KURINṮH̱UUS SU/ 3

1A/aman ṯelkina mii ’pen mo mmoha me’d doḵ/e ibwambori uma? Walla aman mina mii ta gi gwo jin ’kwarkunu mo gom miim ’boron bam mo me’d unin tiya gun miin kan mowa? Walla gwo wakan ’peni uma? 2Um ki is bum ta gwo jin ’kwarkunu mo mmoṯor miim ’boron bam mo kun ’kwarkunu mo eya dum bum mo kun minu mish mo dhali kun minu deŋ e mo ki ’kwani ’baar mo be. 3Dhali um ṯoru mo ki um ta gwoŋ ’kwar ’pena Ḵrisṯẖos mo a’di jin c̱ikina aman um mo. A’di yisa jin ’kwarkunu mo ka galama risha, hili ki Shi/in Dheleladhelel ma Arumgimis jin di ki e mo, yisa ap̱o/ wosha pa’dga/ mo hili adum pa’dga/ gi wathimpa en’thi/ mo be. 4Jwa jin wuna amana wu i is mo tani eya Ḵrisṯẖos mo ’kup̱ ka Arumgimis mo be. 5Yisa mmotana aman uni kun mini ’kosh jwa mo ki is bama mmose gwoŋ kamu/ i is yisa me’d jin yayi’d ’peni aman mowa. Mom bam jin ’kosha aman jwa mo tani ’peni Arumgimis mo be, 6a’di jin thumki aman mo mmota ku gi mini mii to mo gom gwon this jin gamu me’d mo, yisa e gwoŋḵan jin ’kwarkunu mo, hili e Shi/in mo be. Haali/ gwoŋḵan jin ’kwarkunu mo tani a’di ’koshki’da ’kosh mo, hili Shi/in a’di c̱iki mondiki/e mo be. 7Dhali waḵki/ mo jin ’dap̱u/ isi jwa mo, a’di jin c̱ikunu jamas mo ap̱o/ wosha pa’dga/ mo p̱u’dki’d mo ki mo jin mii ki ra/ ra/ mo, ki ’Kwani ma Israyiil mol bwam/e ma Musa p̱ar e mo kan gom mondhel piti mo, mmothiskina a’di e ki liw liw kansan mo tani 8ata gara/ imina mo jin ’dap̱u/ isi jwa mo jin ta gi Shi/in mo ’taki ḵu’th is mo ki mii jin miinu ki ra/ra/ kagahara ki nyanye/ mo? 9Haali/ waḵki/ mo jin miinu ki ra/ra/ di’d mo gom mo jin ’dap̱u/ isi jwa mo gom miiwaḵ mo tani mo jin ’dap̱u/ isi jwa mo gi mii ma ḵar/e mo midi mii se ka pije/ ki ra/ra/ mo mmobol jin ṯwa/a/ e kagahara mo be. 10Dhali ka jiŋ gana/ e shushan mii yansan mo tani mo jin mii ki ra/ra/ mo tani wara’d ki mo ma ra/ra/ jin diki p̱i ari shusha kamu/ mo haali/ mo ma ra/ra/ jin ta jiŋ ’ko’d jin bol a’di e mo be. 11Haali/ waḵki/ a’di jin ’baarkunu mo pu’dki’d mo ki mo ma ra/ra/ mo tani a’di jin midi di kan ka go/ mo midi mii ta gi mo ma ra/ra/ kagahara ki nyanye/ mo be. 12Me’d jin tana aman gi mo ma ’teŋ kap̱e/ gi wakan mo tani aman tana ku gi ’koki ju/ kagahara mo be. 13Yisa me’da Musa a’di jin kumki bwam/em piti ki burrinye/ mo, wakan jin mina ’Kwani ma Israyiil ’koki hil mo ma ra/ra/ jin midi ’baar mo me’d jin sula a’di mo. 14Hili adum buni ’bi’thkin ki ’bi’th mo. Haali/ ntaga tee yansan mo tani ki uni deŋki gwon dhamo/ jin gamu me’d e mo tani burrinyem bwam/em buni yansan di’d naskina/ kan ki dar gi momp̱e’d mo haali/ jasi eya Ḵrisṯẖos mo tani a’di ḵalki a’di mo be. 15Nye, ntaga tee yansan mo me’dyin deŋkina uni Gwo ma Musa e mo tani burrinye/ ki kum uni adum buni ’kup̱ mo be. 16Hili waḵki/ wathi/ ki ṯu’k mo e Tap̱a mo tani burrinye/ a’di p̱e’dkunu mo be. 17Dhali shwane/ Tap̱a a’di ta Shi/in mo dhali mo jin dina Shi/in gi Tap̱a mo tani a’di idina mo kun ’konu ki ’kus mo be. 18Dhali ana ’baar mo dara gi bwam/e kun kumu mo mmohilkina ana monyca gi Tap̱a mo dhali mondhel jin dhelu/ mo mo tani ana ’kokunu mo mmo/aḵ e mo e jamas piti mo ’peni monycan ’deŋ kamu/ itan monycaŋ kamu/ mo. Haali/ monyca yansan p̱u’dki’d ’peni Tap̱a mo, a’di jin ta Shi/in mo be.

will be added

X\