KURINṮH̱UUS ’DE/ 2

1Ki aha/ p̱u’dkina e um iwaḵ mo tani aha/ dinaki p̱u’dku/ mmobah um gwo jin ṯoru goma Arumgimis mo ki gwo jin molu piyu/ ’kup̱ ka pije/ mo walla ki yuḵ mo. 2Haali/ aha/ tana ki ’kup̱ gwo mmomish toŋ kamu/ yisa e bwam um mo hili isi ciki/ jasa Yesus Ḵrisṯẖos mo dhali a’di jin ’koshkunu ki cwany’ciṯẖan dhul mo be. 3Dhali aha/ dikina e um mo e mo jin ’ka’du is mo dhali e mo jin ḵo/kunu is kagahara mo dhali e mo jin deenuwa de e mo be. 4Dhali gwom pem jin ṯorka/ mo dhali gwom pem jin c̱ika/ mo tani ’koki ta gwo kun mini el ’kwani e mo gom moyuḵ mo hili mmonyo/ Shi/in mo dhali mom’bi’th mo be. 5Wakan ki moŋgam gwo is bum minu ’koki thuma p̱o/ moyuḵ gi ’kwani mo, hili e mom’bi’th ma Arumgimis mo be. 6Bahili e bwaman uni gun iskin mo tani ana ṯora gwo yuḵ mo. Ba a’di yisa ta moyuḵ gi mony’cesh yan mo walla yisa ta moyuḵ gi tap̱a gi mony’cesh gwan mo, kun mini p̱uu mo. 7Hili ana ṯorkina gwo gom yuḵ jin c̱inu ki jiŋ kup̱ mo dhali yuḵ jin ta jim ma Arumgimis jin bagu mo, a’di jin ’kawurkin ma Arumgimis nṯwa/a/ mo ki yil gi mony’cesh yan mo gom mo jin dhunu ana ki ca mo. 8Itap̱a kun ’koni mony’cesh yan mo tani mishi gwo ’ban gom a’di yan yisa. Waḵki/ uni mini ’taki mish mo tani uni mini ’taki ’koki ’kosh Tap̱a gi monyca ki cwany’ciṯẖan dhul mo be. 9Hili me’d gwo jin ’kwarkunu mo ki: A’di jin dina e ki mish mo walla jin dina ’ce ki ciḵ mo walla jin diki dwar e gwalal gi wathi/ mo tani a’di jin thosonkin ma Arumgimis mo gom uni gwansan kun enki a’di mo tani, 10Arumgimis ṯorki a’di eya tente/ e ana ki Shi/in mo. Haali/ Shi/in a’di theke’thki’da ris to ’baar mo, isi kani moŋ’kul ma Arumgimis mo. 11Haali/ wathi/ jana mishki to jin kulum ma kamu/ ibwa mo? isi ciki/ shi/in gi wathi/ jin diki’d e a’di mo. Wakan si’da/ wathin ṯal ’deŋ kamu/ yisa mishki gwo jin kulum ma Arumgimis ibwa yisa hili isi ciki/ Shi/in ma Arumgimis mo be. 12Dhali ana ’kokina ki bu’th moyuḵ gi mony’cesh mo, hili ana bu’thkina Shi/in jin piki’d ’peni Arumgimis mo ki ana mina mish gwo ’ban gom to kun c̱inu ki me’d mo kun c̱in ma Arumgimis ana ’baḵany mo. 13Dhali ana ṯora gwo yansan yisa ki gwo gi yuḵ jin kuluma ’kwani en’thi/ ibwa mo yisa hili gwo jin ṯorkina Shi/in ana mo, mmopoḵ gwo gom to gi shi/in mo gom uni gwansan kun bu’thki Shi/in mo be. 14Wathi/ jin dar gi to gi shi/in mo tani diki bu’th to jin c̱inu ki me’d ’peni Shi/in ma Arumgimis mo. Haali/ uni tana p̱ali/ e a’di mo dhali a’di mol uni gwo mish ’ban mo haali/ uni nyiṯẖu/ ki to gi shi/in mo be. 15Wathi/ jin ta gi to gi shi/in mo tani nyiṯẖki’da ris to ’baar mo dhali hili a’di ki is piti mo tani a’di minu ’koki nyiṯẖ ki jan ṯal ’deŋ kamu/ mo be. 16Haali/ aja a’di imishki bwa gi Tap̱a mo, wakan mmoye’th a’di sho’k ki gwo mo? Hili ana takina gi bwa ma Ḵrisṯẖos mo be.

will be added

X\