KURINṮH̱UUS SU/ 2

1Haali/ aha/ dina gwo ibwa mo yisa mmoyaku/ ibuṯi um mo ki gwo jin midi c̱i’th uma du mo. 2Haali/ waḵki/ aha/ raḵa um c̱idhuwa du mo tani aja a’di midi mii aha/ ki bwam ’boro’d mo, hili a’din ’de/ jin c̱i’thka/ adu mowa? 3Dhali aha/ ’kwarkina a’di me’d jin miikika/ mo, wakan ki me’d jin p̱u’dkika/ mo tani aha/ minu ’koki c̱itha du ki uni gwansan kun mini ’taki ’koki mii aha/ ki bwaŋ ’kunyga/ mo. Haali/ aha/ misha ki isa duŋ gana/ gom umi ’baar mo ki moŋ’kuny bwam pem mo tani midi ’taki ta moŋ’kuny bwa gom umi ’baar mo be. 4Haali/ aha/ ’kwarkina a’di i um mo ’peni bwa jin ṯoco’d mo dhali ka du jin ’pe’d she/ mo dhali ki jabu’th jin up̱ka/ mo e em pem mo, yisa mmoraḵ um c̱idhuwa dum bum mo yisa, hili mmodhal um bway mo mmomish mo/en jin ishki’d ka enthus mo, a’di jin takika/ mo gom um mo be. 5Hili waḵki/ jan ṯal ’deŋ kamu/ raḵki mo jin c̱idhuwa du mo tani a’di raḵki a’di mo yisa gom aha/ mo, hili ki shem boc̱ mo, – a’di yisa ta gwo jin onu ki ’bitha – gom umi ’baar mo. 6Haali/ gom wathin ’de/ wakan mo tani ajisa yansan jin dhukina ’kwani ka woho/ mo tani a’di ’kosh jwa mo be. 7Wakan um mini ’taki mii dhal mii e i is mo mmoṯu’k mo mmodhal a’di amure/ miinthus piti ’pen mo dhali malas a’di mo, walla a’di minu kumki ’twa/a ’cesh mo ki bwa jin diṯadiṯ ki nyanye/ mo. 8Wakan aha/ yuḵa um mo mmo’deki a’di mo ki mo/en bum mo gom a’di mo be. 9Haali/ gom mii gi wakan mo tani a’di ’kwarkika/ gwo yan mo ki aha/ mina nyo/ um mo dhali mish gwo ’ban mo waḵki/ um ta imanha gwo e mo gom to ’baar mo be. 10A’din ’de/ yin jin mina umi dhal miinthus piti ’pen mo tani aha/ si’da/ mina dhal a’di miinthus piti ’pen mo be. A’di jin dhalkika/ miinthus piti ’pen mo tani waḵki/ aha/ dhalkina miinthus ma ciŋ kamu/ ’pen mo tani a’di dhalkika/ mo gom gway bum mo e buŋ’kus ma Ḵrisṯẖos mo be, 11mmonona Seṯaan ’twa/ mo ’peni mmogam uma du is ki me’d mo gom shi/ miim ’boro’d apo/ ana mo. Haali/ ana yisa tana p̱us mo goma maḵ piti yisa. 12Ki aha/ pu’dkina mo e Pan Taruwaas mo mmoc̱i gwom ’borga/ ma Ḵrisṯẖos mo tani acampur a’di ḵa’dkunu aha/ mo e Tap̱a mo be. 13Dhali hili adum pem yisa mish ta gi mosi/is yisa haali/ aha/ dinaki gam akam pem ka Tiithus imun mo. Wakan aha/ bu’thkina moyam pem mo mmoya mo ’peni uni mo mmoya ki sule/ e Pam Makiduniyya mo be. 14Hili mom’bor bwa i is mo midi di mo goma Arumgimis mo a’di jin di’d eya Ḵrisṯẖos mo jin di’d mo mmoshu ana bway mo isa yempa/ mo e momp̱i mii e mo dhali e ana mo tani mo jin teru/ mo eya ris mo ’baar mo goma shima ḵuyga/ gi moyuḵ piti mo be. 15Haali/ ana tana ashima ḵuyga/ jin c̱ii mo eya Ḵrisṯẖos mo goma Arumgimis mo e bwaman uni gwansan kun takunu is ki me’d mo dhali e bwaman uni gwansan kun ’ce’dki sho’k mo be. 16E jan ’deŋ kamu/ mo tani ashima ḵuyga/ jin ḵuyi mo ’peni wu, itan wu mo dhali e jaŋ kamu/ mo ashima ḵuyga/ ’peni mondiki/e, itan mondiki/e mo. Kaja a’di i’koshki jwa mo gom to gwansan mo? 17Haali/ aman yisa wana e ki ’kwani ka risa, uni gun laṯ ’kwani e gi gwo ma Arumgimis mo. Hili mmota ’kwani kun daran ki washila/ mo ki gwoŋḵan ma Arumgimis mo dhali e jis/e ma Arumgimis mo tani aman ṯorkina gwo mo goma Ḵrisṯẖos mo be.

will be added

X\