ mo? 4Dhali uni gun doshkin ki ’dishe/ mo tani oki a’di gwo mo ki: /E sorkina gasiis jin ca’d ma Arumgimis mo kana? 5Dhala Buulus ki o gwo mo ki: Aha/ dinaki mish, iwaḵ pem mo, ki a’di ta’da gasiis jin ca’d mo be, haali/ a’di ’kwarkunu mo ki: /E mini dhalku/ ki o gwon thus gom tap̱aŋ ’kwanim pini mo. 6Hili ka Buulus nyiṯẖki’d ki ’bana ’de/ ta ji gi ’Kwani Sadukiyiin mo dhali ’bana kamu/ ta ji gi ’Kwani P̱arisiyiin mo tani a’di cuuki’d mo e montul is yan mo ki: Iwaḵ pema aha/ tana Wathim P̱arisi mo jin ta ya/ gi ’Kwani P̱arisiyiin mo be dhali gom mo jin tanu ga ’teŋ kap̱e/ mo dhali gom mompinu ’peni mowu mo tani aha/ yuḵkunu mo gom gwondoṯ yan mo. 7Dhali ki a’di oki gwo kan mo tani mo jin walkunuwa wal piki’d e bwaŋ ’Kwani P̱arisiyiin mo dhali ’Kwani Sadukiyiin mo dhali montul is yan ḵwa/kunu bwa mo be. 8Haali/ ’Kwani Sadukiyiin oki gwo mo ki mo jin pinu yisa di’da walla man’doyu gwo mo walla shi/in mo, hili ’Kwani P̱arisiyiin si’da/ ṯor gwo gom mompinu mo dhala man’doyu gwo mo dhali shi/in mo. 9Dhala dhan cuuwa/ piki’d mo dhali iman’kwar ton tiya kun ta kum ’ban gi ’Kwani P̱arisiyiin doshkin ki mis mo dhali di’bki gwo is mo mmo/o gwo mo ki: Am yisa gama tonthusa kamu/ e wathi/ yansan yisa. Atinta waḵki/ shi/in oki gwo e a’di mo walla man’doyu gwo mo? 10Dhali ki mo jin walkunuwa wal jin caaca piki’d mo tani amancil ma askar alip̱ mmoḵo/kina a’di is goma Buulus jin mina uni ’taki ḵwa/ a’di is bwa ka ’ci’cimi’th mo tani a’di ḵanki’da askar gwo mo mmo/ii ka ’cesh mo dhali bu’th a’di ’peni bwam uni ki ḵwap̱ mo dhali mmosus a’di e gu’b gi i/askar mo be. 11Dhali ki mon’thiny jin baṯẖki’d mo tani Tap̱a doshki’d ki ’dishe/ i a’di mo dhali oki gwo mo ki: Budhi aduŋ gana/ mo ma haali/ me’d jin ṯorkina /e gwonṯor gom aha/ e Pa Urushaliim mo tani wakan si’da e mini mii c̱i gwonṯor gom aha/ si’da/ e Pa Ruumiya mo. 12Dhali ki mo ta montee mo tani ’Kwani Yahuuda/ gamki bwa me’d mo imonṯal ’de/ mo dhali deḵki is buni ki gwo jin gama uni me’d mo mmo/o gwo mo ki uni mini ’koki shwa to mo walla ’koki p̱i to mo ntagi uni mini ’taki ’kosha Buulus jwa mo be. 13Dhali uni ’kokin ki nyanye/ ki issu/ mo kun miikina wu’th yan mo. 14Dhali uni p̱u’dkin e igasiis kun can mo dhali ’kwaniŋ gwanyjaḵa/ mo dhali o gwo mo ki: Aman deḵkina is bam ki gwo jin gamu me’d mo jin onu is mo mmo’koki nyoḵ toŋ kamu/ mo ntagi aman mina ’kosha Buulus jwa mo. 15Dhali shwane/ miiyi um gwo eya tente/ ka mancil ma askar alip̱ ki a’di midi susi a’di ka ’ceshi um mo me’d jin mina umi dwall gwo gom a’di ka ji sho’k ki nyanye/ mo. Dhali aman nṯwa/a/ ki a’di midi ’dishu mo tani aman mina thoson is mo mmo’kosh a’di mo. 16Hili ya/ gi ’bwah ma Buulus ciḵki gwo ki uni ishkin ki jim bag mo mmoc̱or a’di mo tani a’di guski ce mo dhali cic̱ mo e gu’b gi i/askar mo dhali ṯorka Buulus gwo mo be. 17Dhala Buulus yuḵki jan ṯal ’de/ e a’di mo ’peni imancil ma askar iss ’kwanim pa imudhe’d mo dhali oki gwo mo ki: Susi washan dhuru’c yan eya mancil ma askar alip̱ mo ma haali/ a’di ta gi toŋ kamu/ mmoṯor a’di mo. 18Wakan a’di bu’th a’di mo dhali sus a’di eya mancil ma askar alip̱ mo dhali o gwo mo ki: ABuulus jin ta’da habuus yuḵki aha/ i a’di mo dhali doṯki aha/ gwo mo mmosus wathin dhuru’c yan i /e mo jin ta gi toŋ kamu/ mmo/o /e mo. 19Dhala mancil ma askar alip̱ bu’th a’di ki me’d mo dhali thoṯẖ mo mmodoṯ a’di gwo mo ka ’di/ mo ki: Atinta a’di jin mina /e iṯor aha/ gwo mo? 20Dhali a’di o gwo mo ki: ’Kwani Yahuuda/ gamki gwo me’d mo mmodoṯ /e mmosusa Buulus ka ’cesh ka’thamo/ e montul is yan me’d jin mina /e ’taki ṯirrish gwo ka ji sho’k ki nyanye/ ari’ceenne/ gom a’di mo. 21A’di mina /e dhalku/ ki ha gwom buni e mo. Haali/ ’kwaniŋ gwas ’kon ki nyanye/ ki issu/ mo kun ishkin ki jim bag mo mmoc̱or a’di ’peni uni gun deḵki is buni mo ki gwo jin gamu me’d mo jin onu is mo mmo’koki shwa to mo walla mmo’koki p̱i to si’da/ mo ntagi uni mini ’kosh a’di jwa mo dhali shwane/ uni ’kon mmothoson is mo mmohil ’kup̱ ki gwo jin mina /e o is gom a’di mo. 22Wakan amancil ma askar alip̱ dhal dhuru’c wathi/ bway mo mmoya mo mmoḵan a’di gwo mo ki: Dhalki wathiŋ kamu/ gwo ki ṯor ki /e mii to gwansan eya tente/ gom aha/ mo. 23Dhali a’di yuḵki uni su/ i a’di kun tana imancil ma askar iss ’kwanim pa imudhe’d mo dhali o uni gwo mo ki: Thosoni i/askar iss ’kwanimpa i’kume’d is mo ma mmo/ii ntagi Paŋ Kaysariyya mo dhali ’kwani gun ta ku gi shumarum issi kwara i’ce’dka ’kume’d mo dhali ’kwani kun ta ku ma mee iss ’kwanimpa i’kume’d mo ka tente/ pedoŋon jin ta mon’thiny mo 24dhali a’di ḵanki uni gwo mo mmothoson to/e kun meruwa p̱o/ mo jin mina uni ’taki kara Buulusa p̱o/ a’di mo dhali mmosus a’di ki ’dantar eya P̱iliks jin ta’da mudhiir mo. 25Dhali a’di ’kwarki gwowa warka/ jin wana she/mm cikise/ mo ki: 26Kuludiyuus Lisiyaas eya mudhiir jin ta jim ’borga/ jin ta’da P̱iliks ki gwon the me’d mo. 27Wathi/ yan bu’thkina ’Kwani Yahuuda/ mo dhali murkina uni ’taki ’kosh jwa mo me’d jin p̱u’dkika/ ap̱o/ uni mo dhali aha/ woṯẖkina a’di mo nyaḵki i/askar mo mmoda/arka/ gwo mo ki a’di ta jim Pa Ruumiya mo. 28Dhali mmoŋap̱ga/ gwo mmomish ’ban mo gom mo jin yera uni a’di is ki gway mo tani aha/ suskina a’di ka ’ceshi montul is buni yan mo. 29Dhali aha/ gamkina gwo mo mmoyeru a’di is ki gway mo gom gwondoṯ gom gwoŋḵan buni jin c̱inu mo hili mmodara a’di ki toŋ kamu/ jin yeru a’di is ki gway jin mina a’di gam ’pemen jin ta ji gi wu mo walla jin ta ji gi mondeḵ si’da/ mo. 30Dhali ki a’di ṯorkunu aha/ mo ka wu’th di’da p̱o/ wathi/ yan mo tani aha/ hashkina a’di i /e ise/ mo mmoḵanki uni gwo mo uni kun yer a’di is ki gway si’da/ mo mmo/o gwowa p̱o/ a’di ibwambori /e mo. 31Wakan si’da/ i/askar me’d jin ḵankunu uni gwo mo tani uni bu’thkina Buulus mo dhali sus a’di ki mo ta mon’thiny mo e Pa Anṯibaṯriis mo. 32Hili ka cim jiŋ ’ko’d mo tani uni dhalki ’kwani gun ta ku shumarum bway mo mmo/ii mo nyaḵki a’di mo dhali mmodoḵ ka nyaŋ’ko’d e gu’b gi i/askar mo. 33Dhali uni, ki uni p̱u’dkin mo e Paŋ Kaysariyya mo dhali c̱ika warka/ eya mudhiir mo tani uni ṯorkina Buulus si’da/ e bwambori a’di mo be. 34Dhali ki a’di deŋki gwo e mo tani a’di doṯki a’di gwo mo ki /e ta jany cur jana mo, dhali ki a’di mishki gwo ’ban ki a’di ta ji Paŋ Kilikiyya mo tani 35a’di o gwo mo ki: Aha/ mina ciḵ gwo ’peni /e ki dhegem mo ki uni gwansan gun yer /e is ki gway si’da/ mini p̱u’du/ mo. Dhali a’di ḵanki gwo ki a’di minu kar e gu’b ma mudhiir jin ta ji ma Hirodus mo.

will be added

X\