ṮIMUṮH̱AWUUS ’DE/ 4

1Dhali Shi/in a’di ṯorki gwo ki ji lugum mo mmo/o gwo mo ki, ka cim kuŋ ’ko’d mo tani kun tiya mini per mo ’peni moŋgam gwo is mo mmoc̱iya hirdhe/ ki gwo gi shi/in kun he’kkunuwa he’k e mo dhali ki gwo kun ṯoru goma ruma ’cesh mo 2e gwo ma p̱or ma pije/ mo kun tanuwa ṯor ka ṯor mo ki ’kwani gwansan mo kun sula ’twa/ ma dum buni mo, 3uni gun nonki mash jin mashu mo dhali uni kun shush mii mo mmoga/ tonṯen tiya mo, uni kun uḵ ma Arumgimis mo mmota to gun minu bu’th ki mo jin ’boruwa ’bor bwa i is mo ki uni gwansan kun gamki gwo is mo dhali mish gwoŋ gana/ mo be. 4Haali/ aris to ’baar mo kun uḵ ma Arumgimis mo tani uni ta tom ’boron mo, dhali toŋ kamu/ minu waḵ mo gomata? waḵki/ a’di budhu ki mo jin ’boruwa ’bor bwa i is mo, 5haali/ a’di karu ki she/ mo wakan ki gwo ma Arumgimis mo dhali ka ’tho jin ’thonu mo be. 6Waḵki e mini dhu gwo gwansan kun yedhuwa ye’th sho’k mo ibwambora waḵ mo tani /e mini ta a’dim ’borga/ mo mmomii to mo goma Ḵrisṯẖos jin ta’da Yesus mo, gom gura/ jin ’kana /e mo e gwo jin gamu is mo dhali gom gwom ’boro’d jin ṯoru /e mo a’di jin baṯẖkina /e mo be. 7Dhalka hirdhe/ ki c̱i mo gom gwo lolop̱ jin ta ji ma maḵ mo jin diki ta ji ma gayiin mo dhali jin ta ji ma p̱ali/ mo. Nyoŋi is piniŋ gana/ mo e mii ma gayiin mo, 8haali/ me’d jin hana a’di ari me’d mo mmonyoŋ buŋgwar is mo ’te/ mo tani mii ma gayiin a’di ha me’d mo eya ris ’twaŋkal kuku/ mo haali/ a’di gam mii adu is mo gom mondiki/e jin di’d shwane/ mo dhali si’da/ gom mondiki/e jin midi p̱u’du/ yilaŋ kamu/ mo be. 9Gwo jin onu mo ta a’diŋ gana/ mo dhali ta a’di jin ha me’d mo mmobu’th ka ’bimpil mo. 10Haali/ gom ’pemen yansan mo tani ana ’kona mo mmomiiya ṯu’c kun ’batha’ba’th mo dhali mmopicira picir mo haali/ ana takina ga ’teŋ kap̱em bana mo jin karkunuwa p̱o/ ma Arumgimis jin di ki e mo, a’di jin ta’da Amanwoṯẖ gom ’kwani ’baar mo, dhali ki ji mum mo gom uni gwansan kun gamki gwo is mo be. 11Ḵani gwo gwansan mo ma dhali ṯori uni mo. 12Dhalku/ ki dhal jan ’deŋ kamu/ bway mo mmowaḵ /e mo gom dhuru’c pini jin tana /e mo. Hili tayi she/mm mo gom uni mo uni kun gamki gwo is mo e gwom pini jin ṯora /e mo dhali e is pini jin thosona /e mo dhali e mo/en mo dhali e moŋgam gwo is mo, dhali e miin dhelelga/ mo. 13Ntagi aha/ mina p̱u’dku/ mo tani ḵuthi is mo mmodeŋ Gwo ma Arumgimis jin ’kwarkunu e mo e bwaŋ ’kwani mo, dhali c̱iyi gwo mo dhali ṯori gwo mo. 14Dhalku/ ki ta p̱iny is mo gom to jin c̱inu ki me’d mo jin tana /e mo, a’di jin c̱ikunu /e mo ki gwo jin onu is mo jin bahu mo me’d jin dhukina jwahaŋ ’kwani me’d buni ap̱o e mo be. 15Boṯi ki mii gwansan kun minu mii mii mo. /E ki is pini imini ta agayiin gom uni mo. Wakan uni ’baar mo mini p̱ar yam pini jin yana /e e mo. 16Hili is piniŋ gana/ i e ki ’bore/ mo dhali gwom pini jin ṯora /e mo. Noni is pini ki ’koho/ ’koho/ mo. Ki miim pini jin mina /e mii kan mo tani /e mini woṯẖ is pini mo dhali uni kun mini ciḵ gwom pini mo be.

will be added

X\