ṮIMUṮH̱AWUUS ’DE/ 5

1Dhalku/ wathiny ca’d ki ḵucur mo, hili malasi a’di mo me’d mii jin mina /e mii cim mo. Usi ’kwanin dhuru’c is mo me’d ikam pini mo. 2Wakan si’da/ up̱ kun tana ṯi/ mo me’d ita’dam pini mo, dhali up̱ kun ta dhuru’c mo me’d i’bwahan mo, eya ris mii ’baar mo kun dheleladhelel mo. 3Taḵi up̱ kun wuna ikaṯẖ ki wuŋ gana/ mo. 4Waḵka ’boma kamu/ jin wun ma kaṯẖ mo ta’d gi uc̱i mo walla uc̱i gi uc̱im piti mo tani dhalki uni nṯwa/a/ da/ar gwo mo gom ji gi luŋum buni mo gom mii jin minu mii mii mo goma waḵ buniŋ gana/ mo mmoc̱i ton tiya ka nyaŋ’ko’d mo gom ita’dam buni mo dhali icom mo. Haali/ mii yansan a’di mishu bu’th mo e jis/e ma Arumgimis mo. 5Ayim jin wun ma kaṯẖ ki wuŋ gana/ mo dhali jin dhalu a’di ’de/ mo tani ayim karki mo ma ’teŋ kap̱em piti ap̱owa Arumgimis mo dhali ṯikirki mii mo mmodi’ba di’b is mo dhali ’tho mo ki mon’thiny ilu/ mo dhali montee mo. 6Ayim jin momoṯki’da dum piti mo tani a’di di’di mowu mo isi kani me’d jin din ma yim ki e mo. 7Ḵani gwo yansan mo wakan ki uni mini ’ko ki dar gi mii jin waḵuwa waḵ mo. 8Waḵki/ jan ṯal ’deŋ kamu/ diki thip̱a waḵ pitiŋ gana/ mo tani a’di waṯki gwo jin gamu is mo, dhali a’di boli wathi/ jin diki gam gwo is e ki shi/ mo. 9Dhalku/ ki dhal jan ’deŋ kamu/ bway mo mmonyaḵ gway ’kwar ki uni kun wuna ikaṯẖ mo kun aṯẖa yili issi kwara mo walla kun mashkunu mo ’thissa/ kagusha niin mo. 10Dhala yim minu mii o gwo maŋ mo gom miim ’borga/ ma yim mo me’d jan ’de/ jin thip̱ki uc̱i mo mmoṯor mii jin minu ta gu’b piti ŋal mo, mmolam uni kun dhunu ki she/ ki dhelel dhelel sho’k mo, mmowoṯẖa/ woṯẖ mo gom uni kun ṯoju ’kus mo, dhali is ma yim jin kara a’di ka gayiin mo mmomii mii kun ’boron eya ris ’twaŋkal kuku/ mo. 11Hili ushi uni gwansan gway ’kwar mo, uni kun ta dhuru’c kun wuna ikaṯẖ mo. Haali/ ki uni cana bwa en’dap̱ buni mo ap̱owa Ḵrisṯẖos mo tani uni ona bwa ki mash mo 12dhali wakan uni tulki miiwaḵ is mo mmo’ce’dkina uni gwom buni kun ṯwa/a/ kun ona uni is mo. 13Ki mii yan jin ’ce’de’da p̱o/ mo tani uni da/arki mii mo mmota p̱iny is mo dhali ta imanthap̱ gu’b ki sho’k mo dhali yisa mmotana uni jasa p̱iny is ’te/ yisa hili si’da/ uni tana le’d ka le’d mo dhali ta imankul gu’b ki kul kul mo mmoham gwo mo, mmo/o gwo mo kun mina uni ’taki ’koki o mo. 14Wakan ba/ aha/ ona ki uni gun ta dhuru’c kun wuna ikaṯẖim buni mo tani dhalki uni mashan mo mmodho’th uc̱i mo, mmoji gu’b buni mo, dhali mmo’koki c̱i a’di jin ta ’kup̱ embula kamu/ mo mmosor ana mo. 15Haali/ kun tiya uni hila/ perkin mo mmobaṯẖa Seṯaani sho’k mo be. 16Waḵka ’boma kamu/ jin gami gwo is mo ta’d ga waḵ piti kun wuna ikaṯẖim buni mo tani dhalka yim woṯẖ uni mo jin mina ’kwaniŋ ḵaniisa ’koki ḵal mii kun diṯadiṯ mo, wakan ki uni mini woṯẖ uni gwansan kun wuna ikaṯẖ ki wuŋ gana/ mo. 17Dhalki jwahaŋ ’kwaniŋ ḵaniisa uni kun ji mo ki ’bore/ mo, dhunu ki uni gun ha me’d mo ki montaḵ ka ’buḵum ’ban mo, ki nyanye/ gom uni gwansan kun mii to mo mmoc̱i gwo mo dhali mmoṯor gwo mo. 18Haali/ Gwo ma Arumgimis jin kwarkunu mo o gwo mo ki: /E mini dhalka morbip̱ ki ’kamu’th ’twa/ mo ki a’di di’d mmotor pos ki sho’k mo, dhali, Amanmiiya ṯu’c minu mii c̱i to jin ha me’d ka ṯu’c piti mo. 19Dhalku/ ki gam gwo me’d ap̱o/ wathiny jwahan ’deŋ kamu/ ki sule/ sule/ mo isi ciki/ mo gwo jin mishu eya tente/ mo ki ’twaŋ ’kwani su/ mo walla ki ’twaŋ ’kwaniŋ kwara mo be. 20Gom uni gwansan kun ush miinthus daḵ mii mo tani ḵucuri uni mo ibwambora ris ’kwani ’baar mo, wakan ki unin tiya si’da/ mini ḵo/ is mo mmodosh mo. 21E buŋ’kus ma Arumgimis mo dhali eya Ḵrisṯẖos jin ta’da Yesus mo dhali e iman’doyu gwom piti mo kun kwanykunu mo tani aha/ ḵana /e gwo mo mmodhuwa ris gwoŋḵan gwansan mo ki dar gi mii jin miinu ’peni gwo jin di’di bwa nṯwa/a/ mo walla ’peni mii jin miinu ka gwar ’de/ mo. 22Dhalku/ ki la la mo e mo jin dhuna ’kwani me’da p̱o/ ’kup̱ wathi/ mo, walla mmonyaḵ miinthus mii jin miina wathiŋ kamu/ mo. Kari is pini ki dhelel dhelel mo. 23Dhalku/ ki p̱i jasi yi’de/ mo naskina/, hili p̱iyi ari yiman amura’th mo gom gway gi bwam pini mo dhali gom ’ba’th pini jin ’kosh /e ki jahanne/ jahanne/ mo. 24Miinthus gi ’kwanin tiya mo tani uni mishu eya tente/ mo, dhali uni dhunu eya tente/ mo gom gwon dwall mo, hili miinthus gi ’kwanin tiya mo tani uni minu piyu/ i’ko’d mo be. 25Wakan si’da/ miim ’borga/ uni ṯoru eya tente/ mo, dhali isi kani me’d jin ’kona uni ki ’ko eya tente/ mo tani uni molu dhu ki ku gun bagu mo be.

will be added

X\