MAKO 7

1[Walte] Parisi ye mare kinia Pulu Yemonga ungu-manemanga puluma pilku mane siringi ye mare kinia ono Jerusalleme munduku kelko Yesusi molorumuna ongo maku toko moloringimane 2yu lombili andolimane ki kalaro molopili u kulumiye naa toko kere-langi we ambolko noringi kinia kanokole kanoko kiri pilieringi. 3([Sika kalaro naa molorumu-na-kolo] Parisi yema kinia we-Juda-yomboma kinia ononga anda-kolepalimane “Saa.” niringi mele pilku liku sengendo u ki pali nona munduku kulumiye toko kondokole kere-langi pe noringi. We naa noringi. 4Makete-koleana pungu ulkando ongole ki u kulumiye naa tokole [maketena topo toko liltingi] kere-langima naa noringi. Anda-kolepalimanga seringi ulu-pulu lupa lupa awisili pilku liku seko moloringila. Kapoma kinia, mingima kinia, kere-langi noringi poloma kinia, aku sipa mélema alieli-alieli we kulumiye toringi.) 5[Juda yombomane aku siku seringi]-kulu Parisi yema kinia, Pulu Yemonga ungu-manemanga puluma pilku mane siringi yema kinia, onone [Yesusi lombili andolimane aku siku ki kulumiye naa toko kere-langi we noringi kanokole] Yesusindu mangilku pilku ninguli: “Anda-kolepalimane “Saa.” niringi mele nunga lombili andolimane nambi semu-na naa pilku liku selemeleye? Ononga kima kalaro molopili kere-langi nolemele kanumu.” niringi. 6Yesusini onondo pundu topa nimbale: “Ono [ungu-manema pilku mane silimili yema kinia Parisi yema kinia] ono topele-mapele toli yema molemele! Pulu Yemone ungu-umbu tondorumuma pilipa yomboma nimba sirimu ye Aisayane onondo nirimu mele papu nirimu. [Onone kiniá selemele mele yuni u nimba Pulu Yemonga] bokuna torumu molemo mele i-sipa: [Pulu Yemone nimbale:] “Kanu yomboma ononga keremane na kape ningu ‘Ye awili olandopamo. Nu lipu awi silimulu.’ ningu na imbi ambolko paka tondolemele-na-kolo ononga konopuma kinia nanga konopumu kinia seluna naa pulimú. Lupa lupa pelemo. 7Onone ‘Nanga imbi ambolopo paka tondamili.’ ningu na we popo toko kape nilimili. Mana-yombomane mane silimili unguma mindi mane sikuli ‘I ungu-manema Pulu Yemone “Saa.” nilimú ungu-manema.’ ningu pilku liku selemele, akumunga na popo tonge kinia unguri naa sembá.” nirimu kanumu. 8Pulu Yemone “Saa.” nirimu ungu-manema munduku kelkole anda-kolepalimane “Saa.” niringi mele mindi ambolko molemele.” [nimba Yesusini] nirimu. 9[Yesusini] ungu mare pea onondo nimbale: “Ononga anda-kolepalimane “Saa.” niringi mele pilku liku sengendo Pulu Yemone “Saa.” nirimu ungu-manema bulu silimili mele papu selemeleye? 10Akumunga Mosisini nimbale: “Aminieli lanielinga unguma pilku liku, liku awi siku saa.” nimba “Yombo sene yunga anumundu molo lapando ungu se nimba kinjipa iri tomu liemu kanu yombomo toko kondangi.” nirimu kanumu. 11Aku-sipa na-kolo ono [Juda yombomanga tapu-yema]ne ninguli: “Ye sene yunga anumu lapatolondo nimbale: “Nane olo méle mare lipu tapondopo silkama koronga ‘Pulu Yemo simbú.’ nimbu panjerindu kanumunga olo manda naa lipu tapondopo simbú.” nimbale 12yunga anumu lapatolo naa lipa tapondomba kinia papu.” ningu mane silimili. 13Aku siku mane silimili ungumuni ‘Anda-kolepalimane mane siringi ulu-puluma olandopa.’ ningu ‘Pulu Yemone nirimu ungumu uluri molo. Mania pupili.’ nilimili. Onone ulu lupa lupa awisili aku siku seko molemele.” nirimu. 14Aku nimbale Yesusini maku toko moloringi yombomando “Na moliona waa.” nimba onondo nimbale: “Nane [aku nikirumunga ungu se] nimbú sekero ungumu onone pali komu sendeko ungumunga pulumu pilku kondayo. 15Yombomanga kangina ultukundu lepale kerena pumba olona sukundu pulimú mélsene [Pulu Yemo manda popo tonge aulkamo pipi silimú] kalaro se manda naa mondolemo. Yombomanga konopuna sukundu pepale wendo olemo ulumane mindi yomboma kalaro mondolemo. 16(Yombo komu-pea lemba yomboma i ungumu mimi siku piliangi.” nirimu.) 17Kanuna maku toko moloringi yomboma Yesusini mundupa kelepa ulkana sukundu purumu kinia yu lombili andolimane yu mangilku pilku ninguli: “Aku ungu-ikumunga pulumu nambolkanje? ningu para sieni.” niringi kinia 18Yesusini onondo nimbale: “Kiniá kepe naa pilkimiliye? Yombo senga kangina ultu lepale sukundu pulimú mélse yunga konopuna naa pumba, olona sukundu pumba ultu omba le-muruna kamu pulimúmunga yu kalaro manda naa mondolemo mele naa pilkimiliye?” nirimu. (Yesusini aku sipa nirimumunga “Kere-langimane pali yomboma kalaro se naa mondolemo.” nimbando nirimu.) 20[ “Kerena sukundu pulimú mélemane aku sipa unguri naa selemo.” nimbale] yuni kelepa nimbale: “Yombo senga konopuna sukundu pepale wendo olemo kanu mélemane yombo se [Pulu Yemo popo tomba aulkamo pipi silimú] kalaro se mondolemo. Ulu-pulu-kirima u konopumuni pilkuli [pe kamu selemelemonga] “Konopuna pepale wendo olemo mélemane kalaro mondolemo. [We naa selemele.]” [nikiru.] Kanu mélema i-sipa: Konopumuni ulu-kirima pilielemele; wa ulu-kirinale lupa lupama andoko selemele; wa nolemele; yomboma toko kondolemele; ambo ye pulima molo ye ambo lilima yombo lupama kinia ulu-kirinale selemele; 22yombomanga méle taltolemelema ‘Na liembo.’ nilimili; ulu-pulu-kiri lupa lupama selemele; kolo tolemele; yombomane kanokole pipili kololemele uluma pipili naa kolko sumbi siku selemele; yombo lupama molemele mele kepe ononga mélema yama mengo ‘Yu malo.’ konopu lemele; ‘Yomboma pipili kolko molko kinjangi!’ ningu ungu-bulkundu nindilimili; ‘Na imbi ola molemo. Na pilipa kondoli olandopa pelemo. Yombo lupama tondolo se naa pelemo.’ ningu kara pulimili; amu toli uluma selemele; ulu-pulu akuma pilku selemele. 23Aku ulu-pulu-kirima pali yombomanga konopuna sukundu pepa wendo olemomane yomboma kalaro mondolemo, yomboma [Pulu Yemonga kumbikerena pungí aulkamo pipi silimú] kalaro mondolemo. [Ultu lepa olona pulimú mélemane unguri naa selemo].” nirimu. 24Kanu-kinia Yesusi molorumu kolea [Geneserete] mundupa kelepa [Juda yomboma moloringi kolea Gallilli disiriki ultukundu] kolea-awili Taya kinia Saidonotolo lierimu koleana sukundu purumu. Akuna purumu kinia yombomane yu ‘naa kanangi.’ nimba ulka senga sukundu pumba molorumu-na-kolo yu omba molorumu mele yomboma pilieringi. 25Yesusi yu omba molorumu akumu pilipale ambo se yu molorumuna sumbi sipa omba yunga kumbikerena mania molopa tamalu perimu. Kanu ambomo yu [Pulu Yemonga] Juda yombomanga talapena ultukundu ambo se, kolea Siria poropinji sukundu kolea Ponisia disiriki yunga pulu koleamo. Ambomonga lemenunga konopuna kuru se molopa ambolorumu-kulu Yesusi molorumuna omba mania molopa tamalu pepa yundu mawa sepa nimbale: “Nanga bolamo kuru se konopuna sukundu molemo kene yu [kondo kolko] kurumu toko makorou.” nirimu. 27[Ambomo yu ambo-lupa, Juda ambo se mólo, nimba kanopale] Yesusini ambomondo [ungu-iku se topa] nimbale: “Bolangoma kere-langi u nangi olo sepili. Ononga kere-langima lipu owáma simulú kinia manda naa sembá.” nirimu. 28Ambomone yundu nimbale: “Ye-Awilimu, sika nikinu-na-kolo owámane kepe bolangomanga kere-langi pundu mania pulimúma liku nolemele kanumu.” nirimu. 29Kanu-kinia Yesusini yundu nimbale: “Ambomo, nu aku siku nikinumu papu nikinu. Aku siku nikinumunga kuru kanumu nunga bolamonga konopuna sukundu molopa omba wendo pumu kene nu [konopu peanga lelko] pu.” nirimu. 30[Yesusini aku sipa nirimu pilipale] ambomo kelepa ulkando pumba kanorumu kinia lemenu konopuna kuru se naa molopili uru peli polona ola we molorumu kanorumu. 31Yesusi kolea-awili Taya mundupa kelepa kolea-awili Saidono sukundu omba pumba, ‘Kolea-Awili Rureponga Talo’ niringi koleana sukundu omba pumba, Gallilli nomu kelona [sukundu] orumu. 32Akuna moloringi yombomane yu molorumuna ye komu sipa ungu sumbi sipa naa nirimu ye se mengo ongo “[Yu peanga liepili] nunga kimuni ambolou.” ningu tondolo munduku mawa seringi. 33Kanu-kinia yombo kakapu seko moloringima mundupa kelepa “Oltolo molambili.” nimba kanu yemo senga memba pumbale nirimumuni, komutolonga ki-sundu sukundu mundupa, elkambe topa yemonga alimbolomo kimuni ambolopale, 34mulúna olando sipa kanopa, tondolo mundupa múlu lipa, Juda yombomanga ungu lepa yemondo nimbale: “Epata!” nirimu. (Kanu ungumunga pulumu “Komumuni piliei!” nirimu.) 35Aku nirimu kinia popenge sepa yemo komu-pea lepa yu ungu manda pilipa, alimbolomo takele serimu kanumu peanga lepa umbu-alimbolomo gilierimu kinia yu ungu sumbi sipa nirimu. 36Kanu-kinia Yesusini onondo tondolo mundupa nimbale: “Nane i ulu sekero mele anju yombo selurindu kepe paa naa ningu siee!” nirimu. Aku-na-kolo yuni “Mólo.” nimba wale awisili nirimu mele pilku mokoli seko yomboma anju-anju yuni serimu mele semane toko siliku mindi andoringi. 37[Yu serimu mele kanoringi yomboma kinia, anju semane toko siringi pilieringi yomboma kinia] ono paa mini-wale munduku ninguli: “Apa! Yuni selemo uluma peangama mindi selemo. “Komu silimúma ungu pilku, ungu naa nilimilima ungu ningu, saa.” nilimú kinia kepe unguma pilku unguma ningu selemele.” niringi.

will be added

X\