Mii Gun Minu Mo 11

1Dhali imandhunu ki she/ mo dhali kun tiya ’pena waḵ kun ’kon e Bampa/ Yahuudiyya mo ciḵki gwo ki ’kwani kun ’koki ta ’Kwani Yahuuda/ si’da/ buthi gwo ma Arumgimis mo. 2Dhali ka Buṯerus yayi’d ’kup̱ ki misi Pa Urushaliim mo tani uni kun ’ciṯẖuwa munyjal yis mo su’k a’di ki gwo mo 3mmo/o gwo mo ki: Katinta sa/? iyana /e i ’kwani gun ’konuki ’ciṯẖa/ munyjal yis mo dhali nyaḵ to shwa ki uni mo? 4Hila Buṯerus ṯel gwo ’pen mo mmoṯor gwo i uni ka roṯẖam po/ mo mmo/o gwo mo ki: 5Ki aha/ dina e Bampa/ Yaap̱a mo mmo’tho mo dhali aha/ biṯa is jwa mo mmop̱ar tonyjan e mo. Toŋ’kul bwaŋ kamu/ thulki’d mo jin wana e ki dhan burrinye/ jin dhaluwa ’cesh ’peni momis ki shem ’pena bi idoŋon mo. Dhali a’di yayi’di aha/ ciki/ mo be. 6Dhali ki aha/ dina mmohil a’di ka ’thime/ mo tani dhali mmokulum gwo ibwa mo tani aha/ mishkina ap̱o/ a’di mo to/e kun ’kona sho’k do doŋon kun ta kuny ’cesh mo dhali tombwaasho mo dhali to kun paarana ’cesh mo dhali ’dii kun p̱eni momis mo be. 7Dhali aha/ ciḵa ’twa/ si’da/ jin o gwo i aha/ mo ki: Cuyi mis mo ma, Buṯerus, dhali ’koshi ma dhali ’kayi mo. 8Hili aha/ ona gwo mo ki: Yisa wakana Tap̱a haali/ toŋ kamu/ jin ga/u walla toŋ kamu/ jin dinuki thoson me’d jin onu mmomii mo tani a’di yisa ya’di ’twam pem me’d ’deya. 9Hili ’twa/ thoḵu mo me’di su/ ’peni momis mo ki: A’di jin thoson ma Arumgimis ki dhelel dhelel mo tani dhalku/ ki kar a’di ki to jin ga/u mo ma. 10Dhali a’di miinu me’di kwara mo. Dhala ris to budhu e momis doḵ/e mo. 11Dhali hili mo mo ma, ’kwaniŋ gwasi kwara doshkin ibwambor gu’b jin ’kona aman nycine/ mo tani mmohashkunu uni ’peni Paŋ Kaysariyya i aha/ mo. 12Dhali Shi/in ṯu’c aha/ mmonyaḵ ya ki uni mo ki dar gi gwon dhaŋ mo. Dhali unim pe’de/ gwansan si’da/ ’pena waḵ mo tani nyaḵ ii ki aha/ mo. Dhali am sekina gu’b wathi/ mo be. 13Dhali a’di ṯorki aman gwo mo mmop̱ara a’diya man’doyu gwo e mo mmodosh igu’b piti mo dhali o gwo mo ki: Hashi gwo e Pan Yaap̱a mo ma mmoyuḵa Simaan jin yuḵu ki gwaya kamu/ ka Buṯerus mo 14jin midi o /e gwo mo, gwo kun minu woṯẖ /e mo ki kuŋ gu’b pini ilu/ mo. 15Dhali me’d jin ṯelka/ gwo ’pen mo mmo/o mo tani Shi/in Dheleladhelel yayi’da p̱o/ uni mo me’d jin yakina a’di ap̱o/ ana ka muŋ’kup̱ mo be. 16Dhali aha/ kana gwon Tap̱a e mo mmo/ona a’di gwo mo ka: aYohaan ka jiŋ gana/ mii’da mii ki yi’de/ mo tani hili um minu mii ki Shi/in Dheleladhelel mo be. 17Waḵki/ Arumgimis ki c̱i uni to jin c̱inu ki me’d kansan mo tani me’d jin miina a’di si’da/ gom ana ki ana gamkina Tap̱a Yesus jin ta’da Ḵrisṯẖos gwo is mo tani aha/ tana aja sa/ jin miga/ mish roc̱a Arumgimis mo? 18Dhali ki uni ciḵ to gwansani ’baar mo tani uni bu’th moŋḵu’th is mo dhali kara Arumgimis ki ca mo mmo/o gwo mo ki: Hili ’kwani kun ’koki ta ’Kwani Yahuuda/ si’da/ c̱in ma Arumgimisa du mo mmori’c is mo ntagi moŋ’koki/e mo be. 19Uni si’da/ kun c̱ekerki bwa mo gom monṯo’c bwa jin piki’d mo goma Isṯip̱anuus mo tani iikin mo ntagi Pam P̱iniikiya mo dhali Paŋ Kuprus mo dhali Pa Anthaakiya mo mmo/o gwo ki kun tiya yisa, hili ki jasi ’kwani kun ta ’Kwani Yahuuda/ mo. 20Hili kun tiya ’koni bwam uni kun ta ’Kwani gi Paŋ Kuprus mo dhali Paŋ Kerawaan kun o ki ’Kwaniŋ Griḵi si’da/ mmoṯor gwon Tap̱a Yesus me’dyin iiyina uni e Pa Anthaakiya mo be. 21Dhali me’d gi Tap̱a di’d e uni mo dhala waambuhany ’kwani caaca mo kun gam gwo is mo kun ṯu’kkin e Tap̱a mo. 22Dhali gwonṯor yan yayi’di ’ceŋ ’kwaniŋ ḵaniisa jin di’d e Pa Urushaliim mo, dhali uni hashkina Barnaaba ntagi Pa Anthaakiya mo 23jin ’bora bwa mo me’dyin p̱u’da/ a’di mo, dhali a’the ma Arumgimis mishkina a’di mo be. Dhali a’di malaski uni ’baar mo ki gwo mo, ki gwo kun dhuna uni adu mo mina uni ’dim ’kup̱ gom Tap̱a mo. 24Haali/ a’di ta wathi/ jin ’boro’d mo dhali jin ’tu’du/ mo ki Shi/in Dheleladhelel mo dhali ki moŋgam gwo is mo dhali ’kwani ka ris maru is e Tap̱a mo. 25Dhali a’di yaki’d mo e Pan Tharsuus mo mmoŋap̱a Shawuul mo 26dhali ki a’di gamki a’di mo tani a’di ki sus a’di e Pa Anthaakiya mo. Dhali a’di warki’d ki mo jin ’baarkina uni yil ’de/ mo mmotul isi monṯal ’de/ nyaḵka ḵaniisa mo dhali ṯor gwo ki ’kwani ka ris ris mo, dhali imangam gwo is yuḵu gway ka Ḵrisṯẖiyan e Pa Anthaakiya mo be. 27Dhali ka cim gwansan tani imanc̱i gwo iiyin ka luŋgu’b mo ’peni Pa Urushaliim e Pa Anthaakiya mo. 28Dhali jamu/ ṯal ’de/ ’peni uni doshki’d ki mis mo jin yuḵu ka Aghabuus mo dhali ṯor gwo mo gom momer jin misha a’di ki Shi/in ki dhan ṯe/ caaca midi di ap̱o/ mony’ceshi ’baar mo jin bu’th mo mo ka tee ma Kuludiyuus mo. 29Dhali imanciḵ gwo uni ’baar mo ki ’beles me’d jin mishu a’di mii mo tani uni dhu bwa mo mmohash mowoṯẖ goma waḵ buni kun ’kon e Pa Yahuudiyya mo, 30me’d jin miina uni si’da/ mmohash a’di e ’kwaniŋ gwanyjaḵa/ ki me’d ma Barnaaba dhala Shawuul mo be.

will be added

X\