KURINṮH̱UUS SU/ 1

1ABuulus a’di jin karu ki she/ mo goma Ḵrisṯẖos jin ta’da Yesus mo ki bwa ma Arumgimis mo, dhala Ṯimuṯẖawuus jin ta’da kam bana mo. Eya ḵaniisa ma Arumgimis mo jin di’d e Paŋ Kurinṯẖuus mo nyaḵkaa ris uni kun dhunu ki she/ ki dhelel dhelel mo, uni ’baar mo kun ’kokin mo e Pa Aḵaa/iya mo. 2A ’the e um mo dhali moŋḵu’th is ’peni Arumgimis jin ta’da Babam bana mo dhali Tap̱a Yesus Ḵrisṯẖos mo be. 3Mom’bor mii midi di mo goma Arumgimis mo dhali Ababa gi Tap̱am bana ka Yesus Ḵrisṯẖos mo, a’di jin ta’da Baba jin cila momiimii mo dhali Arumgimis jin ta ji gi momalasi ’baar mo tani 4a’di jin malaski ana mo eya ris monṯo’c bwam bana mo, wakan ki ana mina mish malas uni gwansan kun ’kon si’da/ e monṯo’c bwa mo ki malas jin malaskunu ana ki is bana mo ’peni Arumgimis mo be. 5Haali/ me’d jin pwaḵkunu ana isa nyor ma Ḵrisṯẖos ki nyanye/ mo jin ’koshki a’di mo tani wakan si’da/ eya Ḵrisṯẖos mo tani ana minu pwaḵ momalas si’da/ ki nyanye/ mo be. 6Waḵki/ aman ṯoju bwa mo tani a’di ta mii gom momalas bum mo dhali bway mowoṯẖ mo. Dhali waḵki/ aman malaskunu mo tani a’di si’da/ ta mii gom momalas bum mo jin wana gwo um kani bwa mo ki um ’kuc̱ki bwa mo ki ’kari’th mmo’dim ’kup̱ mo e mo gi isa nyor yan jin nyaḵka’d ki kun ’koshki am mo be. 7Mo ma ’teŋ kap̱em bam mo gom um mo tani a’di molu yiḵin is mo haali/ aman misha ki um pwaḵki mo gi isa nyor baman bwa mo tani um si’da/ minu nyaḵ momalas baman pwaḵ mo be. 8Haali/ aman ’tena bwa jin mina umi ta p̱us mo, iwaḵ mo, gom monṯo’c bwa jin wa aman kan e bwa mo e Pa Asiyya mo haali/ aman ’kokina mo wakan ki ji uṯẖ mo mmomol to ḵal kun ’thir aman mo haali/ moŋ’koki/em bam muru’di us kan mo be. 9Hili aman ṯoshkina ki aman bu’thkina gwon dwall jin toru ’twa/a ’cesh mmowu mo. Hili a’di yansan mmodhu aman mo mmo’koki cesh mo ki is bam mo, hili eya Arumgimis mo a’di jin ’de’kki ku gi wukin mo be. 10Hili a’di ’cuḵki aman mo ’peni mowu yan jin caaca kagahara mo dhali a’di midi ’cuḵ aman mo. Eya p̱o/ a’di mo tani aman dhukina mo ma ’teŋ kap̱em bam mo ki a’di midi ’cuḵ am doḵ/e mo be. 11Um si’da/ mini mii woṯẖ am ki mon’tho mo, wakan ki ’kwani ka ris mini mii c̱i mom’bor bwa i is mo ap̱o/ gway bam mo gom mom’bor mii mo jin c̱ikunu aman mo gom gwo ka ris jin thoḵu mo goma ’tho ka ris kun ’thonu mo. 12Haali/ ’bam bam kun dhunu aman ki ca mo tani ta cikise/ mo be jin ta gwo jin c̱inu mo gom ’twa/ ma dum bam mo ki aman boṯkina ki mii e mony’cesh mo dhali ki nyanye/ mo tani aman miikina a’di ’kup̱ ki um mo ki mii jin ḵogu mo dhali ki mii ma gayiin mo dhali ki mii jin daru gi washila/ mo, yisa ki moyuḵ gi mony’cesh yan mo, hili ka ’the ma Arumgimis mo be. 13Haali/ am ’kwara um gwoŋ kamu/ ka wuny is yisa, hili ki gwo jin mina umi mish deŋ e mo dhali mish ’ban mo. Aha/ ṯosha ki um mini mish a’di ’bani ’baar mo ki dhegem mo. 14Me’d jin mishkina um a’di ’ban ki ’bana kamu/ mo tani ki um mini mish dhu ’ba/ ki ca mo gom aman mo me’d jin misha aman ’ba/ dhu gom um mo ka tee gi Tap̱a Yesus mo be. 15Haali/ aha/ misha ki isi mish gana/ mo gom a’di yan mo, ki aha/ okina bwa mo mmoyaku/ i um iṯwa/a/ mo, wakan ki um mini ta gi bwam ’boro’d ka ’buḵum ’ban mo be. 16Aha/ okina bwa mo mmobuṯi um mo e bway pem jin yaka/ mo e Pam Makiduniyya mo dhali kulu/ i um ka nyaŋ’ko’d mo ’peni Pam Makiduniyya mo dhali jin mina umi sus aha/ mo e bway pem mo e Pa Yahuudiyya mo be. 17A/aha/ tana aman/aḵ bwa e mo mmo/o gwo mo ki mii to yansana? Dhali aha/ thosonkina miim pem mo me’d wathi/ gi mony’cesha jin nyoŋ is mo mmo/o gwo mo ki: Nye dhali Yisa, ki ḵup̱a? 18Haali/ ka jiŋ gana/ me’d jin tan ma Arumgimis a’di isiŋ gana/ mo tani gwom bam e um mo diki ta gwo ma Nye mo dhala Yisa mo be. 19Haali/ Ya/ ma Arumgimis mo jin ta’da Yesus Ḵrisṯẖos mo tani a’di jin c̱ikina aman gwo e bwam um mo tani dhali iSilwaanus dhala Ṯimuṯẖawuus mo dhali aha/ mo tani yisa ta gwo ma Nye mo dhala Yisa mo, hili eya Yesus mo tani isa yempa/ mo tani a’di ta gwo ma Nye mo be. 20Haali/ aris gwo kun on ma Arumgimis is mo tani gamki gwom buni jin onu ki Nye e a’di mo be. A’di be ta ’pemen gwo jin ona ana gwo ki Amen e a’di mo gom monyca ma Arumgimis mo be. 21Hili a’di ta’da Arumgimis be jin ṯelki aman sho’k mo nyaḵki um eya Ḵrisṯẖos mo dhali gwom piti jin ḵankina a’di am mo be. 22A’di karki mon’dap̱ piti ap̱o/ am mo dhali c̱iki aman Shi/in piti eya dum bam mo me’d to jin woṯẖu/ ’twa/ mo be. 23Hili aha/ yuḵkina Arumgimis mo mmota aman/o gwo ap̱o/ aha/ mo. A’di ta gwo mmo’tash um ’twa/ mo ki aha/ tuḵkina is pem mo ’peni mo jin miga/ ’taki yaku/ e Paŋ Kurinṯẖuus mo be. 24Yisa mmomiina aman miin tap̱a ap̱o/ moŋgam gwo is bum mo yisa. Aman miikina aṯu’c nyaḵki um mo gom bwaŋ ’kunygam bum mo haali/ um doshkin mo mmoṯel sho’k mo e moŋgam gwo is bum mo be.

will be added

X\