LLUKU 4

1Yesusi [no liltimu kinia] Mini Kake Sélimu yu-kinia omba molopa yunga konopuna molopa paa sengepea sepili no Jodane mundupa kelepale nirimumuni, Mini Kake Sélimuni yu kolea ku lielina memba purumu. 2Akuna Yesusi [Mini Kake Sélimu kinia molopili] [kurumanga nokoli] depelemo omba yu kondi topa molopili oli se koro talo omba purumu. Kanu walemanga kere-langi naa noli we molopa perimu kinia yu gelene kolopa molorumu. 3Kanu-kinia [kurumanga nokoli] depelemone yu [kondi topa] nimbale: “Nu Pulu Yemonga Malo liemu i kouma ‘Pellawa kaloli au liepili.’ ni.” nirimu. 4Aku-sipa na-kolo yuni pundu topa nimbale: “Pulu Yemonga bokumuni nimbale: “Kere-langimane mindi yomboma konde mololi ulu-pulumu naa silimú.” nimba molemo kanumu.” nirimu. 5Kanu-kinia depelemone Yesusi yu lipa memba pumba [ma-pangi] paa olana senga anjipale nirimumuni, yu ma-koleama pali waltikele lipa ora sipa, 6yundu nimbale: “I koleamanga pali tondolomo kinia méle peangama kinia Pulu Yemone nando “Nokou.” nimba koronga sirimu. Ima nane ‘Yombo se simbú.’ nindu liemu manda simbú. Nu na popo toko nanga imbi ambolko paka tondonu liemu i tondolomo kinia méle peangama pali nu lieni simbú.” nirimu. 8Kanu-kinia Yesusini depelemondo nimbale: “Pulu Yemonga bokumuni nimbale: “Pulu Yemo ononga Ye-Awilimu manjiku popo toko imbi ambolko paka tondoko, yunga kongonomo manjiku sendeko molangi.” nimba molemo kanumu.” nirimu. 9- 11Kanu-kinia depelemo yuni Yesusi lipa kolea-awili Jerusalleme memba pumba, [Pulu Yemo popo toko kaloringi] ulka-tembelemonga memba, paa ola imuna memba pumba anjipale nirimumuni, yundu nimbale: “Nu Pulu Yemonga Malo liemu nu lipa tapondomba kene po ningu mania pu.” [nirimu.] “Pulu Yemonga bokumuni nimbale: ‘Pulu Yemone yunga mulu-koleana angellomane ‘Nu ongo nokangi.’ nimbá. Onone nu ‘Kou sene kepe naa topili.’ ningu nu ononga kimane okoko lingí.’ nimba molemo kanumu. Aku sipa nirimu kene pilkuli aku siku sei.” nirimu. 12Yesusini yundu pundu topa nimbale: “Pulu Yemonga yombomando ungu se pea nimba molemóla. Akumu i-sipa: ‘Pulu Yemo ononga Ye-Awilimuni “Sembó.” nilimú mele ‘Sika nilimúnje molo kolo tolemonje kanamili.’ ningu onone yu manda manjiku naa sangi.’ nimba molemóla kanumu.” nirimu. 13Depelemone Yesusi kondi topa pora sipale nirimumuni, ‘Pe yu manda kelepo kondi tombo wale se nondopo pilipuli kelepo ombó.’ nimba yu mundupa kelepa purumu. 14Kanu-kinia Minimunga tondolomone Yesusi kelepa kolea Gallilli disirikindu yando memba orumu kinia akuna andopa serimu mele semanemo koleamanga pali anju anju purumu pilieringi. 15Yuni Juda yomboma maku toko Pulu Yemonga ungumu pilieringi ulkamanga pumba ungu-mane sirimu kinia yombomane pali yu kape niringi. 16Yesusi kolea Gallilli disiriki yomboma ungu-mane silipa andopale nirimumuni, yu Gallilli lierimu kolea Nasarete taono u molopa akorumuna kelepa orumu. Ombale [Juda yombomanga koro moloringi] wale Sambatemonga koleamanga pali ono maku toko Pulu Yemonga ungumu pilieringi ulkamanga yu alieli purumu mele Nasarete ungu pilieringi ulka akuna aku sipa purumu. [Maku toko moloringi kinia] yuni “Na bokumu kanopo niembo.” nimba ola gilierimu. 17[Pulu Yemonga bokuma nokorumu yemone] Pulu Yemone ungu-umbu tondorumuma pilipa yomboma nimba sirimu ye Aisayane koronga-u torumu bokumu lipa sirimu kinia, Yesusini lipa sukundu ungu molorumu se kanopa nimbale: 18“[Aisayane i-sipa nimbale:] “Ye-Awilimunga Minimu na-kinia molemomo yuni nando nimbale: “Yombo koropama semane peangamo toko siku, ka-ulkana pelemele yombomando ‘Wendo ongo we molangi.’ ningu, mongo kiri lieli yombomando ‘Mongo peanga liepili kanangi.’ ningu, mindili nongo molemele yomboma ‘Mindili naa nongo, molko kondangi.’ ningu, 19‘Kiniá kalia-ingina Ye-Awilimuni yomboma kanopa kondo kolomba kalia-ingimu wendo okomo.’ ningu siliku andou.” nimba Minimuni aku sipa ye se nimba taltopale nirimu.” nimba Aisayane nirimu.” nimba Yesusini aku sipa boku kambu topa nirimu. 20Ungu akumu kanopa nimba pora sipale bokumu kelepa pipi sipa bokuma nokorumu yemo sipa, [ “Ungu se niembo.” nimba] Yesusi yu mania molorumu. Yomboma pali yu mindi neme-neme ningu kanoko moloringi. 21Kanu-kinia yuni onondo nimbale: “Kiniá Pulu Yemonga bokuna ungumu kanopo nindu piliengi akuna Aisayane “Wendo ombá.” nimba, u nirimu mele kiniá wendo okomo. [Kiniá na sembó okoro ulu akumanga u nirimu.]” nirimu. 22Moloringi yombomane “Yu ye peangamo. Yu paa selemo.” ningu yu nirimu mele pilkuli “Paa nimba peanga sikimu.” ninguli mini-wale mundoringi. [Aku-sipa na-kolo] onone ninguli: “I yemo [yu nawe konopu lekemoye?] Yu Josepo malo mindi, [olionga we-ye se mindi lémo].” niringi. 23[Aku-na-kolo] Yesusini [yuyu molorumu mele nirimu kinia pilkuli yu konopu kiri panjeringi mele pilipale] onondo nimbale: “Ungu-iku tolemelemanga se nando toko ningí seko molemelenje konopu lekero. Onone nando i-siku ningí sekemelenje: “Nu sika doketa moleno liemu nu kuru tomba kinia nunga marasenemo nunu liku nani. Pe nu peanga lemba [kinia kanopole ‘Nu sika doketa moleno lémo.’ nimbu pilimulú.” ningu aku ungu-ikumu na toko singí sekemelenje?] Nando ninguli: “Nuni Kapeniame taono ulu-tondoloma serinu pilierimulu mele ya nunga pulu-kolea [Nasarete] akuna aku siku sani. [Kanopole nu “molio.” nikinu mele ‘Sika nikinu lémo.’ nimbu pilimulú.]” ningí sekemelenje? 24Nane onondo sika nimbu sikirumu: “Yombomane ulu-pulu se selemele mele i-sipa: Pulu Yemone ungu-umbu tondolemoma pilipa yomboma nimba silimú ye sene yunga pulu koleamonga yomboma ungu nimba silimú kinia pilkuli nilimilimuni, onone ‘Yu olionga we-yere. Yu imbi mololi ye se mólo.’ ningu yuni nilimú unguma naa pilku mokoli selemele. [Kolea lupa yombo marene ongo ungu ningu silimili kinia aku unguma mindi pilku limili. Yombomane aku siku selemele mele onone aku sikula selemele.]” nikiru. 25‘Nane paa sika nimbu sikiru mele ono piliangi.’ nimbu [semane talo tambo.] “Illainja Pulu Yemone ungu-umbu tondorumuma pilipa [yunga pulu lierimu] Isirele yomboma nimba sipa molopili ulu se wendo orumumu niembo. Pulu Yemone “Lo naa opili.” nirimu kinia kalia-ingi yopoko kelepa oli kise se-pakara lo naa omba paa gele lierimu kinia Isirele koleana sukundu ambo-waya awisili [gelene kolko] moloringi. 26Aku-sipa na-kolo Pulu Yemone “Isirele ambo-waya se liku tapondoko kere-langi sieni.” nimba Illainja akuna naa lipa mundorumu. [Isirele ultukundu lierimu] kolea-awili Saidono nondopa lierimu kolea-kanga Sarepate ambo-waya se [ ‘Kere-langi pora naa nipili.’ nimba Pulu Yemone kanu ultukundu ambomo] molorumuna Illainja lipa mundorumu kanumu. 27Illaisa kepe u Pulu Yemone ungu-umbu tondorumuma pilipa [yunga pulu lierimu Isirele yomboma] nimba sipa molopili Isirele koleana sukundu yombo awisili kuru laká norumu, aku-na-kolo ono pali selu kepe peanga naa lierimu, kuru laká nomba we perimu. [Kolea Isirele ultukundu lierimu] kolea Siria ye Neman mindi kuru laká norumu kinia Illaisane yu [lipa tapondopa] sepa peanga sirimu. [Pulu Yemone Illainja kinia Illaisatolo lipa mundorumu-kulu ultukundu yombo talo aku siku liku tapondoringili nikiru mele paa sika nikiru piliaa.]” nirimu. 28Aku sipa mele nirimu kinia pilku kiri pilkuli Pulu Yemonga ungumu pilieringi ulkana sukundu moloringi yomboma pali paa lakoko mumindili koloringi. 29Mumindili kolkole ola gilku yu kanu koleana ultu toko pulu siku munduku, kanu koleana nondopa kopó se lierimuna toko mania mundungí seringi. 30Aku-sipa na-kolo yu ono maku toko gilieringina sumbi sipa pumba senga lupa pumbá purumu, yu manda naa amboloringi. 31Kanu-kinia Yesusi yu kolea Gallilli disiriki lierimu taono se Kapeniame akuna maniando purumu. Akuna [koro moloringi] wale Sambatemo wendo orumu kinia Yesusi [Juda yomboma maku toko Pulu Yemonga ungumu pilieringi ulka kanuna sukundu pumba] ono ungu-mane sirimu. 32Mane sirimu kinia yu namba lierimu yemane pipili naa kolko tondolo munduku mane siringi mele yuni aku sipa mane sirimu-kulu pilkuli yombomane mini-wale mundoringi. 33Kanu-kinia ulka kanuna sukundu ye se molorumu kanumu kuru se yunga konopuna sukundu molopa yu ambolorumu [kanu kurumuni yu “Ungu ni.” nimba ulku torumu-na] yemone ungu tondolo mundupa nimba nimbale: 34Kolea Nasarete ye Yesusi, nu pea olio [kuruma]-kinia seluna kopu sepo manda naa molomolo. Nu olio-kinia nambi semu-na onuye? Nu olio toko kondoni onuye? Nane nunga imbi pilielio. Nu Pulu Yemonga Ye Kake Sélimu.” nirimu. 35[Aku sipa nirimu-kulu pilipale] Yesusini kanu kurumu iri topa yundu nimbale: “Nu ungu naa ningu yemonga konopuna ongo wendo pu!” nirimu kinia kurumuni yemo topa mania mundupale omba wendo purumu. Yemo yu unguri naa serimu, we manda molorumu. 36[Yesusini aku serimu kanokole] yomboma pungu-pungu ningu, mini-wale munduku, onone onono anju yando ninguli: “I ulumu nambolka uluri sekemonje? Ungu-mane konde se wendo ombámo. Ye namba lieli sene we-yombomando “Saa.” nilimú mele i yemone kurumando kepe aku sipa nilimú kinia kanu kuruma yunga ungumu pilku liku wendo pulimili.” niringi. 37Kanu-kinia yuni aku sipa serimu mele semanemo kanu koleamonga sukundu lierimu koleamanga pali anju anju purumu pilieringi. 38Kanu-kinia kanu maku toko Pulu Yemonga ungumu pilieringi ulkamo Yesusi mundupa kelepa pumbale nirimumuni, Yesusi Saimono [Pita]nga ulkana sukundu purumu. Akuna Saimononga kolepa-ambomo kuru topa kangi nomba kondopili lierimu-na Yesusindu “Liku tapondou.” ningu mawa seringi. 39Aku siku yu mawa seringi kinia ambomo lierimuna pumba gilipa nimbale: “Kangi manda nou.” nirimu kinia kangi nomba kelierimu. Ambomone sumbi sipa ola gilipa wendo ombale, oringi yema kere-langi sipa nokopa molorumu. 40Kanu walemonga ipupini, ena pumbá purumu kinia, kuru lupa-lupa torumu yomboma Yesusi molorumuna mengo oringi kinia kanu yomboma ono yu-mele-mele kini ambolopale ono pali sepa peanga sirimu. 41[Konopumanga kuru molorumu] yombo awisili [oringi.] Kanu kuruma[ndo “Ongo wendo paa.” nirimu kinia] ongo wendo pungu ru ningu ninguli: “Nu Pulu Yemonga Malo moleno.” niringi. Kurumane yu aku siku imbi sikuli yu [Pulu Yemone nimba taltopa lipa mundorumu ye nokoli] Karasimu!’ molorumu mele pilieringi-kulu yuni ono iri topa “Molio mele anju ningu naa siee.” nimba ononga kerema pipi sirimu. 42Orili-u Yesusi ola molopa penando pumba kolea ku lieli senga purumu kinia yombo awisili yu koroko yu molorumuna ongo yundu ninguli: “Olio-kinia pea kamu molamili. Senga naa pu.” ningu mawa seringi. 43Yuni onondo pundu topa nimbale: “[Pea molamili mangali] kolea wemanga pea pumbu, Pulu Yemo omba ye nokoli kingimu molomba semane peangamo topo silipu andombo. Akumunga na yando lipa mundorumu kanumu.” nirimu. 44Aku nimbale yu pumba kolea Gallilli [disiriki] sukundu andopa, kolea lupa lupamanga pumba Juda yomboma maku toko Pulu Yemonga ungumu pilieringi ulkamanga pumba kanu semane peangamo topa silipa andorumu.

will be added

X\