KURINṮH̱UUS ’DE/ 12

1Shwane/ isi gwo gom to gi shi/in kun c̱inu ki me’d mo iwaḵ mo, aha/ dinaki ŋap̱ um mmota p̱us mo. 2Um mishin me’d jin ’kona um ki dar ki ji gi luŋuŋ gana/ mo tani um suskunu this e mo mmoluŋ tomp̱inycon mo kun ’kon ki muṯṯ mo, ma e bway gunn kun joc̱kunu um mo. 3Wakan aha/ ŋap̱a um mo mmomish gwo ’ban mo ki wathin ṯal ’deŋ kamu/ yisa di’da jin oki gwo ki Shi/in Dheleladhelel ma Arumgimis mo ki sule/ mo mmo/o gwo mo ki: Dhalka Ḵrisṯẖos a’di jeenu mo. Dhali jan ṯal ’deŋ kamu/ yisa midi mish gwo o mo mmo/o ka: Yesus ta Tap̱a mo isi ciki/ ki Shi/in Dheleladhelel mo be. 4Hili to gun c̱inu ki me’d mo tani tana e kuku/ mo, hili ’peni Shi/ina ’de/ mo be. 5Dhali hili mii ma ṯu’c tana e kuku/ mo, hili Tap̱a ṯal ’de/ mo be. 6Dhali hili mo jin miinuwa ṯu’c tana e kuku/ mo, hili a’di ta’da Arumgimisa ’de/ mo jin umki uni eya ris uni ’baar ka ’deṯe/ ’deṯe/ mo be. 7E uni ’baar ka ’deṯe/ ’deṯe/ mo tani mo jin ṯoru ki Shi/in mo tani a’di c̱inu mo gom mo jin woṯẖuwa woṯẖ mo gom ’kwani ’baar mo. 8E wathiŋ kamu/ ’de/ mo tani a’di c̱inu Shi/in mo jin ta moyuḵ gi gwo mo dhali e jaŋ kamu/ mo tani mo jin ta monyiṯẖ gi gwo mo isi me’d gwo gi ṯala Shi/ina ’de/ mo be. 9E jaŋ kamu/ mo tani mo jin gamu gwo is mo tani ki jasi Shi/ina ’de/ mo. E jaŋ kamu/ mo tani to gun c̱inu ki me’d mo mmowac̱a wac̱ mo tani ta ji gi Shi/ina ’de/ mo be. 10E jaŋ kamu/ mo tani mo jin miinu miimer mo dhali e jaŋ kamu/ mo tani mmo/o gwo jin onu is mo dhali e jaŋ kamu/ mo tani mo jin mishu shi/in mo mmodhu ka ḵwa/um bwa mo dhali e jaŋ kamu/ mo tani mo jin mishu ’twan tiya wal mo e kuku/ mo dhali e jaŋ kamu/ mo tani mo jin mishu ’twa/ luḵ ki ’twan tiya mo be. 11Aris uni gwansani ’baar mo umu mo ’peni a’din ’de/ mo dhali Shi/in ṯal ’de/ mo mmopwaḵ bwa mo e uni ka ’deṯe/ ’deṯe/ mo me’d jin ona a’di bwa mo be. 12Haali/ me’d jin ṯala buŋgwar isa ’de/ mo tani dhali tom buŋgwar is ŋala/ wana risa dhali to gi buŋgwar is mo tani bala ’ka’da miiya ma e buŋgwara ’de/ mo tani wakani a’di ta’da Ḵrisṯẖos mo be. 13Haali/ ki Shi/ina ’de/ mo tani ana ’baar mo ’kokunu mo mmocuc̱ mo ki yi’de/ mo e buŋgwar isa ’de/ mo – ku Yahuuda/ dhali kuŋ Griḵi mo, walla uni gun ta c̱iŋkina/ kun yolu mo walla kun ’kon ki ’kus mo – aris uni ’baar mo ’kokunu mo mmodhu mo mmonyaḵ p̱i ’peni Shi/ina ’de/ mo be. 14Haali/ buŋgwar is mo tani a’di diki ta jasi gom en toŋ kamu/ mo hili gom mmota aris mo be. 15Waḵki/ sho’k midi ’taki o gwo mo ki: Haali/ aha/ ŋala/ tana me’d mo tani aha/ yisa icila buŋgwar is mowa, itani a/a’di midi ’taki ’cwap̱ a’di ari’ceenne/ ’peni buŋgwar is mowa? 16Dhali waḵki/ ’ce midi ’taki o gwo mo ki: Haali/ aha/ ŋala/ tana e mo tani aha/ yisa icila buŋgwar is mowa, itani a/a’di midi ’taki ’cwap̱ a’di ari’ceenne/ ’peni buŋgwar is mowa? 17Waḵki/ buŋgwar is ka ’bimpil mo midi ’taki ta e mo tani mane mo jin minu ’taki ciḵ gwo mo? Waḵki/ buŋgwar is ka ’bimpil mo midi ’taki ta ’ce mo tani mane mo jin minu ’taki jiḵa shim to mo? 18Hili me’d jin wana a’di kan mo tani Arumgimis a’di thumki hilsaŋ e buŋgwar is mo uni ’baar ka ’deṯe/ ’deṯe/ mo me’d jin kwanykina a’di uni mo be. 19Waḵki/ hilsaŋi ’baar mo mini ’koki lac̱a/ mo tani mane mo jin mina buŋgwar isi ’taki di mo? 20Me’d jin wana a’di kan mo tani mo ma ’ci’cimi’th ŋala/ wana risa, ba buŋgwar is ṯal ’de/ naskina/ mo be. 21E midi mol gwo o gom me’d mo ki: Aha/ mina mii ta gi /eya? walla doḵ/e ’kup̱ midi o sho’k kan mo ki: Aha/ mina mii diki ta gi /e mo. 22E gwo jin ta c̱a’ckon mo tani ’ban gi buŋgwar is mo kun simmi mii e mo mmo’ka’d is mo tani uni ta uni gom a’di mo be. 23Dhali ’ban gi buŋgwar is gwansan gun ṯosha ana gun aṯẖi montaḵ mo tani ana tashu ki montaḵ jin caaca mo, dhali ’ban gi buŋgwar is bana gun aṯẖa she/ ki aṯẖ mo tani dhuna ana ki yos mo, 24a’di jin minu mii ’koki mii ta mo gom ’ban gi buŋgwar is gun ’koki aṯẖ she/ kan mo. Hili Arumgimis a’di su’kki buŋgwar is kan mo mmmoc̱ikina a’di montaḵ jin caaca e ’ban gi buŋgwar is jin aṯẖki’d mo be 25ki moŋkamu/ midi ’taki diki di ki shu mo e buŋgwar is mo, hili ki to gi buŋgwar is mo mini nyaḵ hili e ka rem ’kup̱ mo be. 26Waḵki/ tom buŋgwar isa ’deŋ kamu/ ’koshu ki isa nyor mo tani aris uni ’baar mo ’koshu ki isa nyori monṯal ’de/ mo. Waḵki/ tom buŋgwar isa ’deŋ kamu/ taḵu mo tani aris uni ’baar mo ’kunya bwa mo imonṯal ’de/ mo be. 27Shwane/ um ta buŋgwar is ma Ḵrisṯẖos mo dhali umi ’baar mo ta tom buŋgwar is piti ki she/ ki she/ mo be. 28Dhali Arumgimis a’di ki lege’th kun tiya eya ḵaniisa mo: Uni gunn kun ta kun ṯwa/a/ mo ta uni gun dhunu ki she/ mo, dhali kuŋ ’ko’d mmota imanc̱i gwo kun onu is mo dhali kun ’kon ma p̱o/i kwara mmota imanṯor gwo mo, dhali kun ta imanmii miimer mo dhali kun ta imanwac̱a wac̱ mo dhali kun ta imanwoṯẖa/ woṯẖ mo dhali kun ta imanjiya ji mo dhali kun ta imanwal ’twan tiya ki she/ ki she/ mo be. 29A/aris uni ’baar mo ta uni gun dhunu ki sheya? A/aris uni ’baar mo ta uni gun ta iman/o gwo isa? A/aris uni ’baar mo ta imanṯor gwowa? A/aris uni ’baar mo mii miimera? 30A/aris uni ’baar mo bu’th to gun c̱inu ki me’d mo mmowac̱a wac̱ mowa? A/aris uni ’baar mo mishki ’twan tiya wal mowa? A/aris uni ’baar mo ta imanluḵ ’twaa? 31Hili tayi ki bwa jin onu ka daran du mo gom to gun c̱inu ki me’d mo kun yip̱u mii is mo. Dhali aha/ mina ṯor a’di um jin ’ce’de’da p̱o/ mo a’di jin ’boro’d ki isi ’bor gana/ mo be.

will be added

X\