TASALUNIIKI ’DE/ 4

1Ḵwalany ’te/ ba/ iwaḵa, aman yuḵkina um mo dhali malas um mo e Tap̱a Yesus mo ki um me’d jin da/arkina um gwo mo ’peni aman mo gom gwo jin mina um ḵa ’ko mo ba/ dhali ’bora Arumgimis bwa mo jasi me’d mii jin miikina um mo tani miiyi wakan ki nyanye/ mo dhali ki nyanye/ mo. 2Haali/ um mishki gwo jin ye’thkina aman um sho’k mo e Tap̱a Yesus mo be. 3Haali/ a’di yansan ta bwa ma Arumgimis mo, ki um minu dhagam mo, ki um mini ’do is mo ’peni mo jin miinu miinyc̱al mo, 4ki um ka ’deṯe/ ’deṯe/ mo mini mish mo mo mmobu’th up̱ gom is bum gana/ mo e mii jin ḵogu mo dhali montaḵ mo, 5yisa e mii jin dhunu e ki ’thir ’thir mo mmo’dap̱ e mo me’d mii kun miina ’kwani kun daran ki ji gi luŋu mo, uni kun ’koki misha Arumgimis mo, 6dhali ki wathin ’deŋ kamu/ midi diki dhaŋ gwo mo dhali mii akam piti ki shi/ e mii yan mo, haali/ Tap̱a a’di ta’da manrica ris to gwansani ’baar mo me’d gwo jin rumkina aman um iṯwa/a/ ki ’bi’th ’bi’th mo. 7Haali/ Arumgimis diki yuḵ ana mo gom mii en’dap̱ mo, hili e miin dhelelga/ mo. 8Hili a’diyin jin midi ush gwo yansan mo tani a’di ushki gwo gi wathi/ yisa, hili Arumgimis mo, a’di jin c̱iki Shi/in piti jin Dheleladhelel e um mo be. 9Hili isi gwo gom mo/eni e mo iwaḵ mo um yisa mini mii ta gi jan ’deŋ kamu/ jin midi ’kwar um to mo, haali/ um ki is bum ṯorkunu gwo ka Arumgimis mo ki um mini ena en ka rem ’kup̱ mo 10dhali ka jiŋ gana/ umi ’baar mo enki iwaḵ mo kun ’kokin mo e Pam Makiduniyya mo. Hili aman malaskina um mo iwaḵ mo mmomii uni ki nyanye/ mo dhali ki nyanye/ mo, 11mmogu a’di ki e mo mmo’ko ki ’dantar mo, mmohil isi miim bumi e mo, dhali mmomiiya ṯu’c ki me’d bum mo me’d gwo jin ḵankina aman um mo. 12Wakan ki miim bum mini yuḵ montaḵ ’peni ’kwani kun ’kon ka pije/ mo dhali mmo’koki ’tho to ’peni cin tiya mo. 13Hili aman mina ’koki dhal um bway mo mmota p̱us moyi, iwaḵ mo, isi gwo gom uni gwansan kun ishki e mo ki um minu ’koki jwakaṯ mo me’d mii kun miina kun tiya kun daran gi mo ma ’teŋ kap̱e/ mo. 14Haali/ me’d jin gamkina ana gwo is ka Yesus wuki’d mo dhali cu mo doḵ/e, isi kan si’da/ wakan eya Yesus mo tani Arumgimis midi ’doyu/ nyaḵki a’di si’da/ uni gwansan kun ishki e mo be. 15Haali/ a’di yansan ibahkina aman e um mo ki gwon Tap̱a mo ki ana kun ’kona ki e mo dhali kun boc̱kin mo ntagi p̱u’d jin mina Tap̱a p̱u’du/ mo tani ana mina ’koki sul uni gwansan bway mo kun ishki e mo be. 16Haali/ Tap̱a ki is piti a’di midi thulu/ ’peni momis ki cuuwa/ jin ḵanu mo, nyaḵka yuḵ ma man’doyu gwo jin ca’d mo, dhali nyaḵki ko ma poome/ ma Arumgimis mo. Dhali uni gun wukin eya Ḵrisṯẖos mo tani mini cu misi ṯwa/a/ mo be. 17Dhali yan’ko’d ana kun ’kona ki e mo dhali kun boc̱kin mo minu nyaḵ bu’th mo nyaḵki uni mo mmonṯal ’de/ mo mmogam Tap̱a ’kup̱ mo e bwaa raḵ mo e momis mo. Dhali wakan ana mina nyaḵ ’ko ki Tap̱a ki sule/ mo. 18Dhali ki mii gi wakan mo tani malasiya malas ka rem ’kup̱ e gwo gwansan mo ma.

will be added

X\