KURINṮH̱UUS SU/ 7

1Me’d jin takina ana gi gwo gwansan gun onu is mo tani um gun enu mo tani dhalki ana dhelela is bana mo ’pena ris mii gun nyo/i buŋgwar isi ’baar mo dhali shi/in mo mmosus mo jin ḵogu ki jaro/ jaro/ mo e moŋḵo/ goma Arumgimis mo. 2Ḵa’di adum bum gom aman mo. Aman ’konaki ṯẖu’th to mii e jan ṯal ’deŋ kamu/ mo. Aman ’konaki p̱u/ jan ṯal ’deŋ kamu/ mo. Aman ’konaki bu’th shi/ miim ’boro’da kamu/ gom jan ṯal ’deŋ kamu/ mo. 3Aha/ dinaki o gwo yansan mo mmowaḵ um mo haali/ aha/ ona gwo yansan nṯwa/a/ mo ki um dhuna aman mo eya dum bam mo, mmowu mmonṯal ’de/ mo dhali mmo’ko ki e e monṯal ’de/ mo be. 4Aha/ tana gi dhan mo jin wuka/ um jwa i is mo. Aha/ tana gi dhan mo jin karka/ is ki ca mo gom um mo. Aha/ ’tu’dkunu mo ki momalas mo. Ki mom bami ’baar mo jin ṯoju aman bwa mo tani moŋ’kuny bwam pem guski’d ki sho’k piti mo be. 5Haali/ isi kani ki aman p̱u’dkina mo e Pam Makiduniyya mo tani buŋgwar is bam yisa gamki mo ma si/isa kamuwa, hili aman ṯo’ckunu bwa mo ka ris mo jin ṯuku mo, mo/as ki us mo dhali ki moŋḵo/ is e bwaman mo. 6Hili Arumgimis a’di jin malaski a’di jin biṯkunu bwa ka luŋgu’b mo tani malaski aman mo gom p̱u’d jin p̱u’dkin ma Tiithus mo be. 7Dhali yisa jasi gom p̱u’d jin p̱u’dkina a’di ’te/ mo, hili si’da/ ki momalas jin malaskina a’di um mo ki gwo jin ṯorkina a’di aman mo gom ḵwa/am bum jin ’koshki um mo, dhali gom kom bum jin gwokina um mo, dhali gom mii jin shwa uma nyor ka nyor mo gom aha/ mo, wakan ki aha/ mina bwa ’kuny kagahara mo be. 8Haali/ isi kani waḵki/ aha/ raḵa um mmoḵal bwan diṯi’d mo gom gwom pem jin ’kwarkika/ um mo tani aha/ yisa guna is mo gom a’di mo (ba aha/ gukina isi ṯwa/a/ mo be) haali/ aha/ nyiṯẖkina ki gwo yansan jin ’kwarkika/ um mo tani jwakaṯki um mo be, bahili jasi gom ari mo mo. 9Ki a’di gi wakan mo tani aha/ ’kunykina bwa mo, yisa haali/ um jwakaṯkunu mowa, hili haali/ um jwakaṯkunu mo e mo jin susu mmorica du is mo. Haali/ um suruna ki monyjwakaṯ mo jin ta a’di ’peni Arumgimis mo, wakan ki um mina isi ’koki ’kosh ka nyor gom toŋ kamu/ jin thisu e mo gom aman mo be. 10Haali/ monyjwakaṯ ’peni Arumgimis mo a’di ki wagas mo jin rijuwa du is mo jin shu’di tagi bway mo jin tanuwa ta is ki me’d jin diki sus e mo jin ’donu is mo, hili monyjwakaṯ jin ta ji gi ’kwaniny’cesh mo tani a’di wagaski mowu mo be. 11Haali/ hili ma, mo jin gwona bwa ka daran du mo monyjwakaṯ yan jin ta ji ’peni Arumgimis mo tani a’di wagaskunu mo e um mo, mom’ba/ jin ganankina um mo mmoṯor markin bum mo ki is bum mo, mo ma nyor jin deḵki um mo, dhali mo ma ayy/ayy/ayy/am bum mo, dhali moŋḵwa/am bum jin ’koshki um mo, dhali mii jin shwa uma nyor ki thiṯẖ dhali ajisa jin gamkunu mo be. Eya ris mii jin su’kkina um mo tani um ki is bum nyo/kunu mo ki ku gun ’kona mii ki ’ko ’ba/ mo goma ris mii kun ’konu ki baṯẖ mo be. 12Wakan, aha/ bala ’kwarkina gwo e um mo tani hili yisa gom a’din ’de/ yin jin ṯẖu’thki to mii mo walla gom a’din ’de/ yin jin ’koshkina is ka nyor mo gom mii jin ṯẖutha a’di mii mo yisa, hili ki mo jin shwa uma nyor ki thiṯẖ mo gom aman mo jin minu ’taki ṯor mo eya tente/ gom um e jis/e ma Arumgimis mo be. 13Wakan aman malaskunu mo be. Dhali ki momalas ganam bam jin ’ce’du ’ba/ mo tani aman ’kunykina bwa kagahara mo e moŋ’kuny bwa ma Tiithus mo haali/ adum piti a’di sikunu is mo gom umi ’baar mo be. 14Haali/ waḵki/ aha/ ṯorkina a’di gwoŋ kamu/ mo gom mmokarka/ is ki ca mo gom um mo tani aha/ yisa karu ki mon’the is yisa. Hili jasi me’da ris gwo ’baar mo kun okina aman e um mo tani ta gwoŋ gana/ mo tani wakan ’bam bam jin dhuna am ki ca mo e bwambor ma Tiithus mo tani a’di nyo/kunu ki nyo/ gana/ mo be. 15Dhala dum piti p̱u’dki’d ka pije/ ’baar mo kagahara gom um mo me’d jin kakina a’di gwom bum e jin hakina um e ’baar mo dhali moŋḵo/ jin ḵoka/ um mo dhali adee jin deekina um mo a’di jin bu’thkina um a’di mo be. 16Aha/ ’kunykina bwa mo haali/ aha/ takina gi mo jin wuka/ um jwa i is mo jin ’boro’d ki ’bor gana/ mo be.

will be added

X\