TASALUNIIKI ’DE/ 3

1Wakan ki aman mola ’dim ’kup̱ naskina/ mo tani aman okina bwa mo ki aman minu dhalku/ mo ŋ’ko’d mo e Pa Athiina mo aman ’cena mo 2dhali aman hashkina aṮimuṯẖawuus mo, a’di jin ta’da kam bana mo dhali a’di jin ta’da manmii to mo goma Arumgimis mo gom gwom ’borga/ ma Ḵrisṯẖos mo, mmoṯel um sho’k mo e moŋgam gwo is bum mo dhali mmomalas um mo, 3ki wathin ṯal ’deŋ kamu/ minu ’koki joc̱ mo ki monṯo’c bwa gwansan mo. Um ki is bum mishki mo mo ki a’di yansan ta tom bana jin midi ’bag ana e mo be. 4Haali/ me’d jin ’kona aman nyaḵki um mo tani aman ṯorkina um gwo gwansani ṯwa/a/ mo ki ana mina isi ’kosh ka nyor mo e monṯo’c bwa mo, me’d jin p̱u’dkina a’di kan mo me’d jin mishkina um mo be. 5Gom ’kup̱ mii yansan mo ki aha/ mola a’di ’dim ’kup̱ mo naskina/ mo tani aha/ hashkina gwo mo ki aha/ mina ’taki mish moŋgam gwo is bum mo, gom moŋḵo/ is mo ka manpal ’kwani mo gamki bwaya kamu/ mmopal um mo, ki miin tom bam midi ’taki ta jim p̱e’th mo be. 6Hili shwane/ me’d jin p̱u’dkin ma Ṯimuṯẖawuus mo e am mo ’peni um mo tani dhali ḵalki aman gwom ’boron mo gom moŋgam gwo is bum mo dhali mo/en bum mo dhali be’d gwo mo ki um isa yempa/ kaki aman e mo ki bwaŋkush mo dhali ḵwa/a/ ki ’kosh um mo mmop̱ar am e mo, me’d jin ’koshkina ḵwa/a/ aman si’da/ mo mmop̱ar um e mo — 7haali/ gom ’kup̱ mii yan mo tani iwaḵ mo eya ris mo ma c̱is bam mo dhali monṯo’c bwa mo tani aman ’kokunu mo mmomalas mo ki um mo e moŋgam gwo is bum mo be. 8Haali/ shwane/ aman ’kokina mo waḵki/ um mini ṯel sho’k e Tap̱a mo be. 9Haali/ mo jin ’boruwa ’bor bwa i is mo ki mii gi wakata imina aman ic̱i eya Arumgimis mo gom um mo goma ris bwaŋ ’kunyga/ suru’dki amana a’di jin takina aman gom gway bum ibwambor ma Arumgimis mo 10mmo’tho mo ka daran du mo ki mon’thiny ilu/ mo dhali montee mo ki aman mina ṯora ṯor ki um ka ḵarambuye/ mo dhali thip̱a thip̱ mo a’di jin hara um mo e moŋgam gwo is bum mo be. 11Dhali shwane/ dhalki Arumgimis bana dhali Ababa ki is piti dhali Tap̱a Yesus Ḵrisṯẖos c̱u’thki aman bway bam e um mo 12dhali dhalki Tap̱a a’di dhu um mmomar mo/en is mo ka rem ’kup̱ mo dhali c̱i um mo/en jin ishki’d ka enthus ka rem ’kup̱ mo, dhali goma ris ’kwani ’baar mo, me’d mii jin miikina aman mo gom um mo. 13Wakan ki a’di midi ṯela dum bum sho’k mo ki dar gi mii kun ’koni ’ba/ mo e mii gun ḵogu mo ibwambor ma Arumgimis bana mo dhali Ababa mo ki p̱u’d jin mina Tap̱a Yesus bana p̱u’du/ mo nyaḵka ris unim piti kun dhelelkin mo be.

will be added

X\