BUṮERUS ’DE/ 2

1Wakan dhuyi aris mii kun dup̱uwa dup̱i e ’pen ka pije/ mo dhali arisa maḵ mo dhali mii kun ta washila/ mo dhali miin dhap̱an mo dhali arisa thu’th ’pen kun thudhu mo. 2Me’d usha ŋam ’pereny kun daḵa dhodhu mo tani oyi bwa mo goma ko mo jin ta to gi shi/in jin dheleli’d mo. Ki a’di mo tani um mini ca mo e bway gi mowoṯẖ mo. 3Haali/ um nyoḵki bwaŋkush gi Tap̱a mo be. 4Iiyu/ i a’di mo, a’di jin ta wosh yin jin di ki e mo, a’di jin waḵkina ’kwani mo, hili e jis/e ma Arumgimis mo tani a’di kwanykunu mo dhali a’di ta yintho/ ki yintho/ mo. 5Dhali me’d wosh kun ’ko ki e mo tani tayi um ki is bum kun minu nyaŋ mo mmota gu’b gi to gi shi/in mo, mmota uni gun mii mii ma gasiis kun ḵogu mo, mmoc̱i to kun ’ciṯẖu/ ’kus mo kun ta gi shi/in mo kun mishu bu’th ka Arumgimis eya Yesus Ḵrisṯẖos mo be. 6Haali/ a’di ṯelki’d mo e Gwo ma Arumgimis jin ’kwarkunu mo ki: Hili mo mo ma, aha/ ’thikina aSihyuun wosh mo, a’di jin ta wosh ’penabi jin kwanyu mo dhali jin ta yintho/ mo. Dhali a’di jin gam gwo is e a’di mo tani minu ’koki kar ki mo ma ’the is mo be. 7Wakan e um mo um gun gamki gwo is mo tani a’di ta yintho/ mo, dhali hili gom uni gwansan kun ’koki gam gwo is mo tani: Wosh gana/ yansan jin waḵkina imannyaŋ gu’b mo tani a’di warki’d ka dhana ’kaŋ’kup̱ wosh gi ’penabi mo, 8dhali Wosh jin midi dhu ’kwani mmokol mo, dhali wosh jin midi dhu uni mmoṯa’k mo, haali/ uni golkunu mo haali/ uni ’koki ha gwo e mo me’d jin ’kawurkunu uni mo mmomii mo. 9Hili um ta emen kun kwanykunu mo dhali imanmii mii ma gasiis jin waki ji ma maliḵ mo, dhali um ta kal gi ’kwani kun ḵogu mo, dhali um ta ’kwani ma Arumgimis ki is pitiŋ gana/ mo, ki um mini bah eya tente/ mo miim ’borgam piti mo, a’di jin yuḵki um mo ’peni bwam mondhurumi’d mo e moŋkush piti jin ta momer mo. 10Nṯwa/a/ mo tani um ’koki ta ’kwani mo, hili shwane/ um ta ’kwani ma Arumgimis mo. Nṯwa/a/ mo tani um ’koki bu’th mo jin miinu mii mo, hili shwane/ um bu’thki momiimii mo be. 11Um gun enu mo, aha/ yuḵa um mo me’d ’kwani kun ’kon ka pije/ mo ’peni bampaŋ kamu/ mo dhali me’d uni kun ’kon e bwaman ’kwanin tiya mo, mmoga/ mii kun dhunu e ki ’thir ’thir mo gi shuman is mo jin ta to jin aski’da asa p̱owa ḵashiram bum mo. 12Hali miim ’borga/ mo mmonyoŋ is mo e bwaman ’kwani kun ’koki ta ’Kwani Yahuuda/ mo, wakan waḵki/ uni mini ’taki o gwo ap̱o/ um mo me’d imanṯẖu’th to mii mo tani uni mini ’taki p̱ar miim ’borgam bum e mo dhali kara Arumgimis ki ca mo eya tee gi mowoṯẖ mo be. 13’Dap̱i ’twa/ mo gom gway gi Tap̱a mo eya ris mii kun ṯelkina ’kwani en’thi/ ’pen mo gom ’kom buni mo, waḵki/ a’di midi ta maliḵ mo jin ta tap̱a ap̱o/ tiyan tiya mo 14walla imudhiir mo kun hashu ki a’di mo mmoc̱i uni gwansana jisa mo kun ṯẖu’th to mii mo dhali maŋ uni gwansan kun miin ki ’bore/ mo. 15Haali/ a’di ta bwa ma Arumgimis mo ki um ki miim ’borgam bum mo kun miina um mo tani mini mu’th ’twa/ gi ’kwanim p̱ali/ mo dhali miim p̱us buni mo. 16Tayi ’kwani kun ’kon ki ’kus mo, hili ki dar gi mii jin mina umi bu’th mom bum jin ’kona um ki ’kus mo mmota mii jin diḵ mii gun miina um kun ta thus mo. Hili ’koyi me’d uni kun ta imanmii to goma Arumgimis mo. 17Taḵi aris ’kwani ’baar mo. Eni iwaḵ bumi ’baar mo. Ḵoki Arumgimis mo. Taḵi imaliḵ mo. 18Imanmii towa, ’dap̱i ’twa/ mo e tap̱am bum mo ka ris montaḵ mo, hili yisa jasi e uni gun mii mii ki bwaŋkush mo dhali mii ma ’thup̱ e mo, hili si’da/ e uni gun ’cwarkina ’cwar mo be. 19Haali/ wathi/ a’di ṯesu mo waḵki/ a’di ta’d gi ’twa/ ma du ’kup̱ ka Arumgimis mo mmo’dim ’kup̱ mo e isa nyor mo me’d jin tana a’di isa nyor jin diki ta ḵar/e mo. 20Haali/ to jin gama um a’di ta’da taye, waḵki/ um ki ṯẖu’th to mii mo dhali gam mondor mo gom a’di mo tani dhali um mini bu’th a’di ki bwa jin ’kuc̱u ki ’kari’th mowa? Hili waḵki/ um ki mii miim ’boron mo dhali ’kosh is ka nyor mo gom a’di mo tani um bu’thki a’di ki bwa jin ’kuc̱u ki ’kari’th mo dhali um tan gi mo jin ṯes ma Arumgimis um mo be. 21Haali/ gom a’di yan mo tani um yuḵkunu mo, haala Ḵrisṯẖos si’da/ ’koshu is ka nyor mo gom um mo, mmodhalkina a’di um she/mm piti mo ki um mini ’taki baṯẖa cuḵ piti mo be. 22A’di diki mii miinthusa ’deŋ kamu/ mo. Dhali gwo maḵa ’deŋ kamu/ si’da/ dinuki gam ’pena le’d piti mo be. 23Ki a’di sorkunu mo tani a’di diki raḵa sori bway mo. Ki a’di ’koshkina is ka nyor mo tani a’di diki shwaa ’cesh ki sho’k mo. Hili a’di gamki a’di gwo is mo, a’di jin ta’da mandwall gwo mo jin ta’da ḵar/e mo. 24A’di a’di ki is piti ḵalki miinthus bana e is piti mo ap̱o/ cwa mo, ki ana mina ’taki wu miinthus mo dhali ’ko ki e mo e mo ma ḵar/e mo. Ki jamam piti jin dorkunu a’di mo tani um wac̱kunu mo be. 25Haali/ um iikini per mo me’d ḵa’bal mo, hili shwane/ um doḵkin ka nyaŋ’ko’d mo eya Manhil Ḵa’bal mo dhali Amanjiya ḵashiram bum mo be.

will be added

X\