BUṮERUS ’DE/ 1

1ABuṯerus, a’di jin karu ki she/ mo goma Yesus Ḵrisṯẖos mo. E uni gun ’kokin mo e bwaman ’kwanin tiya mo kun c̱ekerkunu bwa mo e Pam Buntus mo dhali e Paŋ Galathiyya mo dhali e Paŋ Kabbadukiyya mo dhali e Pa Asiyya mo dhali e Pam Biṯẖiniyya mo 2uni kun kwanykunu mo dhali kun ’kawurkin ma Arumgimis jin ta’da Baba mo dhali kun dhagamkunu mo ki Shi/in mo gom gwo jin hana uni e mo eya Yesus Ḵrisṯẖos mo dhali goma bas piti jin ḵukuski’d mo. Dhalka ’the dhali moŋḵu’th is minu mar is gom um mo. 3Mom’bor mii midi di mo goma Arumgimis mo dhali Ababa gi Tap̱a Yesus Ḵrisṯẖos bana mo. Ka dhan momiimiim piti mo tani ana ’kokunu mo mmodho’th mo doḵ/e e mo ma ’teŋ kap̱e/ jin di ki e mo ki mompi ma Yesus Ḵrisṯẖos ’peni mowu mo, 4dhali e mo mal jin budhu mo a’di jin moli p̱u/ mo, dhali jin dinuki shi/ ki mii mo, dhali jin midi diki us mo ki jog mo, dhali jin karkunu mo gom um mo e momis mo. 5Um gun jinu ki mom’bi’th ma Arumgimis mo ki mo ki moŋgam gwo is ki bway mowoṯẖ mo, a’di jin thosonkunu mo mmoṯor eya tente/ ka tee jiŋ ’ko’d mo. 6E mii yansan mo tani ’kunyi um bwa mo ma, ba shwane/ ki ari mo yansan mo tani um mina isi ’kosh ka nyor mo ki mompal ki she/ ki she/ mo. 7Wakan ki moŋgam gwo is bum gana/ mo, jin ta yintho/ ki yintho/ mo mmobol ’dolkon gana/ e mo, a’di, ba a’di jin mishi p̱u/ mo tani a’di nyo/u ki mo/o’d mo tani minu ’taki gam mo mmoc̱i momaŋ mo dhali monyca mo dhali montaḵ mo e mony’cee jin minu ’ceeya Yesus Ḵrisṯẖos mo be. 8Ki dar gi mmop̱ar a’di e mo tani um enki a’di mo. Ba um bala kun ’koki p̱ar a’di e mo shwane/ mo tani um gamki gwo is e a’di mo dhali ’kunykina bwa mo ki gwo jin molu bah mo dhali jin eḵa/ eḵ mo. 9Me’d gwo jin thimkunu mo gom moŋgam gwo is bum mo tani um bu’thki bway mowoṯẖ bum goma ḵashiram bum mo be. 10Imanc̱i gwo ma Arumgimis kadhamo/ kun oki gwo kun onu is mo goma ’the yan mo jin midi ta jim bum mo tani uni simmki mii e mo dhali doṯa/ doṯ mo gom bway mowoṯẖ yansan mo be. 11Uni doṯkina doṯ mo goma ci en’thiŋ kamu/ mo walla mo mo jin ṯorkina Shi/in ma Ḵrisṯẖos jin di’d e uni mo me’d jin ṯorkunu gwo nṯwa/a/ mo gom isa nyor ma Ḵrisṯẖos mo dhali monyca jin midi di ŋ’ko’d mo be. 12A’di ṯorkunu uni eya tente/ mo ki uni ’koki mii to mo gom is buni mo, hili gom um mo, eya ris to gun baḵkunu um shwane/ mo ki uni gwansan kun ta imanc̱i gwom ’boro’d e um mo ki Shi/in Dheleladhelel mo, a’di jin hashkunu ’peni momis mo, uni kun ta to jin ’koshkina iman’doyu gwo ṯe/ mo mmop̱ar e mo be. 13Wakan deḵi adum bum mo dhali ḵuthi is ki ’cese/ ’cese/ mo, dhali dhuyi a’teŋ kap̱em bum ki mon’tu’d mo ap̱owa ’the mo, a’di jin p̱u’dki’di um mo ’peni mony’cee jin ’ceekunuwa Yesus Ḵrisṯẖos mo be. 14Me’d uc̱i gun ha gwo e mo tani dhalku/ mii ki tash mo mmodhu e ki ’thir ’thir mo me’d jin miikina um ’thissa/ e miin dhamom p̱us bum mo. 15Hili me’d jin tana a’di jin yuḵi um, a’di jin ḵogu mo tani tayi um uni gun ḵogu mo ki is bum mo eya ris miim bum kun nyoŋa um is mo. 16Haali/ me’d gwo jin ’kwarkunu mo ki: Um mini mii ta kun ḵogu mo haali/ aha/ tana a’di jin ḵogu mo be. 17Waḵki/ um mini yuḵa yuḵ ap̱owa Baba mo, a’di jin dwallki ’kwani gwo ka ’deṯe/ ’deṯe/ ki dar gi mii ma gwar ’de/ mo isi ki miim buni kun miina uni mo tani nyoŋi is bum ki moŋḵo/ is mo ka teem bumi ’baar mo jin ’kona um mo e bwaŋ ’kwanin tiya mo. 18Um mishki mo ki um wankunu ’ba/ mo ’peni miim p̱e’th kun luḵu ’peni ibabam bum mo tani yisa ki to kun mini p̱u/ mo me’d ’dolkon kush mo walla ’dolkon gana/ mo, 19hili um wankunu ’ba/ mo ka bas ma Ḵrisṯẖos jin ta yintho/ mo me’d ji gi ari ḵa’bal jin dar gi thalkin mo dhali jin ta jim ’borgaŋ gana/ mo. 20A’di ’kawurkunu nṯwa/a/ mo ki mony’cesh yan ’konuki ḵa’b mo, hili a’di ṯorkunu eya tente/ e ’ko’d mo gom mo gi gway bum mo be. 21E a’di mo tani um takin gi mo jin wunuwa Arumgimis jwa i is mo, a’di jin cuki a’di mis ’peni mowu mo, dhali c̱i a’di monyca mo, wakan ki moŋgam gwo is bum mo dhali mo ma ’teŋ kap̱em bum mo mini ’ko eya Arumgimis mo be. 22Mmodhelelkina um aḵashiram bum mo ki gwom bum jin hana um e mo e gwoŋ gana/ mo gom washila/ jin p̱iyi’d e um mo e mo/en mo gom iwaḵ mo, mmo/enkina uma en mo ki bwan dara’d mo ’pena duŋ gana/ mo. 23Um dho’thkunu mo doḵ/e ki dho’th this mo, yisa ’peni emen to jin midi p̱u/ mowa, hili ’peni emen to jin midi mol p̱u/ mo, e a’di jin ta gwo ma Arumgimis jin di’d ki e mo dhali jin midi di ki sule/ mo. 24Haali/ Aris shuman isi ’baar mo uni wana e ka sho mo. Dhala ris jarom buni mo tani uni wana e ki jandi/ ma sho mo. Asho ḵu’thkin mo dhali jandim buni raskin mo 25hili gwo gi Tap̱a mo tani a’di c̱a’bki’d ki sule/ sule/ ya ye ’ba/ mo be. Gwo yansan a’di ta gwom ’boro’d mo, a’di jin c̱ikunu um mo be.

will be added

X\