TASALUNIIKI SU/ 3

1Ḵwalany ’te/ be, iwaḵ mo, ’thoyi gom am mo, ki gwo gi Tap̱a midi p̱ala/ ki lala’th mo dhali p̱i mii e mo me’d mii jin miikina a’di e bwam um mo 2dhali ki aman minu ’cuḵ mo ’peni ’kwani kun daran gi ’ce mo dhali kun ta thus ki thus mo. Haali/ ’kwani ’baar mo yisa ta gi gwo jin gamu is mo yisa. 3Hili Tap̱a a’di ta a’di isiŋ gana/ mo. A’di midi ’bi’th um is mo dhali ji um ’peni a’dinthus ’de/ yin mo. 4Dhali aman takina gi mo jin wukina aman Tap̱a jwa i is mo gom um mo ki um ’kon mmomii to shwanetan mo dhali ki um mini mii to kun ḵankina aman um gwo mo be. 5Dhalki Tap̱a a’di c̱u’thki’da dum bum mo e mo/en mo goma Arumgimis mo dhali e sho’k jin ṯelu mo eya Ḵrisṯẖos mo be. 6Dhali shwane/ aman ḵankina um gwo mo iwaḵ mo, e gway gi Tap̱a Yesus Ḵrisṯẖos bana mo ki um mini non is bum mo ’peni ikana tiya mo, uni kun ’kokin mo e mo ma p̱iny is mo dhali yisa isi e gwo jin luḵu mo jin bu’thkina um ’peni aman mo. 7Haali/ um ki is bum mishki mo mo gom um ḵa ba/ imini ta imanthoḵ aman mii mo. Aman ’konaki ta ap̱iny is mo me’d jin ’kokina aman e um mo. 8Aman ’konaki shwa tonṯe/ gi wathin ṯal ’deŋ kamu/ mo ki dar gi to jin ro’du mo. Hili ka ṯu’c bam jin ’batha’ba’th mo dhali ki miin to jin miikina aman ki mon’thiny ilu/ mo dhali ki montee mo tani ki aman mina ’taki ’koki dhu ton diṯini ’ba/ aciŋkamu/ ’peni um mo. 9A’di yisa wakana haali/ aman ’konuki dhal bway mo mmomii kan mo, hili mmoc̱i um e miim bam kun boṯa am mo mmota she/mm mo ki um mini ta imanthoḵ aman mii mo be. 10Haali/ isi kani me’d jin ’kokina aman e um mo tani aman c̱ikina um gwoŋḵan yansan mo ki: Waḵki/ wathin ṯal ’deŋ kamu/ midi diki miiya ṯu’c mo tani dhalku/ ki dhal a’di bway mo mmoshwa tonṯe/ mo. 11Haali/ aman ciḵkina gwo mo ki uma tiya ’kokin mo e mo ma p̱iny is mo, dhali ta imankul gu’b ’te/ mo, mmo’koki miiya ṯuca tiya mo ’te/. 12Dhali ’kwani gi wakansan mo tani ḵankina aman um gwo mo dhali malas mo e Tap̱a Yesus Ḵrisṯẖos mo mmomii to ki me’d buni ki shwam mo dhali mmogam to ka ṯu’c buni jin mina uni mii ta mo. 13Iwaḵa, dhalku/ is ki wu e mo mmomii miim ’borga/ mo. 14Waḵki/ wathin ṯal ’deŋ kamu/ midi ush gwo ha e mo jin ona aman mo eya warka/ yansan mo tani buḵi wathi/ yan ka pije/ mo dhali dhalku/ a’di ki ’dish is mo mmonyaḵ to mii ki a’di mo ki a’di mina isi ’theya ’the mo. 15Dhali dhalku/ ki hil a’di me’d a’di jin ta ’kup̱ ki um mo, hili rumi a’di ki gwo mo me’da kam bum mo. 16Dhali shwane/ dhalki Tap̱a gi moŋḵu’th is ki is piti mo c̱i um moŋḵu’th is mo eya ris mo ’baar mo dhali ka ris ’twaŋkal kuku/ mo. Tap̱a midi di nyaḵki umi ’baar mo. 17Aha/ Buulus ’kwarkina monthe me’d yansan ki me’d pem gana/ mo. A’di ta’da du’d mii kun ’kwarkika/ eya ris gwom pem mo. A’di ta miim pem jin ’kwarkika/ gwo mo. 18Dhali a’the gi Tap̱a Yesus Ḵrisṯẖos bana midi di e umi ’baar mo be.

will be added

X\