Mii Gun Minu Mo 18

1Ŋ’ko’di to gwansan mo tani a’di yaki’d ’peni Pa Aṯẖiina mo dhali a’di p̱u’dki’d e Paŋ Kurinṯẖuus mo. 2Dhali a’di gamki Wathi/ Yahuudaŋ kamu/ jin yuḵu gway ka Akiila jin ta wathi/ gi Pam Punṯus jin dhodhu mo jin daḵa p̱u’dki’d mo ’peni Pa Ithaaliya ki ’dishe/ nyaḵki ashim piti jin ta’da Piriskilla mo, haala Kuludiyuus ḵanki’da ris ’Kwani Yahuuda/ gwo mo mmo/ii ’peni Pa Ruumiya mo dhali a’di p̱u’dki’d e uni mo. 3Dhali haali/ a’di ta’da mannyaḵ to mii ki uni mo tani a’di nyaḵ c̱a’b ki uni mo dhali uni miiki to mo haala ṯu’c buni ta’da ṯu’c mmota imansho gu’b burrinye/ mo be. 4Dhali a’di ṯorki’da ṯor ka ḵarambuye/ e gu’b gi montul is gi ’Kwani Yahuuda/ ka risa cim ma pesu/ mo dhali a’di mala ’Kwani Yahuuda/ ki gwo mo dhali ’Kwaniŋ Griḵi mo be. 5Hili ki iSila dhala Ṯimuṯẖawuus p̱u’dkin ka luŋgu’b mo ’peni Pam Makiduniyya mo tani aBuulus doshki’da po/ gwo mo mmoṯor gwo eya tente/ gom ’Kwani Yahuuda/ mo ka Yesus yan ta’da Ḵrisṯẖos mo be. 6Dhali ki uni roc̱ki gwo ki is buni mo dhali walki gwo sor mo tani a’di pirki burrinyem piti mo dhali o uni gwo mo ki: Dhalka bas bum di’di ’bam bum mo ma, um ’cena ki is bum mo. Haali/ aha/ tana jin dheleli’d mo. ’Pena cim yansan ki sule/ mo tani aha/ mina ya mo e ’kwani kun ’koki ta ’Kwani Yahuuda/ mo be. 7Dhali a’di yaki’d ’peni mo yan mo mmoyaku/ e gu’b gi wathiŋ kamu/ jin yuḵu gway ka Ṯithiyus Yusṯus mo. A’din ’de/ yan luŋki’da Arumgimis mo jin ta gi gu’b jin ’dishi gu’b gi montulu is is mo be. 8Dhala Kirispus jin ta tap̱a gom gu’b gi montul is mo tani a’di gamki gwo is e Tap̱a nyaḵka ris kuŋ gu’b piti mo dhali ’Kwani gi Paŋ Kurinṯẖuus ka ris mo mmociḵa uni gwo mo tani uni gamki gwo is mo be dhali uni miikunu ki yi’de/ mo. 9Dhali Tap̱a oki’da Buulus gwo mo mon’thiny ki tonyjan ki: Dhalku/ is ki ḵo/ mo ma. Hili oyi gwo mo, dhali dhalku/ ki c̱a’b ki shwam mo ma, 10haali/ aha/ dina e /e mo dhali wathiŋ kamu/ midi mol /e seya p̱o/ mo mmomii /e ki shi/ mo, haali/ aha/ tana gi ’kwani ka ris e bampa/ yansan mo be. 11Dhali a’di c̱a’bki’d imun ki yil mo dhali ka ppe ’kup̱i pe’de/ mo mmoṯor gwo ma Arumgimis e bwam uni mo be. 12Hili ka Ghaliyuun ta’da mudhiir gi Pa Aḵaa/iya mo tani ’Kwani Yahuuda/ ki bwan ṯal ’de/ mo tani uni ṯẖa’thkin mowa p̱o/ Buulus mo dhali sus a’di ibwambor ma ḵursi jin dwallu gwo mo 13mmo/o gwo mo ki: Wathi/ yansan lalki ’kwani sho’k ki gwo mmoluŋa Arumgimis ki mii kun ta kuny c̱a’ckon ap̱o/ gwoŋḵan jin c̱inu mo. 14Hili ka Buulus murki’di c̱ee ’twam piti mo tani aGhaliyuun ki o ’Kwani Yahuuda/ gwo mo ki: Waḵki/ ka jiŋ gana/ a’di midi ’taki ta mii shi/i’d mo walla mii jin ta jin thus mo dhali jin ta ji ma maḵa/ gany mo tani ayy um ’Kwani Yahuuda/ mo, adu midi ’taki ṯucaa/ mmo’taki gu is ’peni um mo. 15Hili waḵki/ um ta gi gwondoṯ gom gwon tiya mo dhali gwaya tiya mo dhali gom gwoŋḵan bum jin c̱inu mo tani hili gwo gom a’di um ki is bum mo ma. Aha/ dinaki ta gi bwa mmota amandwall gwo gom gwo gwansan mo be. 16Dhali a’di urki uni ’pena ḵursi jin dwallu gwo mo. 17Dhali uni ’baar mo ’ce’dkina Susṯaniis me’di is mo a’di jin ta tap̱a gom gu’b gi montul is mo dhali uni ki dor a’di mo dhali sus a’di e bwambor ma ḵursi jin dwallu gwo mo. Dhala Ghaliyuun dina gwo ki di ibwa gom ton ṯal ’deŋ kamu/ gwansan mo be. 18Dhala Buulus mmoc̱a’bkina a’di ka cim ka ris naskina/ mo tani a’di bu’thki moyam piti ’pena waḵ yan mo dhali yaki’d eya ḵur yi’de/ jin bela ’tham mo ki bway gi Pan Suriyya mo dhala Piriskilla dhala Akiila nyaḵ ii ki a’di mo mmo’ciṯẖa/ a’di amur’kup̱ piti e Paŋ Kanḵariya mo haali/ a’di ta gi gwo jin okina a’di is mo be. 19Dhali ki uni p̱u’dkin e Pan Ep̱asus mo tani a’di ki dhal uni imun mo. Hili a’di a’di ki is piti seki’d e gu’b gi montul is mo dhali ṯorki’da ṯor ka ḵarambuye/ ki ’Kwani Yahuuda/ mo be. 20Dhali ki uni doṯki a’di mo mmoc̱a’bi uni naskina/ mo tani a’di ha gwo e yisa. 21Hili mmobu’thkina a’di moyam piti ’peni uni mo dhali mmo/o uni gwo mo ki: Aha/ mina doḵu/ mo i um doḵ/e mo waḵki/ Arumgimis midi ’taki o bwa mo. Dhali a’di ’cuḵki’da ḵur yi’de/ jin bela ’tham ’peni Pan Ep̱asus mo be. 22Dhali ki a’di thulki’da ’cesh e Paŋ Kaysariyya mo tani a’di merki’da gap̱ mo dhali theki ’kwaniŋ ḵaniisa me’d mo dhali yaki’d ka luŋgu’b mo e Pa Anthaakiya mo be. 23Dhali mmoc̱a’bkina a’di imun ki rash rash mo tani a’di yaki’d mo dhali yaki’d ki tur mo e bampa/ kukul is mo ntagi Paŋ Galathiyya mo dhali Pam P̱arijiyya ka toŋtoŋ mo mmoṯela ris imanciḵ gwo sho’k mo be. 24Dhali Wathi/ Yahuudaŋ kamu/ diki’d jin yuḵu gway ka Abulluus jin ta Wathi/ gi Pa Iskandariyya ka dho’th piti mo jin yuḵayuḵ mmota gi ’twaŋ gwocon mo jin p̱u’dki’d e Pan Ep̱asus mo dhali a’di ta gi mom’bi’th e Gwo ma Arumgimis kun ’kwarkunu mo be. 25Wathi/ yan ṯorkunu gwo mo e bway gi Tap̱a mo dhali mmoḵa/a a’di ki ḵa/ e shi/in mo tani a’di o gwo mo dhali ṯorki gwon to ka ḵar/e goma Yesus mo mmomisha a’di jasi mo jin miin ma Yohaana mii ki yi’de/ mo 26dhali a’di ṯelki gwo ’pen mo mmoc̱i gwo ki dar gi monyju/ mo e gu’b gi montul is mo be. Hili ka Piriskilla dhala Akiila ciḵki a’di mo tani uni bu’thki a’di ’kup̱ ki is buni mo dhali ṯorki a’di gwo eya tente/ gom bway ma Arumgimis ka ḵar/e ki nyanye/ mo. 27Dhali ki a’di dina gwo ibwa mmo’ciṯẖa/ gap̱ mmop̱u’d mo e Pa Aḵaa/iya mo tani awaḵ yan malaski a’di mo mmoya mo dhali uni ’kwarki imanciḵ gwo gwo mo mmobu’th a’di mo be. Dhali ki a’di p̱u’dki’d mo tani a’di woṯẖki uni ki nyanye/ mo uni kun gamki gwo is eya ’the mo, 28haali/ ki mom’bi’th mo tani a’di pucurki ’Kwani Yahuuda/ ki gwo ibwambori ’kwani mo mmoṯor eya tente/ ’peni Gwo ma Arumgimis kun ’kwarkunu mo ka Yesus yan ta’da Ḵrisṯẖos mo be.

will be added

X\