KURINṮH̱UUS ’DE/ 14

1Kari mo/en mmota tom bum jin mina umi gu ki e mo dhali oyi bwa ka daran du mo gom to gi shi/in gun c̱inu ki me’d mo isi ki ji mum mo ki um mini o gwo kun’ onu is mo. 2Haali/ wathin ’de/ jin midi o gwo ki ’twaŋ kamu/ mo tani diki o gwo gom ’kwani ’te/ mo, hili goma Arumgimis mo. Haali/ jan ṯal ’deŋ kamu/ diki mish a’di gwo ’ban mo, hili a’di oki gwo jin baku ki Shi/in mo be. 3Hili ’bwanu’b gwoŋ kamu/ a’dihe/ be, gom a’di jin oki gwo is mo tani a’di ṯorki ’kwani gwo mo gom monyaŋ is buni mo dhali mmo’bi’th uni adu is mo dhali mmomalasa dum buni mo be. 4A’di jin oki gwo mo ki ’twaŋ kamu/ mo tani a’di nyaŋki is pitiŋ gana mo, hili a’di jin oki gwo is mo tani a’di nyaŋki’da ḵaniisa is mo be. 5Hili aha/ ŋap̱a umi ’baar mo mmo/o gwo ki ’twan tiya mo, hili isi kani aha/ ona bwa ki um mini o gwo is mo. A’di jin o gwo is mo tani a’di eḵki’d ki a’di jin o gwo ki ’twaŋ kamu/ mo isi ciki/ jan ṯal ’deŋ kamu/ midi luḵ ’twa/ mo, wakan ka ḵaniisa minu ’taki nyaŋ is mo be. 6Shwane/ iwaḵ mo, waḵki/ aha/ mina p̱u’dku/ i um mo mmo/o gwo ki ’twan tiya mo tani aha/ mina ’taki mii shi/ miim ’boro’d wakata mo gom um mo? hili isi ciki/ mo aha/ mina be’d ki um gwoŋ kamu/ jin ta ji gi miinu ’cee mo walla moyuḵ mo walla gwo jin onu is mo walla gwo jin ṯoru mo. 7Hili isi kan waḵki/ to gun miinu to mme’d mo kun dar ki mondiki/e mo me’da ṯẖaṯẖar mo walla adheŋdhenye/ mo tani ’koki lugum ko mo ka ’deṯe/ ’deṯe/ tani ki ’kwani mini mish ki ja p̱inu mo? 8Dhali waḵka puluŋ diki ko mo mmo/aḵ ’kus e mo tani aja a’di midi thoson is mo gom mmo/as mo? 9Wakan waḵki/ um ki is bum mo o gwo ki ’twaŋ kamu/ mo jin molu ciḵ mo tani ’kwani mini mish gwo ’ban kata a’di jin onu mo? Haali/ um ṯorki gwo ki buthur gana/ mo be. 10Gwoŋ kamu/ mac̱a/ minu dhaŋa? Aris ’twa/ tana ris ka ris kun ’kokin ki she/ ki she/ mo e mony’cesh mo dhali jaŋ kamu/ yisa dar gi ’pemena. 11Hili waḵki/ aha/ dinaki mish ’pemen gwo ki ’twa/ yan mo tani aha/ mina ta amanmol ’twa/ yan ciḵ mo goma manṯor gwo mo dhali amanṯor gwo yan mo midi ta amanmol ’twa/ yan ṯor gom aha/ mo be. 12Wakan, um ki is bum mo tani me’d jin ganankina um ’ba/ mo gom mo jin minu ṯor mii gi Shi/in eya tente/ mo tani shwayi ki o’d mo mmobol mii e mo mmonyaŋa ḵaniisa is mo. 13Wakan a’di jin o gwo ki ’twaŋ kamu/ mo midi mii ’tho mo gom mom’bi’th mo gom ’twa/ jin minu luḵ mo be. 14Haali/ waḵki/ aha/ ’thona ki ’twaŋ kamu/ mo tani shi/in pem ’tho’d mo, hili adum pem mol maman dho’th mo be. 15Dhali aha/ mina miiya ta mo? Aha/ mina ’tho mo ki shi/in mo dhali aha/ mina ’tho mo ka du si’da/ mo. Dhali aha/ mina yuḵ gway ki shi/in mo dhali aha/ mina yuḵ gway ka du si’da/ mo be. 16Wanya/ ’te/ ba/, waḵki e ’bori mii ki shi/in mo tani ka ciŋ kamu/ jin mol ’twa/ yan wal mo tani midi mish gwo o mo ki: Amen, kata mo gom mo ma ’bor bwam pini jin ’bora /e a’bor bwa i is mo ki a’di diki mish gwo jin ona /e moyi? 17Haali e mini c̱i mom’bor bwa i is jin ha me’d mo, hili wathiŋ kamu/ yisa minu nyaŋ is mowa. 18Aha/ ’borkina Arumgimis bwa i is mo ki aha/ okina gwo ki ’twan tiya mo mmobol um ’baar mo e mo. 19Bahili eya ḵaniisa mo tani aha/ mina dhal mii e i is mo mmoṯor um gwo mo jasi mudhe’d ka dum pem mo, ma kan mo mmoye’th kun tiya sho’k mo, ki gwo gun ’koni alaap̱i ’kume’d mo jin miga/ ṯor ki ’twaŋ kamu/ mo be. 20Iwaḵa, dhalku/ ki ’ko mo mmota uc̱i mo e gwom bum kun kuluma umi bwa mo. Gom gwon thus mo tani wari ki usha ŋa/ mo hili e gwo gun kuluma umi bwa mo tani tayi ku gun isin mo. 21E gwoŋḵan jin c̱ikunu mo tani a’di ’kwarkunu mo ki: Ki ’twa/ gi ’kwanin tiya mo dhali ka le’d gi ’kwani ki she/ mo tani miga/ ṯor gwo ki ’kwani gwansan mo, dhali isi kani uni si’da/ mini ’koki dhu ’ce gom aha/ mo. A’di ta gwo jin ona Tap̱a mo. 22Wakan ’twan tiya uni ta jamas mii mo, yisa gom uni gun gam gwo is mo hili gom uni gun dar gi gwo jin gamu is mo. Nye, gwo jin onu is mo tani a’di yisa gom uni gun ’kon ki dar gi gwo jin gamu is mo, hili gom uni gun gami gwo is mo be. 23Waḵki/ wakan mo tani aḵaniisa ’baar mo ka tul ’kup̱ mo dhali uni ’baar mo o gwo ki ’twan tiya mo tani dhali ’kwani gun ’kon ka pije/ walla gun daran ki gwo jin gamu is mo tani waḵki/ uni cic̱in mo tani mina uni ’koki o gwo ki um sona du mowa? 24Hili waḵki/ uni ’baar mo o gwo is mo dhali a’di jin dara’d gi gwo jin gamu is mo walla akamu/ jin di’d ka pije/ cic̱ki’d mo tani a’di sugu adu mo ki uni ’baar mo dhali a’di doṯu gwo gom miim piti mo ki uni ’baar mo si’da/. 25Adum piti jin di’d ki kup̱ mo tani thisu ṯor mo be. Dhali wakan mmobiṯkina a’di bwam/em piti a’cesh mo tani a’di midi luŋa Arumgimis mo dhali ṯor eya tente/ ka Arumgimis ka jiŋ gana/ a’di di’d e bwam um mo be. 26Kataye si’da/, iwaḵ mo? Ki um tulki is mo mmonṯal ’de/ mo um ka ’deṯe/ ’deṯe/ yuḵki gway mo dhali ta gi gwo jin ṯoru mo dhali gwo jin ’ceenu mo dhali ’twaŋ kamu/ jin ṯoru mo walla gwo jin luḵuwa luḵ mo. Dhalka ris to ’baar mo miinu mo mmonyaŋa nyaŋ mo. 27Waḵki/ wathiŋ kamu/ wal ’twaŋ kamu/ mo tani dhalki uni mini mii ’ko jasi su/ mo walla midi mii ta jasi kwara mo dhali uni gwan ka ’deṯe/ ’deṯe/ ki jiŋ garr mo dhali dhalki jaŋ kamu/ iluḵi ’twa/ mo. 28Hili waḵki/ jaŋ kamu/ midi diki di mo mmoluḵ ’twa/ mo tani dhalki uni ka ’deṯe/ ’deṯe/ ’peni uni mo ’kon ki shwam mo eya ḵaniisa mo dhali o gwo ki is buni mo dhali eya Arumgimis mo be. 29Dhalki uni su/ walla kwara gun ta iman/o gwo jin onu is mo mmoṯor gwo mo tani dhali dhalki kun tiya uni nyiṯẖ a’di jin onu mo. 30Waḵki/ gwo jin ’ceenu onu gom a’diŋ kamu/ jin di’d ki she/ mo tani dhalki a’di jin ṯwa/a/ c̱a’ba’d ki shwam mo. 31Haali/ umi ’baar mo mini mish gwo o jin onu is mo ka ’deṯe/ ’deṯe/ mo. Wakan ki umi ’baar mo mini mish gwo ’ban mo dhali umi ’baar mo minu ’bitha du is mo be. 32Dhali shi/in gi iman/o gwo jin onu is mo tani uni ’dap̱an ki gwo jin onu is mo be. 33Haali/ Arumgimis yisa ta’da Arumgimis jin duŋkurki mii mo, hili a’di ta ji gi mo ma ḵu’th is mo be. Me’da risa ḵaniisa ’baar mo gi imandhunu ki she/ ki dhelel dhelel mo tani 34up̱ mini mii ’ko ki shwam mo eya ḵaniisa mo. Haali/ uni ’konuki dhal bway mo mmo/o gwo mo, hili uni mini mii ’ko ki ’ko’d me’d mo me’d isi gwoŋḵan jin c̱ikunu mo jin o gwo kan si’da/ mo. 35Waḵki/ toŋ kamu/ di’d jin ona bwa uni mmomish mo tani dhalki uni idoṯ ikaṯẖim buni e gu’b buni mo. Haali/ a’di ta mii jin ’the is ki ’the mo goma ’bom mmoṯor gwo eya ḵaniisa mo be. 36Katintaye? Ki gwo ma Arumgimis piyi’d ’peni uma? Walla a/um a’di um ’cena ijidhirkina a’di mowa? 37Waḵki/ wathin ṯal ’deŋ kamu/ midi kulum gwo ibwa mo ki a’di ta a’di jin midi o gwo is mo walla gom to gi shi/in mo tani a’di midi ’taki nyiṯẖ gwo gom gwom pem jin ’kwarka/ mo gom um mo ta gwoŋḵan gi Tap̱a mo be. 38Waḵki/ wathin ṯal ’deŋ kamu/ diki mish a’di yan mo tani a’di minu mish ’ban mo yisa. 39Wakan iwaḵ pem mo, oyi bwa ka daran du mo mmo/o gwo jin onu is mo dhali dhalku/ ki nona non ki bway mo mmoṯor gwo ki ’twan tiya mo. 40Hili aris to ’baar mo minu ’taki mii mo ki mii jin thuḵu mo dhali ka p̱ara p̱o/ mo be.

will be added

X\