MATEYU 27

1Orili-u kolea kokele tangorumu kinia Pulu Yemo popo tondoringi ye awilima kinia, Juda yombomanga tapu-yema kinia onone pali [Yesusinga kotemo pilku pora sikuli] ‘Yu topo kondamili.’ ningu, ningu panjeringi. 2Aku ningu panjikuli yu liku, ka toko, mengo pungu, [Romo] gapomano ye nokoli Paillate molorumuna mengo pungu kote senderingi. 3Kanu-kinia Judasi, yu Yesusi lipa yunga opa-touma sirimu ye kanumu, Yesusinga kotemo pilkuli “Kolopili, toko kondangi.” niringi kinia pilipale yuni Yesusi ono lipa sirimu mele pilipa kiri pilipale kelepa konopu topele topa ononga kou-sillipa wane paono tene u yu siringima kelepa memba pumba Pulu Yemo popo tondoringi ye awilima kinia Juda yombomanga tapu-yema kinia sipa nimbale: 4“Nane ye ono lipu sindu kanu yemo yu ungu se sepa naa kinjeli yemo ‘Toko kondangi.’ nimbu lipu sindumu paa ulu-pulu-kiri se sendu.” nirimu. Aku-sipa na-kolo onone pundu toko ninguli: “Akumu olionga ungu se mólo. [Nu nunu mindi olio liku sinu.] Akumu nunga kongonomo.” niringi. 5Kanu-kinia Judasi yuni kou-sillipa kanuma memba pumba [Pulu Yemo popo toringi] ulka-tembele palana topa anjukundu mundupale yu ono mundupa kelepa anju purumu. Anju pumbale ‘Ka nombo kolambo.’ nimbale ka se lipa memba pumbale ka nomba kolorumu. 6Pulu Yemo popo tondoringi ye awilimane kou kanuma [mania-polona] lierimu kanoko liku ninguli: “I kouma yombo topo kondomolondo símuluma kene ulka-tembele kouma kinia sere lepo taltomolo kinia manda naa sembá. Akumunga ungu-mane se pelemo kene naa taltamili.” ninguli 7ungu se ningu panjiku ninguli: “I kou-monemane mingi-sosipene mane sepa wamolemo yemonga mamo topo topo liemili. Yombo ma se naa lepa ononga kolea suluna yombo ya ongo molemelemanga yombo kolongema akuna óno sangi.” ninguli aku siku topo toko liltingi. 8[Kanu kou-monemane ye se toko kondonge aulkamo akisinderingi koumane] aku seringimunga kanu mamo imbi leko ‘Yombo Toko Meme Ondoringi Mamo’ niringi mele kiniá kepe aku sipu nilimulu. 9- 10[Juda ye awilimane] aku siku seringimunga Pulu Yemone ungu-umbu tondorumuma pilipa yomboma nimba sirimu ye Jeremayane ulu se pe wendo ombá u nirimu mele kamu wendo orumu. Yuni nimbale: “Ye-Awilimuni nando “Sei.” nirimu mele ono aku siku sengendo Isirele yombomane “Ye akumu kou-sillipa wane paono tenene topo toko liengi.” niringi kouma likuli, kanu koumane mingi-sosipene mane sepa wamorumu yemonga mamo topo toko liltingi.” nirimu kanumu mele kamu wendo orumu. 11Judasi aku sipa sepa molopili Yesusi Romo gapomano ye nokoli [Paillate] molorumumunga kumbikerena gilierimu kinia kanu ye nokolimuni [yunga kotemo pilipale] yu mangilipa pilipa nimbale: “Nu Juda yombomanga ye nokoli kingimu molo móloye?” nirimu. Yesusini pundu topa nimbale: “Sika nikinu. Akumu na.” nirimu. 12Pulu Yemo popo tondoringi ye awilima kinia, [Juda yombomanga] tapu-yema kinia, onone Yesusi kote sendeko Paillatendo [kolo toko] ungu awisili ninguli ningíndu “Yesusi yu sepa kinjilimú.” ningu yu kote senderingi kinia Yesusi yu ungu se naa nimba we gilierimu. 13[Yesusini ungu se naa nirimu kanopale] Paillatene yundu nimbale: “Nu ulu kiri awisili serinu nikimili mele nu naa pilkinuye?” nirimu kinia 14Yesusi [yu sepa kinjerimu niringi mele] pundu topa ungu seluri kepe naa nimba [we gilierimu kinia kanopale Romo] gapomano ye nokoli kanumuni paa mini-wale mundupa konopu awisili kimbu sirimu. 15- 16[Yesusi kote sendeko molangi,] ye se, yunga imbi Barapasi, yu mongo liltimu mele yomboma pali pilku moloringi kanu yemo yu ka-ulkana perimu. [Kalia-ingi senga senga, Juda yombomane kolea-awili Jerusalleme ongo akuna sukundu] Pulu Yemone ononga anda-kolepalima Naa Topa We Omba Purumu mele pilingindu kere-langi noringi walema wendo orumu kinia onone ka-ulkana perimu ye se imbi leko “Wendo liku mundou.” ningu mawa seringi kinia [Romo] gapomano ye nokolimuni kanu yemo wendo lipa yomboma sirimu. 17[Aku siku se-pu-pu seringi walema kamu wendo omba pepili Yesusi kote senderingi pilipale nirimumuni,] Juda yomboma liku maku toko moloringi kinia Paillatene ono mangilipa nimbale: “Ye nawe ka-ulkana wendo lipu ono siembo konopu lekemeleye? Ye Barapasi wendo lipu siembo, molo onone “Pulu Yemone “Ono nokopa kondomba ye se lipu mundumbu.” u nimba taltorumu ye nokoli Karasimu.” nilimili ye Yesusi wendo lipu siemboye?” nirimu. 18[We-yomboma Juda yombomanga ye awilima munduku kelko ononga unguma liku mokoli seko Yesusinga ungumu pilku yu lombili andoringimunga Juda yombomanga ye awilima] Yesusi-kinia konopu kiri panjikuli kote senderingi-na pilipale Paillatene aku sipa nirimu. 19Paillate kote pilieli polona [molopa ‘Juda ye awilimane pundu toko ungu se ningínje.’ nimba nokopa] molorumu kinia yunga menuni ungu se yu molorumuna nimba mundupa nimbale: “Nuni andi ye sumbi nílimu ungu se naa sei. Kiniá yu kaima sepo kanondumunga nanga konopuna umbuna awisili wendo omu kene yu ungu se paa naa sei.” nirimu. 20[Paillatene “Ka-ye nawe wendo lipu siemboye?” nirimu kinia pilkuli] Pulu Yemo popo tondoringi ye awilima kinia, [Juda yombomanga] tapu-yema kinia, onone we-yomboma kondi toko ungu-umbu tondokole “ “Yesusi topa kondopili. Barapasi wendo lipa sipili.” niee.” niringi. 21[Aku niringi kinia pilipale Romo] gapomano ye nokolimuni onondo “Yetolonga ‘nawe wendo lipu siembo.’ konopu lekemeleye?” nimba mangilierimu kinia onone pundu toko ninguli: “Ye Barapasi [wendo liku yando si].” niringi. 22Aku niringi kinia pilipale Paillatene onondo nimbale: “Aku liemu, onone “Pulu Yemone “Ono nokopa kondomba ye se lipu mundumbu.” u nimba taltorumu ye nokoli Karasimu.” nilimili ye Yesusi, nambi samboye?” nimba mangilierimu kinia onone pali “Yu unju-perana kolopili uku toko panjei!” niringi. 23Aku niringi pilipale yuni onondo nimbale: “Aku nambi semuye? Yu mongo nambolka mongore limuye?” nirimu. Aku-sipa na-kolo onone [kelko] paa tondolo munduku ninguli: “Mólo! Yu kolopili, unju-perana uku toko panjei!” niringi. 24Yunga ungumu naa pilku, opa senge seringi kanopale Paillatene no mare kolopa lipa, yombo liku maku toko gilieringima kanoko molangi ki kulumiye topa nimbale: “I yemo toko kondonge kolomba kinia ono-kinia ungu pemba; nanga ungu se naa pemba.” nirimu. 25[Aku sipa nirimu kinia pilkuli] yombomane pundu toko ninguli: “Yu tonge kolombamonga umbuna pembamo olio kinia olionga bolangoma kinia pepili.” niringi. 26Kanu-kinia ye Barapasi ka-ulkana wendo lipa ono sirimu. [Aku sepale] Yesusi lipa [yunga ami-yema] sipa nimbale: “Yu ka-pultane tokole pe ‘Unju-perana kolopili.’ ningu mengo pungu unju-perana uku toko panji-paa.” nirimu. 27Kanu-kinia [Romo] gapomano ye nokolimunga ami-yemane Yesusi liku kanu ye nokolimu perimu ulka awili akuna sukundu [yomboma liku maku toko moloringi koleana] punguli, ononga ami talape yema pali “[Yesusi ya molemona] sukundu-sukundu waa.” niringi. 28Kanu-kinia yunga mulu-maminiama kulku wendo lindiku, ‘Yu ye nokoli kingi se none sepili.’ ningu mulu-maminia kondoli peanga se pakondoko, 29unju-ka koko molorumu se mulkowe seko ‘Ye nokoli kingimunga waniemo.’ ningu pengena mere mundunduku, kingimane unju kope se we ambololemele mele koló se liku yunga ki-lomekondo amondokole niringimuni, yu gilierimuna komorongo toko pondoko ungu-taka tondoko imbi we kólo toko ambolko paka tondongendo “Juda yombomanga ye nokoli kingimu, nu gilinuye?” ningu 30yunga kumbikerena elkambe toko kandoko, koló kope ambolorumumu liku yunga pengena kope to-pu-pu seringi. 31Yu aku siku ungu-taka tondoko pora sikuli mulu-maminia kondolimu kulunduku, yunga u panjerimu mulu-maminiama kelko panjindikuli “Yu unju-perana kolopili, panji-pamolo.” ningu yu liku mengo puringi. 32[Romo ami-yemane Yesusi Jerusalleme palana] ultu mengo pungí punguli niringimuni, kolea Sairini ye se, yunga imbi Saimono, ambolko liku ka mele siku Yesusi kolomba unju-peramo “Kolali seko mendei.” ningu siringi. 33[Punguli] kolea Golkota pungu akuna moloringi. [Golkotanga ungu-pulumu ‘penge-bele lieli koleamo’ .] 34[Yesusi akuna mengo punguli niringimuni, ‘Yomboma mindili naa nangi.’ ningu] no-waenena sukundu marasene kombili seli se munduku taltoringi aku no-waenemo ‘Yu nopili.’ ningu, siringi-na-kolo aku no-waenemo nomba pilipale “Mólo.” nimba naa norumu. 35Kanu-kinia [ami-yemane] yu unju-perana ola panjikuli unjumu liku ola anjeringi. [Aku sekole, u unjuna ola uku toko naa panjikuli] yunga mulu-maminia [kulunduku taltoringima] ‘Moke samili.’ ningu ono yu-mele-mele lingí mele pilingindu kou-kate seko pe mulu-maminiama liltingi. 36Pe yu unju-perana ola giliepili tapu seko kanoko moloringi. 37‘Yu mongo liltimu mele yomboma kanangi.’ ningu I YE YESUSI JUDA YOMBOMANGA YE NOKOLI KINGIMU ningu imbi toko yunga pengena olakondo unjuna mondoringi. 38Opa seko mélema wa liltingili ye talo pea unju-pera talonga uku toko panjeringila. Se Yesusi yunga ki-lomekondo uku toko, se ki-tarokondo uku toko panjeringi. 39Akuna ongo puringi yombomane Yesusi [kanoko kiri pilkuli yu] ungu-taka tondoko iri-mele toko 40ninguli: “Aa! “Ulka-tembelemo sikisipuli kelepo wale yopoko omba pupili takopo limbu.” nirinu yemo, ‘Naa kolambo.’ ningu nu nunu liku tapondou. Nu sika Pulu Yemonga Malo liemu unju-perana mania ou.” niringi. 41Aku sikula Pulu Yemo popo tondoringi ye awilima kinia, Pulu Yemonga ungu-manemanga puluma pilku mane siringi yema kinia, [Juda yombomanga] tapu-yema kinia, onone kepe yu ungu-taka tondoko ninguli: 42“Yu yombo wema ‘Naa kolangi.’ nimba lipa tapondorumu-na-kolo yu yuyu ‘Naa kolambo.’ nimba manda naa lipa tapondokomo. Yu ‘Isirele yombomanga ye nokoli kingimu [molio.’ nilimú mele sika aku sipa] molemo liemu yu yuyu unjuna mania opili. Yu yuyu unjuna mania ombá kinia kanopole ‘Yu sika olionga ye nokoli kingimu.’ nimbu tondolo mundupu pilimulú. 43Yuni ‘Pulu Yemone na lipa tapondomba.’ nimba kuru mondopa molemo kanumu; yu “Pulu Yemonga Malo molio.” nilimú kene Pulu Yemone yu kanopa peanga pilipa, ‘Yu mania we olkanje papu.’ konopu liemu liemu manda, yu omba yu lipa tapondopa [unjuna wendo lipili]. [Aku sipa semu liemu ‘Yu sika Pulu Yemonga Malo.’ nimbu kuru mondomolo].” niringi. 44Wa noli ye talo yu-kinia unjutolonga uku toko panjeringi yetolone yu aku siku ungu-taka tondoringilila. 45[Yesusi unjuna ola we pepili] awi-tangoli ena tuwellepo killoko serimu kinia kolea pali simbulu topale, pe ipupini ena tere killoko serimu kinia kelierimu. 46Ipupini ena tere killoko mele serimu kinia Yesusini ru nimba nimbale: “Elloi, Elloi, llama sapakatani.” nirimu. Akumu Juda yombomanga ungu se. Akumunga pulumu i-sipa: “Nanga Pulu Yemo, nanga Pulu Yemo, na nambi semu-na munduku kelienuye?” nirimu. 47Akuna nondoko gilieringimanga marene yuni aku nirimu kinia pilku [sunduku] ninguli: “Piliame. Yu Illainja mangilkimu.” niringi. 48Aku nirimu kinia pilieringimanga ye se popenge sepa lisipa pumba ulú-pinja mele se lipa no-waene kombili seli mare akuna panjipale, ‘Yesusi no-waene kombili seli pinjana pelemomo nopili.’ nimba memba omba unju-pepena senga ka topa olando sirimu. 49[Aku-na-kolo yu no-waenemo sirimu mele kanokole] we-yombomane ninguli: “Mólo. Kiniá unjuna we pepili. Illainjane sika yu ‘Naa kolopili.’ nimba lipa tapondopa mania limbando okomonje, kanopo kanamili.” niringi. 50Yesusini ungu se tondolo ru nimbale, pe yunga minimundu ‘Pu.’ nimba yu kolorumu. 51Yu aku sipa kolorumu kinia [ulu awili mare] waltikele [wendo orumu.] Pulu Yemo popo toko kaloringi ulka-tembele [Jerusalleme sukundu gilierimu akuna sukundu Pulu Yemo molorumu] suluminia paa kake sélimunga kerepuluna [‘Yomboma sukundu naa pangi.’ ningu u alieli] mulu-maminia awili sene pipi siku panjeringi gilierimu. [Yesusi kolopa pora sirimu kinia] kanu mulu-maminiamo awi-suku-singina olakondo maniando sipa olá torumu. [Aku sepa,] ma jimi-jimi se sepa, kou awilima topa ungu-mangu topa, 52yombo u óno seringi koleama anju yando pumba, Pulu Yemonga yombo kake seli u koloringima [Pulu Yemone] topa makisinderimu. 53Lomboroko ola molko óno-kolea peringina wendo ongole, Yesusi pe lomboropa ola molorumu kinia Pulu Yemonga kolea-awili kake selina sukundu punguli yombo awisili ‘Kanangi.’ ningu puringi. 54[Romo] ami-ye wane anderete nokorumu yemo kinia, yu pea Yesusi serimu mele tapu seko kanoko moloringi ami-yema kinia, onone ma jimi-jimi sepa ulu lupa lupama wendo orumu kinia kanokole ono paa mini-wale munduku ninguli: “I yemo yu paa sika Pulu Yemonga Malo lepomo.” niringi. 55Ambo awisili mele, [Yesusi unju-perana kolorumu] akuna sulu seko kanoko gilieringi. U kanu amboma [ononga pulu-]kolea Gallilli disiriki munduku kelko Yesusi lombili andoko liku tapondoko nokoko [Jerusalleme pea] oringi amboma. 56Ononga ambo se Makatalla taono ambo Maria, se Jemisi kinia Josese kinia olonga anumu Maria, se ye Seperinga malotolonga anumu. 57Ipupini, kolea kala tomba serimu kinia Arimatia taono ye kamako se, yunga imbi Josepo, yu kepe Yesusi lombili andorumu ye se, yu omba 58[Romo gapomano ye nokoli] Paillate molorumuna pumba, “Yesusinga ónomo na si.” nimba mawa serimu kinia Paillatene yu “Ónomo lipili.” nimba [ami-yemando nimba mundorumu]. 59[Paillatene “Manda.” nirimu kinia] Josepo pumba ónomo mania lipa, mulu-maminia konde sene lipa okorumu. Okopale 60kou-kande konde se, Josepo yu ‘Kolombo kinia akuna na óno sangi.’ nimba kou-kande se akupa taltorumu kou-kandemonga sukundu memba pumba taltorumu. Taltopale kou-kande kerepuluna kou awili se perele-marele memba omba pipi sipale yu kelepa purumu. 61Makatalla taono ambo Maria kinia Maria se kinia olo kou-kandemo lierimu kerepuluna nondoko [yu ónomo kou-kandena taltorumu mele kanoko] moloringili. 62[Kanu-kinia,] ‘Opali [koro molomolo] wale Sambatemo.’ ningu pilkuli, kiniá-mele, mélema undu-undu siringi kanu walemo pora nirimu kinia opalikundu Pulu Yemo popo tondoringi ye awilima kinia, Parisi yema kinia, ono [Romo gapomano ye nokoli] Paillate molorumuna pungu liku maku toko gilku 63ninguli: “Ye-Awilimu, ye kanumu u naa kolopa we molopale yombomane ‘Sika.’ ningu kuru mondonge unguma kolo topa nirimu kanu yemo yu “Kolopole wale yopoko omba pumbá kinia lomboropo ola molombo.” nirimu olio pilierimulu kene 64[nuni ami-yemando] “Kanu yemo [oleanga] óno sengi kou-kandemo wale yopoko paa mimi siku nokaa!” nieni. Naa nokonge kinia yunga lombili andoli yemane ónomo ongo wa liku mengo punguli “Yu lomboropa ola molopa omba pumu.” ningí. Aku siku kolo toko ningí kinia yu u ‘ ‘Sika nikimu.’ niengi.’ nimba kolo torumu ungumu maniandopa, onone ‘Yombomane ‘Yuni sika aku sipa semu.’ niengi.’ ningu kolo tonge ungumu paa olandopa pemba.” niringi. 65Paillatene [Juda ye awilimando] pundu topa nimbale: “[Aku liemu,] ami-ye mare liku mengo pungu, “Yemo óno sengi koleamo nokoko kondangi.” ningu mondoko, ‘Yombomane óno-koleamo ungu se naa sangi.’ ningu ‘Aulkamo tondolo pipi siemili.’ konopu lenge mele sangi.” nirimu. 66[Aku nirimu kinia] pilkuli ami-ye mare liku mengo pungu, yombo óno-kou-kandemo pipi siringi koumu pala seko pele leko ononga imbimu akuna toko mondokole, “Ami-yema akuna nokoko molangi.” ningu mondokole [ono puringi].

will be added

X\