Mii Gun Minu Mo 12

1Dhali mo ’dishki’d mo ka cim gwansan mo tani Hirodus jin ta’da maliḵ karki me’d piti mmobu’th ’kwanin tiya ’pena ḵaniisa mo mmoṯo’c uni bwa mo. 2Dhali a’di ’koshki’da Yakuub jwa mo jin ta’da kam ma Yohaan ki gandala turga/ mo. 3Dhali ki a’di p̱arki’d ki ’Kwani Yahuuda/ ’boru bwa mo gom a’di mo tani a’di diki daḵ mii mo hili bu’thki’da Buṯerus si’da/ mo. Dhala cim gwahan ta’da Cim gi Maaŋḵuthu’d kun miinu ki dar ga cumaṯ mo. 4Dhali ki a’di bu’thki a’di mo tani a’di kar a’di eya sijin mo dhali c̱i a’di ka askar kun dhunu mo ka nyir me’di do doŋon mo mmoji a’di mo mmo/o gwo e bwa mmosus a’di mo ibwambori ’kwani ’ko’da cim gi Mompe’kup̱anyolos mo. 5A’di karkunuwa Buṯerus eya sijin mo. Hili mon’tho miin ma ḵaniisa ki dar gi mondaḵ mo eya Arumgimis gom a’di mo. 6Dhali ka Hirodus murki’di sus a’di ka pije/ mo tani mon’thiny yansan mo tani Buṯerus di’d mmo/ish e ibwaman ma askar su/ mo dhali deḵu ka jindhiiri su/ mo dhali imanji mo mo ’koni bwambor ma campur mo mmohila sijin mo. 7Dhali hili mo mo ma, aman’doyu gwo gi Tap̱a doshki’d mo mmo’dish a’di is mo dhali moŋkush ’twaḵki mo mo e ari gu’ba sijin mo. Dhali a’di dorki’da Buṯerus ’ko’d gwar ki me’d mo dhali mer a’di e mo mmo/o gwo mo ki: Cuyi mis ise/ ki jahanne/ mo. Dhala jindhiir piti ’cuḵkin mo ’peni me’d piti mo. 8Dhali aman’doyu gwo o a’di gwo mo ki: Deḵi wac̱kan e empa’d pini mo ma dhali deḵa p̱p̱am pini mo. Dhali a’di mii a’di mo. Dhali a’di ki o a’di gwo mo ki: Kumi burrinyem pini i is pini mo dhali baṯẖi aha/ m’pen mo. 9Dhali a’di ya’d ka pije/ mo dhali baṯẖa’da baṯẖ mo dhali a’di molo’d ki a’di ta jiŋ gana/ jin miikin ma man’doyu gwo mo tani hili a’di ṯosh ki a’di p̱ar tonyjan e mo. 10Dhali ki uni pe uni mo kun ta imanji mo mo kun ’koni ṯwa/a/ dhali imanji mo mo kun ta kuŋ ’ko’d mo tani uni iiyini ’twaŋkal toŋḵuthu’d jin ḵa’du bway mo e ’peŋkuman bampa/ jin ḵa’da’d gom uni ki is piti mo. Dhali uni iin ka pije/ mo dhali iin mo naskina/ mmo’baar bwaya ’de/ mo dhali ise/ aman’doyu gwo yaki’d ’peni a’di mo. 11Dhali ka Buṯerus yaki’d ki is piti mo tani a’di o gwo mo ki: Shwane/ aha/ misha ka jiŋ gana/ ki Tap̱a hashki’da man’doyu gwom piti mo dhali ’cuḵ aha/ ka pije/ mo ’peni me’d ma Hirodus mo dhali ’pena ris to kun c̱ora ’Kwani Yahuuda/ mo. 12Dhali ki a’di mishki to eya tente/ kan mo tani a’di yaki’d e gu’b ma Mariyam jin ta KoYohaan jin yuḵu ki gwaya kamu/ ka Markus mo i mo jin tula ’kwani is ka ris mmonṯal ’de/ mo dhali uni ’kon mmo’tho mo be. 13Dhali ki a’di dorki’da campur ’twaŋkal ki me’d mo tani ari nyara/ jin mii’da ṯu’c jin yuḵu gway ka Ruda mo tani a’di yayi’d mmociḵ ’twa/ naskina/ ’te/ mo. 14Dhali ki a’di nyiṯẖki’d ki a’di ta ’twa/ ma Buṯerus mo tani a’di diki ḵa’d ’twaŋkal mo hili gom mom’bor bwam piti mo tani a’di guski’d mo mmoṯor gwo ka Buṯerus doshki’d ibwambor ’twaŋkal mo. 15Dhali uni o a’di gwo mo ki: /E guskina du mo ba/. Hili a’di ṯor uni gwo doḵ/e ki ’bi’th ki a’di wakan mo be. Dhali uni o ki a’di ta’da man’doyu gwom piti ’te/ mo. 16Hila Buṯerus di’di modor ’twaŋkal naskina/ mo dhali ki uni ḵa’dkin mo tani uni p̱ar a’di e mo dhali merkin mo be. 17Hili a’di mmowuḵkina a’di uni e ki me’d mo mmo’ko ki shwam mo tani a’di c̱i uni gwo ’baar mo mmosusa Tap̱a a’di ka pije/ mo ’pena sijin mo. Dhali a’di o gwo mo ki: Ṯora ris to gwansan ka Yakuub mo dhala waḵ bana mo. Dhali a’di ya’d mo ’peni uni mo dhali ya’d mo e moŋkamu/ mo. 18Dhali mmosul ma tente/ mo tani mii ibwaman ma askar yisa miinu ka serec̱ yisa, aBuṯerus warki’d kata mo? 19Dhali ka Hirodus ŋap̱ki’da ŋap̱ kagahara mo tani dhali diki gam a’di mo tani a’di ŋap̱ki gwo mo gom imanji mo mo dhali a’di ḵanki gwo mo ki uni minu ’kosh mo. Dhali a’di yaki’d ka luŋgu’b mo ’peni Bampa/ Yahuudiyya mo ntagi Paŋ Kaysariyya mo dhali c̱a’bi mun mo be. 20Dhali shwane/ Hirodus miiki’da nyor ki ’Kwani gi Pan Sur mo dhali Pan Saydaa/ mo dhali uni iiyin ki bwan ṯal ’de/ i a’di mo dhali mmomiina uni amugu aBalasṯus jin ta’da manmiiya ṯu’c gu’ba ci goma maliḵ tani uni ki doṯ moŋgwam mo haali/ bampam buni thip̱u ’peni bampa/ ma maliḵ mo be. 21Dhali ap̱owa cim jin karu mo tani Hirodus mmohidha a’di burrinye/ ma maliḵ mo tani dhali mmoc̱a’ba a’di eya ḵursi ma maliḵ mo tani dhali a’di ki c̱i uni gwo mo be. 22Dhali ’kwani cuun kagahara mo mmo/o gwo mo ki: ’Twa/ ma rum ’te/ be yisa ’twa/ gi wathimpa mo. 23Dhali ise/ aman’doyu gwo gi Tapa ’kosh a’di mo haali/ a’di diki kara Arumgimis ki ca mo dhali a’di shwan ma yish mo dhali c̱i shi/in piti mo be. 24Hili gwo ma Arumgimis caki’d mo dhali markunu is mo be. 25Dhala Barnaaba dhala Shawuul doḵkin ’peni Pa Urushaliim mo ki uni ’baarki mii jin iina uni mo mmomii mo tani uni suskina Yohaan nyaḵki uni mo, a’di jin yuḵkunu ki gwaya kamu/ ka Markus mo.

will be added

X\