Mii Gun Minu Mo 16

1Dhali a’di p̱u’dki’d si’da/ mo e Pan Darba mo dhali e Pan Lisṯra mo dhali hili ma, amanciḵ gwoŋ kamu/ diki’di mun jin yuḵkunu ka Ṯimuṯẖawuus mo jin ta ya/ ma ’bom gi ’Kwani Yahuuda/ mo jin gamki gwo is mo hili com ta Wathiŋ Griḵi mo be. 2A’di yansan maŋkunu mo e bwam ma waḵ jin di’d e Pan Lisṯra mo dhali e Pa Ikuuniya mo be. 3A’di min ma Buulus i’taki ŋap̱ mo mmosus nyaḵki a’di mo dhali a’di bu’thki a’di mo dhali ’ciṯẖki a’di amunyjal yis piti mo gom ’Kwani Yahuuda/ kun ’kon e pa gwaṯṯaan mo haali/ uni ’baar mo mishkin ki com ta Wathiŋ Griḵi mo be. 4Dhali mmo/iina uni mo ki bway buni ki tur mo mmo’ciṯẖ bampa/ mo tani uni c̱iki uni gwoŋḵan yan mo mmodhu kun gama imandhunu ki she/ me’d mo dhali ’kwaniŋ gwanyjaḵa/ si’da/ kun ’kon e Pa Urushaliim mo be. 5Wakan si’da/ ’kwaniŋ ḵaniisa ’bi’thkunu is mo e moŋgam gwo is mo dhali markunu is ka yempa/ mo be. 6Dhali uni iikin ki tur mo e mo ka kukul is mo e Pam P̱arijiyya mo dhali Paŋ Ghalathiyya mo mmononkina Shi/in Dheleladhelel uni ’kup̱ mo mmo/o gwo yan e Pa Asiyya mo be. 7Dhali ki uni iin ka ḵarambuye/ i Pam Misiyya mo tani uni palki mii mo mmo/ii ntagi Pam Biṯẖiniyya mo dhali Shi/in ma Yesus diki dhal uni bway mo be. 8Dhali mmokalkina uni Pam Misiyya mo tani uni iikin ka luŋgu’b mo e Pan Ṯaruwaas mo be. 9Dhali tonyjan piki’da Buulusi is mon’thiny mo a’di jin ta wathi/ gi Pam Makiduniyya mo jin diki’d mmodosh mo mmoyuḵ a’di mo dhali o gwo mo ki: Yayu/ ma mmo’ciṯẖa/ gapa e Pam Makiduniyya dhali woṯẖ aman mo ma. 10Dhali ki a’di p̱arki tonyjan e mo tani ise/ am palkina mii mo mmo/ii e Pam Makiduniyya mo mmop̱u’da aman e gwonṯal ’de/ mo ka Arumgimis yuḵki aman mo mmoc̱i gwom ’borga/ e uni mo be. 11Kan mo tani a’di i’cuḵkina amana ḵur yi’de/ jin bela ’tham mo ’peni Pan Ṯaruwaas mo be. Am iikina ka ji sho’k ki bway ’tham ntagi Pan Samuṯẖraaki mo dhali ka cim jiŋ ’ko’d mo tani ntagi Pa Niyapuliis mo. 12Dhali ’peni mo c̱aan mo tani ntagi Pam P̱ilibbi jin ta bampa/ gi ’Kwani gi Pam Makiduniyya jin ta’da ’kaŋ’kup̱ pa e mo yan jin ta ’peŋkuman bampa/ gi ’Kwani gi Pa Ruumiya mo dhali aman ’kokina naskina/ ka cim ka hony/e mo. 13Dhali ka cim ma pesu/ mo tani aman iikina ka pije/ ki ’twaŋkala goŋ bampa/ mo e yana gap̱ mo e mo jin ṯoshkina aman ki mo jin ’thonu di’d mo. Dhali am ’kokina ’cesh mo dhali okina up̱ gun iiyini monṯal ’de/ mo. 14Dhala ’boma kamu/ jin yuḵu gway ka Lidiyya jin ta’da manyol burrinye/ jin gwaju mo ki tom buhe/ gi Pa Ṯẖiyatira jin luŋki’da Arumgimis mo tani a’di ciḵki am gwo mo haala adum piti ḵa’dkina a’di ki Tap̱a mo mmoc̱i is piti ki to kun okin ma Buulus mo be. 15Dhali a’di miikunu ki yi’de/ mo dhali ki kuŋ gu’b piti ilu/ mo tani a’di yuḵki am mo mmo/o gwo mo ki: Waḵki/ um nyiṯẖkin ki aha/ tana a’di jin ta isiŋ gana/ gom Tap̱a mo tani iiyu/ i gu’b pem mo ma dhali ’ko ise/ mo. Dhali a’di ṯu’cki am mo be. 16Dhali a’di warki’d ki mo jin ’kokina aman mmo/ii mo e mo jin ’thonu tani nyaraŋ kamu/ jin ta ga rum mmomish to ṯor gom mo jin midi yayu/ mo tani a’di gam aman ’kup̱ mo jin ḵalki’da ṯu’c kagahara gom itap̱am piti mmoṯora a’di gwo wakan mo. 17A’di yan mmobaṯẖkina a’diya Buulus mo dhali aman si’da/ mo tani a’di cuuki gwo kagahara mo mmo/o gwo mo ki: ’Kwani gwansan ta c̱iŋkina/ ma Arumgimis jin Cayaa/ e ki Ca mo kun c̱i um gwo gom bway ki mowoṯẖ mo. 18Dhali yan miikina a’di ka cim ka ris mo. Hila Buulus mmodiṯa bwa a’di mo tani ṯu’kki’d mo dhali owa rum gwo mo ki: Aha/ ḵana /e gwo ki gway ma Yesus Ḵrisṯẖos mo mmoyayu/ ka pije/ ’peni a’di mo. Dhali a’di piki’d ka pije/ mo ki mo yansan mo. 19Hili ki tap̱am piti mishkin ki to kun mina uni ’taki gam ’peni a’di p̱ikin mo tani uni bu’thkina Buulus mo dhala Sila mo dhali dir uni ki ’bi’th mo e mo ma suug mo ibwambori tap̱a mo. 20Dhali ki uni suski uni e imandwall gwo mo tani uni o gwo mo ki: ’Kwani gwansan mmotana uni ’Kwani Yahuuda/ tani uni miiki mii kagahara mo mmoṯo’c ’kwani gi bampam bana bwa mo, 21dhali ṯor mii kun nona gwoŋḵan bam am bway mo mmobu’th mo walla mmoboṯki mii mo mmotana aman ’Kwani gi Pa Ruumiya mo. 22Dhala waambuhany ’kwani gam gwo me’da p̱o/ uni imonṯal ’de/ mo dhali imandwall gwo dher burrinyem buni bwa mo ’peni is buni mo dhali ḵan gwo mmodor uni ki cwa mo. 23Dhali ki uni dhuki mondoru ka risa p̱o/ uni mo tani uni ṯa’kki uni eya sijin mo mmoḵana manc̱ora sijin gwo mo ki: Dhuyi uni ki ’dantar mo. 24Dhali mmobutha a’di gwoŋḵan gi wakan mo tani a’di ṯa’kki uni e bwaman ma sijin gana/ mo dhali rep̱ki uni sho’k ki cwa mo. 25Hili ki mo wana e ki mombwam/e mon’thiny mo tani aBuulus dhala Sila uni ’kon mo mmo’tho mo dhali mmoyuḵ gway goma Arumgimis mo dhali ’kwani kun tana habuus ’kon si’da/ mmociḵ uni mo be. 26Dhali ise/ adhan mony’cesh yiḵinki is kagahara mo tani a’di yiḵinkina mo jin ḵa’bu gu’ba sijin is mo. Dhali ise/ arisa campuri ’baar mo tani ḵa’dkunu mo dhala ris mondeḵ gi uni ’baar mo ka ’deṯe/ ’deṯe/ mo tani sulkunu mo be. 27Dhala manc̱ora sijin mmomeru a’di e mo ’peni mo/ish e mo tani dhali mmop̱arkina a’di acampura sijin e mmo’ko ki ḵany mo tani a’di buḵki gandala turgam piti mo dhali murki’di ’taki ’kosh is piti jwa mo mmoṯoshkina a’di ki ’kwani habuus yekin mo be. 28Hila Buulus cuuki’d ki dhan ’twa/ mmo/o gwo mo ki: Dhalku/ to shiyi’da kamu/ ki mii gom is pini mo ma. Haali/ aman ’baar mo ’kona imahan mo. 29Dhali a’di yuḵki’da yuḵ gom o’d mo dhali p̱e’di bwaman mo dhali mmodeena a’di is mo gom moŋḵo/ is mo tani a’di biṯki’da ’cesh ibwambor ma Buulus mo dhala Sila mo 30dhali a’di suski uni ka pije/ mo dhali o gwo mo ki: Kana, aha/ mina miiya ta mmowoṯẖ is pem mo? 31Dhali uni oki a’di gwo mo ki: Gami Tap̱a Yesus is mo ma dhali /e minu woṯẖ mo dhali ki kuŋ gu’b pini ilu/ mo. 32Dhali uni oki gwon Tap̱a e a’di ki uni ’baar mo kun ’kon e gu’b piti ilu/ mo. 33Dhali a’di bu’thki uni ki mo yansan jin ta mon’thiny mo dhali up̱ki uni mondorum buni mo dhali ise/ a’di miikunu ki yi’de/ mo, a’di dhala ris unim piti ’baar mo be. 34Dhali a’di suski uni ki mis e gu’b piti mo dhali dhuki tonṯe/ ibwambori uni mo dhali uni ’borkina bwa kagahara mo inyaḵki kuŋ gu’b piti mo mmogamkina uniya Arumgimis gwo is mo be. 35Hili ki mo ḵali kush mo tani imandwall gwo hashki iman’doyi to kun doruwa dor mo mmo/o gwo mo ki: Dhalki ’kwani gwansan iin mo ma. 36Dhala manc̱ora sijin guki’da Buulus gwo mo mmo/o gwo mo ki: Imandwall gwo hashki um gwo mo mmodhal um bway mo mmo/ii mo ti. Haali/ a’di wakan mo tani a’di mina uni iiyu/ mo shwanetan mo dhali iiyi ki moŋḵu’th is mo. 37Hila Buulus oki uni gwo mo ki: Uni dorki am ibwambori ’kwani ki dar gi miiwaḵ mo, ’kwani kun ta ku gi Pa Ruumiya mo dhali ṯa’kki aman eya sijin mo dhali shwane/ uni mini ṯa’k am ka pije/ ka ’diya? Yisa ka jiŋ gana/. Hili dhalki uni iiyin ki is buni mo dhali sus am ka pije/ mo. 38Dhali iman’doyi to kun doruwa dor mo guki gwo yansan e imandwall gwo mo dhali uni ḵo/ki is mo haali/ uni ciḵkin ki uni ta ’Kwani gi Pa Ruumiya mo be. 39Dhali uni p̱u’dkin mo dhali yuḵ uni mo, dhali ki uni suski uni ka pije/ mo tani uni doṯki uni mmo/ii ’peni bampa/ mo be. 40Dhali uni iikin ka pije/ mo ’pena sijin mo dhali cic̱kin mo e gu’b ma Lidiyya, dhali ki uni mishkina waḵ buni mo tani uni malaski uni ki gwo mo dhali ii mo be.

will be added

X\