Mii Gun Minu Mo 19

1Dhali a’di warki’d mo ki mo jin dikin ma Abulluus mo e Paŋ Kurinṯẖuus naskina/ mo aBuulus mmopena a’di ki tur mo e bampa/ jin di’d ’kup ki mis mo tani a’di p̱u’dki’d e Pan Ep̱asus mo dhali gamki imanciḵ gwon tiya mo. 2Dhali a’di oki uni gwo mo ki: Shi/in Dheleladhelel bu’thkina um mo me’dyin jin gamkina um gwo is mo ’taa? Dhali uni oki a’di gwo mo ki: Yisa. Am ’konaki ciḵ gwo ki sule/ waḵki/ Shi/in Dheleladhelel c̱ikunu mo be. 3Dhali a’di o gwo mo ki: Um miikunu ki mo jin miinuwa mii ki yi’de/ katinta kan si’da/ mo? Dhali uni ki o gwo mo ki: Ki mo jin miin ma Yohaana mii ki yi’de/ mo be. 4Dhala Buulus ki o gwo mo ki: aYohaan miiki’da mii jin miinuwa mii ki yi’de/ ki mo jin minu rica du is mo mmo/o ’kwani gwo jin mina uni ’taki gam a’di gwo is jin midi ’taki yayu i’ko’di a’di mo a’di yan jin ta’da Yesus mo. 5Dhali ki uni ciḵki gwo yan mo tani uni miikunu ki yi’de/ e gway gi Tap̱a Yesus mo. 6Dhali ka Buulus dhuki me’d piti ap̱o/ uni mo tani Shi/in Dheleladhelel yayi’di uni mo dhali uni wal ’twan tiya mo dhali c̱i gwo is mo be. 7Dhali uni ’baar kun ’kon mo tani uni wana e ki ’kwani kun tana ’kume’d i’ce’dka su/ mo be. 8Dhali a’di seki’d e gu’b gi montul is mo dhali c̱i gwo ki dar gi monyju/ mo ka ppe ’kup̱i kwara mo mmoṯora ṯor ka ḵarambuye/ mo dhali mmomalasa malas ki gwo mo gom to gi Bampa/ ma Arumgimis mo. 9Hili ki kun tiya ’bi’thkunuwa du is mo dhali ushki gwo gam is mo dhali mmo/okina uni gwon thus gom gwo gi Bway yan ibwambor ma waambuhany ’kwani mo tani a’dim Buulus yaki’d ’peni uni mo dhali a’di ḵwa/ki imanciḵ gwo mo mmodhu uni ki she/ mo mmoṯora ṯor ka ḵarambuye/ ka yempa/ e mombuṯ e Pan Ṯiraannus mo be. 10Dhali mii yan miikunu ki sule/ ki sule/ mo jin ta yil su/ mo be. Gom a’di ki mii yan kan mo tani a’di ciḵkin ma ris uni kun ’koni Pa Asiyya gwon Tap̱a mo dhali kun ta ’Kwani Yahuuda/ mo dhali ’Kwaniŋ Griḵi si’da/ mo be. 11Dhali Arumgimis miiki miimer jin ta ji mum ki me’d ma Buulus mo. 12Gom a’di ki mii yan kan mo tani a’di ’dona uni burrinyeny jiṯi/ mo walla burrinyen ṯu’c ’peni is piti e uni kun ’bathan mo dhali mom’ba’th iikin mo ’peni uni mo dhala rum thus kun nyo/on iikin ka pije/ mo be. 13Hili si’da/ kun tiya ’peni ’Kwani Yahuuda/ kun tani pa mo kun ta imandwaḵa rum thus mo tani uni palki mii mo mmoyer gway gi Tap̱a Yesus ap̱o/ uni gun takin ga rum thus mo mmo/o gwo mo ki: Aha/ ḵana um gwo mo ki gway ma Yesus yan jin c̱in ma Buulus gwo mo. 14Dhali a’din ’deŋ kamu/ jin ’kona iya/i pesu/ jin yuḵu gway ka Sakaawa jin ta Wathi/ Yahuuda/ mo dhali jin ta’da gasiis jin ca’d si’da/ kun miiki mii yan mo. 15Dhala rum thus thoḵki ’twa/ mo dhali o uni gwo mo ki: Yesus yan nyiṯẖka/ mo dhala Buulus yan mishga/ mo. Hili um ta ija sa/? 16Dhali wathi/ yan jin din ma rum thus icine/ mo tani a’di p̱e’da p̱o/ uni mo dhali p̱i uni ’baar mo e ki mii mo dhali bol uni ’kup̱ ki mom’bi’th ap̱o/ uni mo. Gom a’di ki mii yan kan mo tani uni son ka pije/ mmoye mo ’peni gu’b c̱aan ki ushi burrinye/ kun ’koni bwamani is ’te/ mo dhali ki jama/ i is si’da/ mo. 17Dhali yan warki’d mo jin mishu mo e uni ’baar mo kun ta ’Kwani Yahuuda/ mo dhali kun ta ’Kwaniŋ Griḵi si’da/ kun ’kokin e Pan Ep̱asus mo, dhali moŋḵo/ biṯki’da po/ uni ’baar mo dhali gway gi Tap̱a Yesus eḵki’d mo be. 18Uni tana ris si’da/ ’peni uni kun gamki gwo is mo tani uni iikin mo mmoṯor gwo gom miinthus mo dhali mmoc̱i gwo gom miim buni kun ’kokina uni mmomii mo. 19Dhali uni yisa p̱elena ’peni uni kun mala mii ka daran du mo uni ’doyina risa warkam buni mo imonṯal ’de/ mo dhali c̱i’th uni mo ibwambori uni ’baar mo. Dhali mo gi she yol buni deŋkina uni e mo dhali uni ki gam a’di mo ka ’ci’cimi’th kun ta ’dolkon kush kun ’koni alaap̱i iss ’kwanimpa i/iss su/ i’ce’dka ’kume’d mo. 20Dhali gwo gi Tap̱a caki’d mo dhali p̱i’da ris mom’bi’th e ’baar mo be. 21Dhali ’ko’da ris to gwansan ’baarkunu mii mo tani aBuulus dina gwo ibwa ki shi/in piti jin minu diki dhal ’pen mo me’d jin pekina a’di ki tur mo e Pam Makiduniyya mo dhali Pa Aḵaa/iya mo mmoya mo ntagi Pa Urushaliim mo mmo/o gwo mo ki: ’Ko’di mo jin miga/ c̱a’bi mun mo tani aha/ mina mii p̱ar bway Pa Ruumiya e si’da/ mo. 22Dhali mmohashkina a’di uni su/ ibway gi Pam Makiduniyya uni kun mii a’di to mo kun ta iṮimuṯẖawuus mo dhala Arasthuus tani a’di ki is piti c̱a’bki’d mo e Pa Asiyya naskina/ mo be. 23Dhali ka cim c̱aan mo tani mii piki’d mo, mii jin miinu ka serec̱ yisa gom gwo gi Bway yan mo. 24Haali/ wathiŋ kamu/ jin yuḵu gway ka Dimiṯriyuus jin ta’da mantor ’dolkon kush mo dhali jin ta’da man/uḵ ushi to ’peni ’dolkon kush kun wana e ki dhan gu’b jin ca’d jin luŋuwa Arthamiis nycine/ mo dhali a’di ḵalki’da ṯu’c jin ’ka’da mii yisa gom itap̱a kun ta gi ’kwaniŋ gwocon mo. 25Uni tulkina uni is mo imonṯal ’de/ mo nyaḵki uni kun miina ṯu’c ka ḵwam bwa ki ji nyaḵ mo dhali o gwo mo ki: Kana ba/. Um mishkin ki tom bana kun tana ana mo tani ’pena ṯu’c yan mo. 26Dhali um mishkin mo dhali um ciḵki gwo ka Buulus yan malaski ’kwani ki gwo mo dhali ṯu’k uni ka ris mo, yisa jasi e Pan Ep̱asus a’di ’de/ yisa hili si’da/ mo muru/ ’baar mo be isi bwaman gi Pa Asiyya ’baar mo mmo/o gwo mo ki: To gun uḵu ki me’d mo tani yisa ta to kun luŋu mo yisa 27dhali yisa jasi mo di’d e mo jin ṯagu wu mo jin min ma ṯu’c bana yan ta ṯẖuthu/ ki ṯẖuthu/ mo a’di ’de/ yisa, hili si’da/ gu’b gi luŋuwa dhan tony caaga/ yan jin yuḵu gway ka Arthamiis si’da/ minu ’taki war ka ha’th’ko’d mo dhali ki a’di si’da/ minu ’taki gac̱ ’peni mo/eḵ piti mo jin luŋa ’Kwani gi Pa Asiyya ’baar mo dhali ku ji mony’ceshi ’baar mo si’da/. 28Dhali ki uni ciḵki gwo yan mo tani uni ’tu’du/ ka nyor mo dhali cuukin kagahara mmo/o gwo mo ki: A’di jin ta jin eḵa/ eḵ tani a’di ita’da Arthamiis gi Pan Ep̱asus mo. 29Dhali kum bampa/ yansan ’tu’du/ ki mo ma c̱ulma’th mo dhali uni ṯẖa’thkin ki bwan ṯal ’de/ e dhan mo jin ta montul is jin biruwa bir mo mmobu’thkina uniya Ghayuus mo dhala Aristarḵus kun ta ’Kwani gi Pam Makiduniyya kun ta imannyaḵ ii ka Buulus mo. 30Dhali ka Buulus dina gwo ibwa mmose i bwaŋ ’kwani mo tani imanciḵ gwo nonki a’di ’kup̱ mo be. 31Dhali kun tiya si’da/ ’peni ’kwani kun tana ’kaŋ’kup̱ ki mo gi Pa Asiyya mo tani mmotana uni imugum piti tani uni hashki a’di gwo mo dhali malas a’di mo jin mina a’di diki c̱i is piti ki ya mo e mo jin ta montul is yan jin biruwa bir mo. 32Dhali kun tiya si’da/ cuuni ton ’de/ mo dhali kun tiya si’da/ i tiyan tiya mo. Haali/ montul is yan ta’da c̱ulma’th mo be dhali uni ’kon ka ris kun molki to jin tulkina uni is kan mo be. 33Dhali uni suskina Iskandar ka pije/ ’pena waambuhany ’kwani mo mmokarkina ’Kwani Yahuuda/ a’di eya tente/ ki ṯẖorony mo. Dhala Iskandar wuḵki uni ki me’d mo dhali midi ’taki woṯẖ gwo is gom ’kwani mo. 34Hili ki uni nyiṯẖkin ki a’di ta Wathi/ Yahuuda/ mo tani uni ’baar cuukin ki ’twan ṯal ’de/ mo ki mo jin wana e ka tente/ su/ mo ki: A’di jin ta jin eḵa/ eḵ mo tani a’di ita’da Arthamiis gi Pan Ep̱asus mo. 35Dhali ka hiliŋgwoŋḵan gom pa mu’thki’da waambuhany ’kwani ’twa/ mo tani a’di ki o uni gwo mo ki: Um ’Kwani gi Pan Ep̱asus. Ki wathi/ jana si’da/ idi’d jin diki mish ki ’Kwani gi Pan Ep̱asus ta imanhil gu’b jin luŋuwa dhan tony caaga/ yan jin yuḵu gway ka Arthamiis mo dhali jamas gi to yan jin biṯki’d ’pena Sap̱s mo? 36Haali/ a’di gi wakan tani ki to gwansan minu mol waṯ mo dhali um mini mii ta gi mo mo mmo’ko ki shwam mo dhali ’koki mii toŋ kamu/ ki ji ram mo. 37Haali/ um suski ’kwani gwansan imahan mo kun ’koki ta ’kwani kun ḵwali to ’peni gu’b kun luŋu to mo dhali uni si’da/ ’koki ta ’kwani gun wali gwo sor ap̱owa dhan tony caagam bana yan jin luŋu mo be. 38Waḵka Dimiṯriyuus si’da/ dhali tap̱aŋ ’kwani kun ta gi gwocon kun nyaḵ ’ko ki a’di mo ta gi gwo ap̱o/ wathiŋ kamu/ mo tani acim dhunu mo gom gwon dwall mo dhali iwaḵiil ’kon si’da/ mo. Dhalki uni yer is buni gway ka rem ’kup̱ mo ma. 39Hili waḵki/ um ŋap̱i toŋ kamu/ gom gwon tiya kun doṯu/ mo tani a’di minu thoson mo e montul is yan jin yuḵuwa yuḵ mo. 40Haali/ ka jiŋ gana/ ana ’kona e mo jin ṯagu wu mo e mo jin yeru is ki gway mo gom mo jin doshu ka nyora ṯal ’de/ ki bimbir ka cim yansan mo dhali mmomiinu a’di mo ka wuny is ’te/ mo. Dhali gom a’di yan mo tani ana mina mol gwo thoḵ goma nyor yan jin deḵu/ mo. 41Dhali ki a’di daḵki gwo o kan tan mo tani a’di si’da/ ’cuḵki montul is mo be.

will be added

X\