Mii Gun Minu Mo 1

1Gwo jin ’kwarka/ ’thissa/ Ṯẖawup̱iilus goma ris mii kun ṯel ma Yesus ’pen mo dhala ris gwo kun ṯela a’di ’pen mo mmoṯor si’da/ 2gama cim jin gunu a’di momis mo ’ko’di gwoŋḵan jin c̱ina a’di ki Shi/in Dheleladhelel ki imandhuna a’di ki she/ mo kun kwanykina a’di mo. 3’Ko’di isa nyor piti mo tani Yesus ki ṯor uni is piti jin di’d ki e eya tente/ ka du’d miiŋ gana/ ka ris mo. A’di yayi’di pi uni i is ka cim ma issu/ mo be. A’di di’d mmoṯor gwo gom Bampa/ ma Arumgimis mo. 4A’di di’d mmonyaḵ is tul ki uni mmonṯal ’de/ mo dhali a’di ki ḵan uni gwo mo ki uni mini ’koki ii mo ’peni Pa Urushaliim mo haali/ uni mini c̱or gwo jin ona Com is jin ona a’di jin ciḵa um ’peni aha/ mo. 5Haala Yohaan ka jiŋ gana/ mii’da mii ki yi’de/ mo tani um mina Shi/in Dheleladhelel mii si’da/ ki ’dishe/ mo be. 6Uni si’da/, ki uni nyaḵki is tuli monṯal ’de/ mo tani uni doṯki a’di gwo mo mmo/o gwo mo ki: Tap̱a, /e mini c̱i bampa/ gi ’Kwani ma Israyiil ka nyaŋ’ko’d ki mo yansan mo ’taa? 7Dhali a’di ki o uni gwo mo ki: A’di diki ta mom bum mmomish mo mo dhali yil mo uni kun dhun ma Baba a’di ’de/ mo mmoc̱i gwo ki moshirr pitiŋ gana/ mo be. 8Hili um mini bu’th mom’bi’th gi Shi/in Dheleladhelel jin midi yayu/ ap̱o/ um mo dhali um mini ta iman/o gwom pem e Pa Urushaliim mo dhali e Bampa/ gi Pa Yahuudiyya ’baar mo dhali e Pan Saamira mo dhali ntagi mo e mony’cesh jin di’d isa dhana/ nnii mo be. 9Dhali ki a’di oki gwo gwansan ki uni ’kon mmohil a’di mo tani a’di ’de’kkunu bway momis mo dhala raḵ ki bu’th a’di mo, mmotiḵ uni e mo be. 10Ki uni ’kon mmohil momis ka ’thime/ mo tani hili ma, ’kwaniŋ gwasi su/ kun hi’thki burrinyeŋ kush mo doshkin i’ko’d gwari uni mo be. 11Uni si’da/ o gwo mo ki: Um ’Kwani gi Pany Jaliil. Ata hila um momis ka ’thime/ kan mo? Yesus yan jin budhu mo ’peni um mo e bwam momis mo tani a’di midi doḵ/e yayu/ wakan me’dyan p̱ara um a’di e mo mmoya momis mo be. 12Yan’ko’d uni doḵkin e Pa Urushaliim ka nyaŋ’ko’d mo ’peni Wosh jin yuḵu ka Seṯuun jin ’dishi Pa Urushaliim is mo jin wana e ki mo jin mishu ii ka cim ma pesu/ mo be. 13Ki uni sekin mo tani uni iikin ’kup̱ ki mis e gu’b jin nyaŋu ka maḵamp̱o/ ap̱owa kamu/ mo, jin ’kona uni nycine/ mo, Buṯerus dhala Yohaan dhala Yakuub dhala Andaraawus dhala P̱ilibbus dhala Ṯuuma dhala Barṯulamaawus dhala Maṯṯa dhala Yakuub ya/ ma Halp̱a dhala Simaan El Ghayuur dhala Yahuusa ya/ ma Yakuub mo. 14Uni gwansani ’baar mo i’kon mo e gwon ṯal ’de/ mo mmoroc̱ sho’k ki sule/ e mon’tho mo, uni ki up̱ si’da/ mo dhala Mariyam jin ta KoYesus, uni ki ikam piti ilu/ mo be. 15Dhali ka cim gwansan mo tani Buṯerus doshki’d ki mis mo ibwaman ma waḵ buni mo dhali o gwo mo ki: (dhala waambuhany ’kwani tul isi monṯal ’de/ mo uni wana e ki issi pe’de/ mo be). 16Awaḵ pema, a’di minu mii mii mo ki Gwo ma Arumgimis midi pu’du/ mo jin okina Shi/in Dheleladhelel nṯwa/a/ ki ’twa/ ma Dawuu’d goma Yahuusa jin ta’da manshu uni bway kun bu’thkina Yesus mo. 17Haali/ a’di mishu ki a’din ṯal ’deŋ kamu/ ’peni bwam ana mo dhali ’ban piti butha a’di si’da/ e mii yan mo. 18(Dhali wathi/ yan gam mombunto ki to jin c̱inu a’di mo gom miinthus piti mo be. Dhali mmobiṯa a’di bwam/em pitiya ’cesh kan mo tani bwam piti ’twaḵka’d mo dhala ’colem piti ’baar mo ṯẖa’thka’d ka pije/ mo be. 19Dhali a’di warki’d ki mo jin mishkunu mo e bwaŋ ’kwani gi Pa Urushaliim kagahara mo ki mombunto yan yuḵu ki ’twam buni ka Akeldama jin o ki: mombunto ma bas mo). 20Haali/ a’di ’kwarkunu mo eya warka/ ma Masamiir mo ki: Dhalki monyc̱a’b piti warki’d ki mombwamma’du/ mo dhali dhalki wathiŋ kamu/ ki mii dhal bway mo mmoc̱a’bi mo yan mo. dhali Dhalki mom piti butha wathiŋ kamu/ mo. 21A’di mina ṯal ’deŋ kamu/ mii war ka man/o gwo nyaḵki ana mo gom mompinum piti mo tani ṯal ’de/ ’peni bwaŋ ’kwani kun nyaḵ ’ko ki ana ka cimi ’baar mo ki Tap̱a Yesus yuthurki’d e bwam ana mo 22mmoṯel ’pen ka cim jin miin ma Yohaan a’di ki yi’de/ mo ntaga cim jin budhu a’di mo ’peni bwam ana mo. 23Dhali uni ki kwany ’kwani isu/ mmoṯor uni eya tente/ mo, Yuusup̱ jin yuḵu ka Barsaaba jin yuḵu ki gwaya kamu/ ka Yusṯus si’da/ uni ka Maṯṯiyaas mo. 24Dhali uni ’thon mo dhali o gwo mo ki: /En Tap̱a jin mishki’da duŋ ’kwani ’baar mo tani ṯori ’peni bwam uni su/ mo a’din ṯal ’de/ jin kwanykina /e mo 25mmobu’th mo mii yan mo dhali mo ma mankar ma Yesus ki she/ yan jin this ma Yahuusa e mo gom a’diŋ gwom piti ki a’di midi ya mo e mom piti mo be. 26Dhali uni ki biṯ to gom uni mo tani to biṯki’da p̱owa Maṯṯiyaas mo dhali a’di nyaḵu gway deŋ e ki imandhun ma Yesus gwansan ki she/ kun ’koni ’kume’d i’ce’dka ’de/ mo be.

will be added

X\