TASALUNIIKI ’DE/ 5

1Hili isi me’d gwo goma tee mo dhali yir mo mo iwaḵ mo, um mini mii ’koki ta gi gwon ’deŋ kamu/ jin minu ’kwarku/ e um mo. 2Haali/ um ki is bum mishki mo ki ’bore/ mo ka tee jin mina Tap̱a p̱u’du/ mo tani a’di wana e ki wathin ’di/ jin midi yayu/ mon’thiny mo. 3Ki ’kwani mini o gwo mo ki: Moŋḵu’th is a’diheye dhali mo jin ’konu ’kom ’pempa mo tani yan’ko’d ki jahanne/ mony’ce’d sho’k midi p̱u’d apo/ uni mo me’da nyor ma ’ci jin shwa’da ’bom mo. Dhali moŋkamu/ minu yeya? 4Hili um yisa ’kon e mondhurumi’d mo iwaḵ mo, haala tee yansan midi diki wuny um is mo me’d mii jin miina wathin ’diyi. 5Haali/ umi ’baar mo ta iya/ gi moŋkush mo dhali iya/ ma tee mo. Ana ’konaki ta uni gi mon’thiny mo walla gom mondhurumi’d mo. 6Wakan dhalki ana ki ish e mo me’d mii kun miina ’kwanin tiya mo, hili dhalki ana ’kona ki e i’kup mo dhali tim mo mo ki ’cese/ ’cese/ mo. 7Haali/ uni gwansan kun ishki e mo tani ishki e mo e mon’thiny mo dhali uni gwansan kun ’koshkin ma su mo tani ’koshkin ma su mo mon’thiny mo be. 8Hili me’d jin takina ana uni ma tee mo tani dhalki ana tima mo mo dhali hitha rac̱pa/ gi moŋgam gwo is mo dhali mo/en mo dhali gom toŋ’kup̱ mo tani a’di ta mo ma ’teŋ kap̱em bana gi bway mowoṯẖ mo be. 9Haali/ Arumgimis diki ’kawur ana mo goma nyor mo hili ki ana mina bu’th bway mowoṯẖ mo e Tap̱a Yesus Ḵrisṯẖos bana mo, 10a’di jin wuki’d mo gom ana mo, wakan waḵki/ ana ’kona ki e mo walla isha e mo tani ana mina ’taki ’ko nyaḵki a’di mo be. 11Wakan ’bithi ci adu is ka rem ’kup̱ mo dhali nyaŋi anyaŋ ka rem ’kup̱ mo jasi me’d mii jin miikina um mo be. 12Hili aman yuḵkina um mo iwaḵ mo, mmotaḵ uni gwansan ḵun miiki mii e bwam um mo dhali uni gun can ki um e Tap̱a mo dhali uni gun logomki um ki gwo mo, 13dhali taḵi uni mo ki taḵ jin caaca mo e mo/en mo goma ṯu’c buni mo be. Hili tayi gi mo ma ḵu’th is e bwaman is bum gana/ mo. 14Dhali aman malaskina um mo, iwaḵ mo, ki um mini ṯo’k uni gwahan kun tana p̱iny is mo, dhali ’bithi uni gwansan adu is mo kun ’thina buye/ ki miin to mo, dhali woṯẖi/ uni kun ’ka’da is mo, ’kuc̱i bwa ki ’kari’th mo gom uni ’baar mo. 15Hili ki ’bore/ ki jan ṯal ’deŋ kamu/ ’peni bwam um midi diki raḵ tonthusi bway mo gom tonthus jin miinu mo, hili isa yempa/ simmi mii e mo mmomii miim ’boro’d ka rem ’kup̱ mo dhali gom ’kwani ’baar mo. 16’Kunyi bwa mo isa yempa/ mo. 17’Thoyi ki ṯikir ṯikir mo. 18C̱iyi mo jin ’boruwa ’bor bwa i is mo goma ris mii ’baar mo kun ṯu’k ’ban mo. Haali/ a’di yansan ta bwa ma Arumgimis eya Ḵrisṯẖos jin ta’da Yesus mo gom um mo be. 19Dhalku/ Shi/in ki us mo. 20Dhalku/ gwo jin onu is ki waḵ mo. 21Hili nyo/i aris to ’baar mo. Ṯeli mo e a’di jin ’boro’d mo. 22’Doyi is mo ’peni aris e ’baar mo kun ta tonthus mo. 23Dhalka Arumgimis jin ta moŋḵu’th is ki is piti mo dhagam um ka ’bimpil mo, dhali dhalki shi/in bum dhala ḵashiram bum dhali buŋgwar is bum minu dhu ki ’dantar mo dhali dar gi monthalkin mo gom p̱u’d jin mina Tap̱a Yesus Ḵrisṯẖos bana p̱u’du/ mo be. 24A’di jin yuḵki um mo tani ta a’di jin ta isiŋ gana/ mo dhali a’di midi mii a’di mo. 25Iwaḵa, ’thoyi gom aman mo ma. 26Theyi arisa waḵ me’d mo ki ’twa/ jin p̱inu ki jiŋ ḵo/ mo. 27Aha/ ḵankina um gwo mo ki gwon Tap̱a mo ki gwo yansan minu deŋ e mo goma risa waḵi ’baar mo be. 28A’the gi Tap̱a Yesus Ḵrisṯẖos bana mo midi di e um mo be.

will be added

X\