KURINṮH̱UUS ’DE/ 6

1Waḵki/ jan ṯal ’deŋ kamu/ ’peni um taki’d gi gwo jin ’konuki baṯẖ mo ap̱owa kam piti mo tani a/mina a’di iya mo e bwambor ma hakuuma mo, uni gun ’konuki dhu ki she/ mo goma Arumgimis mo mmodhal uni kun dhunu ki she/ e i is mowa? 2’Kona um ki misha, ki uni kun dhunu ki she/ ki dhelel dhelel mo tani mini dwall ’kwaniny’cesh gwo mowa? Dhali waḵki/ ’kwaniny’cesh minu dwall gwo ki um mo tani a/um bunya/ ’koki ha me’d mo mmodwall ushi gwoŋ gwa’dgaa? 3’Kona um ki misha ki ana mina dwall iman’doyu gwo gwo mowa? Bakatayee baṯẖu mii gi mondiki/e yan mo? 4Waḵki/ um ta gi gwon dwall mo tani atinta dhuna um uni mo ibwambori uni gun p̱iskin mo eya ḵaniisa mo? 5Aha/ ona gwo yansan mo mmo’the um is mo. A/wathiŋ kamu/ bunya/ diki yuḵayuḵ mo ibwam um mo jin midi ’kosh jwa mo mmonyiṯẖ gwo mbwaman ma waḵ piti gom ikam mowa? 6Haali/ akama kamu/ yaki’di bwambor ma hakuuma mo mmo/o gwo ap̱owa kam mo dhali a’di ibwambori uni gun dar gi gwo jin gamu is mo. 7Mmota gi shi/ ushi gwon dwall mo ka rem ’kup̱ mo tani a’di ta mii jin p̱inu um e mo. Ata ’kona um ki dhal mii e i is mo mmo’kosh is ka nyor mo gom tonthusa tiya mo? Ata ’kona um ki dhal mii e i is mo ki um minu dil mo? 8Hili um ki is bum mii tonthus mo dhali dila dil mo dhali isi kan iwaḵ bum gana/ dilkina um mo be. 9’Kona um ki misha ki uni gun ’koki mii mii kun ta kuŋ ḵar/e mo tani mini ’koki ta gi mal gi Bampa/ ma Arumgimis mo? Dhalku/ ki ta ku gi hegu e mo. Walla uni gun ta imanmii miinyc̱al mo walla uni gun ta imanluŋ tomp̱inycon mo walla uni gun ta c̱al ki c̱al mo walla uni gun ceḵ ma du mo walla uni gun ha’k ’pen c̱eŋ gwas mo 10walla ’kwanin ’di/ mo walla iman’thoṯẖ bwa mo walla iman’kosh ma su mo walla imansora sor mo walla imandil to mo tani uni mini ’koki ta gi mal gi Bampa/ ma Arumgimis mo be. 11Dhali kun tiya ta ku gi wakan e um mo. Hili um lamkunu mo, um dhukunu ki she/ ki dhelel dhelel mo, dhali um dhukunu mo ki mo ma ḵar/e mo ki gway gi Tap̱a Yesus Ḵrisṯẖos mo dhali ki gway gi Shi/in Dheleladhelel ma Arumgimis bana mo be. 12Aris to ’baar mo tani dhala gwoŋḵan aha/ bway mo, hili aris to ’baar mo yisa ta gi shi/ miim ’boro’d gom aha/ mo be. Aris to ’baar mo dhala gwoŋḵan aha/ bway mo, hili aha/ mina diki dhal is pem bway mo mmota c̱iŋkina/ gom to gunni ’baar mo. 13Tonṯeyi gom bwa mo dhali bwayi gom tonṯe/ mo. Dhali Arumgimis midi ’ce’d jin ṯal ’deŋ kamu/ sho’k mo dhali jaŋ kamu/ mo. Buŋgwar is yisa uḵu gom mii jin miinu miinyc̱al mo. hili gom Tap̱a mo dhali Tap̱a gom buŋgwar is mo be. 14Dhali Arumgimis ’de’kki Tap̱a mo dhali a’di si’da/ midi ’de’k ana mo e mom’bi’th piti mo be. 15’Kona um ki misha ki buŋgwar is bum ta to is goma Ḵrisṯẖos mowa? Gom a’di gi wakan mo tani a/aha/ mina gu tom buŋgwar is ma Ḵrisṯẖos mo dhali mii uni ki to is jin miinu miinyc̱al mowa? Aggi. 16’Kona um ki misha ki a’di jin gamki is piti is mo ki a’di jin miiki miinyc̱al mo tani ṯalki isa ’de/ mo uni ka yima? Haali/ me’d gwo jin ’kwarkunu mo ki: Uni su/ mini ṯal buŋgwar isa ’de/ mo be. 17Hili a’di jin gamki is piti me’d ki Tap̱a mo tani wara’d gi shi/ina ’de/ e a’di mo be. 18Ship̱iṯi/a ŋwac̱a/ mo ’peni mo jin miinu miinyc̱al mo. Aris miinthusa tiya ’baar mo gun miina wathiŋ kamu/ mo tani a’di ta jim p̱or ma pije/ gi buŋgwar is mo, hili miinyc̱al jin miina wathi/ miinthus mo tani a’di miiki miinthus ap̱o/ buŋgwar is pitiŋ gana/ mo be. 19’Kona um ki misha ki buŋgwar is bum ta monyc̱a’b gi Shi/in Dheleladhelel jin di e uma? a’di jin takina um ’peni Arumgimisa? Um yisa ta uni gun ta ku gi is bum yisa. 20Um yolkunu ki she/ yol jin ’bitha’bi’th mo. Wakan kari Arumgimis ki ca mo e buŋgwar is bum mo.

will be added

X\