LIPA ORA SIRIMU 2

1[Aku yemone aku nimbale pe nando nimbale:] “Epesasi taono Karasinga yombo talapemonga angellomondo pepá toko i-siku ningu mundou: “I ungu pepána tokoromo ye kombokandi yopoko-pakara ki-lomekondo ambolopa, kou-gollone seli sepe-llame yopoko-pakara lemóna andolemo yemone ‘aku angellomondo nieni.’ nimba, nimba mundukumu. Yuni nimbale: 2seleno mele pali na kanolio. Kongonomo tondolo munduku seko, umbunama wendo olemo kinia munduku naa kelko tondolo munduku molemele mele kanolio. Ulu-pulu-kiri selemele yema kanoko paa kiri pilku seluna andoko naa molemele mele kanoliola. Ye marene “Olio Yesusini lipa mundorumu yema molemolo.” nilimili-na-kolo kolo tolemele yema nuni ‘Sikanje.’ ningu apuruku pilku kanokole ‘Ono kolo tokomele.’ ningu kanoleno mele kanolio. 3Nanga imbimu ambololenomonga yombomane nu seko kinjilimili-na-kolo nu kanu umbunama we mengo nanga kongonomo siye naa kololeno akumu na kanolio. 4Akumu peanga-na-kolo nane nu-kinia ungu se pelemomo niembo: Nuni u pulu polko na mondoko pilkuli paa konopu mondorunu mele kiniá aku siku na konopu naa mondoleno. 5U-pulu-pulu na konopu mondoko nanga ungumu ambolorunu-na-kolo kiniá siye selemo mele pilku konopu topele toko, u serinu mele pilku kelko aku siku sani. Molo aku naa senu liemu nu molonina ombole nunga sepe-llamemo lemó koleana wendo limbu. 6Aku-sipa na-kolo ulu peanga se selenomone nu lipa tapondolemo: Nu ye Nikollasi lombili pulimili yombomane selemele uluma paa kanoko kiri pilieleno. Nane kepe Nikollasinga talape yombomane selemele uluma kanopo kiri pilieliola. 7Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliepili. Yombo se enge nimba opa-toumu kamu topa mania mundumbamo ‘Alieli molopa mindi puli ulu-pulumu pelemo unjumunga mongoma nopili.’ nimbú. Aku unjumu Pulu Yemonga kaliana gilimú.” ningu pepá toko Epesasi yombomanga nokolemo angellomo sieni.” nikiru.” [nirimu.] 8[Yemone kelepa nimbale:] “Simena taono Karasinga yombo talapemonga angellomondo i-siku pepá toko mundani: “I ungu pepána tokoromo u kumbi lepa molorumu pe akilepa molomba yemonga ungumu. U kolorumu pe lomboropa ola molorumu we molemo aku [ye]mone i ungumu nimba mundukumu. Yuni nimbale: 9“Ono mindili nongo koropa pupili molemele mele kanolio. [Sika kangikundu koropa pupili molemele-na-kolo konopukundu kamakoma molemele.] Yombo marene ‘Juda yomboma molemolo.’ nilimilimane ono-nga ungu-taka tondoko ungu-bulkundu nindilimili mele kanolio. Kanu yomboma paa sika Juda yomboma mólo. Ono [kurumanga nokoli] Setenenga talapena molemele yomboma. 10Ono mindili nonge mele pilku mini-wale naa mundangi. [Kurumanga nokoli] depelemone ono yombomanga mare ‘Na munduku keleangi.’ nimba ka-ulkana panjimba kinia wale rureponga talo ono mindili nonge. Pe na munduku naa kelko nanga yomboma molkole kamu kolongi liemu nane ‘Ono méle kaloli siembo.’ nimbu alieli molko kondoko mindi pungí ulu-pulumu simbú. 11Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliepili. Enge nimba opa-toumu kamu topa mania mundumba yombomo ‘Yomboma wale talo-siku kolangi.’ nimbú kinia yu-kinia ulu se paa naa pemba.” ningu pepá toko Simena yombomanga nokolemo angellomo sieni.” nikiru.” [nirimu.] 12[Yemone kelepa nimbale:] “Pekamame taono Karasinga yombo talapemonga angellomondo i-siku pepá toko mundani: “I ungu pepána tokoroma ye opa seli lu-pulta ekendo-ekendo nee molemomo taltopa molemo yemone aku angellomondo nimba mundukumu. Yuni nimbale: 13“Nu moleno koleamo na pilkiru. Nu [kurumanga nokoli] Setene ye nokoli kingimu molopa nokolemo koleana moleno. Aku-sipa na-kolo na ambolko kondoko, na mondoko pilierinu mele ‘Naa piliambo.’ ningu na munduku naa kelierinu. Nanga unguma pipili naa kolopa yomboma nimba sirimu ye Andipasi ononga kolea Simena, Setene akuna nokopa molemo kolea kanuna toko kondoringi wale kinia kepe na munduku naa kelko ‘Karasi yu Ye-Awilimu mólo.’ ni naa nirinu. 14Aku-sipa na-kolo nane nu-kinia kanopo kiri pilielio ungu mare pelemo, akuma i-sipa: Nuni na Karasinga yombo nokoleno talapemonga ye mare ye Bellamene mane sirimu mele kuru mondoko pilku molemele. Bellamene ye nokoli kingi Bellake mane sirimu mele i-sipa: “Nuni ‘Isirele yomboma molko kinjangi!’ ningu ono kondi toko, we-mélema ‘Olionga pulu yema.’ ningu popo toko kalolemele kere-langima nongo, wa ulu-kirinale senge mele aulka se liku ora sieni.” nirimu. 15Aku sikula nu-kinia molemele yombo mare ye Nikollasi lombili pulimili yomboma unguma pilku limili mele aku siku unguma pilku likuli seko kinjiku molemele. 16Akumunga, nu akumu kanoko kiri pilku konopu topele tani. Naa senu liemu nane nu molonina ombo nanga opa seli lu-pulta kerena gilimúmuni nu-kinia ombo opa sembó. 17Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliepili. Yombo se enge nimba opa-toumu kamu topa mania mundumba yombomo nane kere-langi mana lopi sepa lemómo simbú. Kou kake seli se, akumunga imbi konde se tombo molombamo, yombo se paa manda naa kanopa imbi simba, kou simbú limba yombomo mindi kanu imbi tombomo kanopa imbi simba.” ningu pepá toko Pekamame yombomanga nokolemo angellomo sieni.” nikiru.” [nirimu.] 18[Kanu-kinia yemone kelepa nimbale:] “Tayataira taono Karasinga yombo talapemonga angellomondo pepá toko munduku i-siku nieni: “I ungu pepána tokoroma Pulu Yemonga Malo, sepe nolemo mele yunga mongomo tondolo pa sepa, kopa konde kariyápa mele mini-mana selemo mele aku sipa kimbu pa selemo ye akumuni nimba mundukumu. Yuni nimbale: 19“Nu ulu selenoma kanolio. Nu konopu mondoko, na kuru mondoko, nanga kongonomo sendeko, umbunama wendo olemo kinia tondolo munduku molko, nu u serinu mele maniandopa, kiniá seleno mele olandopa, akumu nane kanolio. 20Aku sika na-kolo nane nu kanopo kiri pilielio mele i-sipa: Kolo topa “Pulu Yemonga ungu-umbu tondolemoma pilipu nimbu siliu.” nilimú ambo Jesepele, yuni nanga kendemande-yomboma kondi topa mane sipa nimbale: “Wa ulu-kirinale seko, we-mélemando ‘Olionga pulu yema.’ ningu popo toko kere-langi kalolemele kere-langima nonge kinia papu.” nilimú kanu ambomo iri toko “Pu.” naa ningu we molopili siye kololeno. 21‘Yu wapora tolemo mele kanopa kiri pilipa konopu topele topili.’ nimbu wale mare we molorundu-na-kolo yu ‘Konopu topele naa tombo.’ nimba sepa kinjerimu mele we sepa molemo. 22Akumunga, nane ‘Yu kuru awili-sepa topili.’ nimbú. Yu pea wa ulu-kirinale selemele yema yuni ulu selemoma kanoko kiri naa pilku konopu topele naa tongi liemu ‘Mindili awili-seko nangi.’ nimbúla. 23Yunga bolangoma paa topo kondombóla. Aku sembó kinia na Karasinga talape yombomane kanokole, ‘Yunga yombomane konopumanga pilielemele mele kepe ulu se sengendo konopu mondolemele mele kepe yuni apurupa kanopale, ononga ulu selemelemanga yu-mele-mele méle kalomba.’ ningu pilingí. 24Ono na Karasinga yombo mare Tayataira taonona molko, kanu ambomonga ungu nilimúma yombo marene “Aku unguma [kurumanga nokoli] Setenenga ungu tondoloma.” nilimili aku unguma naa pilku limili yombomando ungu se nimbú sekero. Umbuna se pea ‘ono meangi.’ naa nimbú. I selu mindi niembo: 25Ono méle ambolkomelema tondolo munduku ambolko molangi na wambo. 26Yombo se enge nimba opa-toumu kamu topa mania mundupa, nane “Sei.” niliu unguma pilipa sepa molopili walemo pora nimbá kinia nane aku sembá yombomo ‘Yombo talapema nokopili.’ nimbu namba simbú. 27Tatane na ‘Yomboma nokambo.’ nimba namba sirimu mele yombo kanumu simbú kinia ‘yuni kanu yombo talapema tondolo mundupa nokomba. Mane selemele mingima kopene tondolo toko norupulu tolemele mele yuni aku sipa enge nimba nokomba.’ 28Kombokandi kolea tangombando orili-u gilimú akumu kepe yu simbú. 29Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliepili.” ningu pepá toko Tayataira yombomanga nokolemo angellomo sieni.” nikiru.” [nirimu.]

will be added

X\