Romanos 9

1Melel te bila ya cal ta stojol Cristo, ma jlotuc. Te co'tan a, wentainbil yu'un te Ch'ul Espiritue, ya yalbon te ma jlotuc te bila ya cale. 2Bayal ayon ta mel-o'tan soc spisil ora toyol xc'uxul ya caiy ta co'tan. 3Co'tanuc te ya cac' jba ta ch'ayel ta o'tanil yu'un Cristo ta swenta xc'uxul co'tan te jich ya xcolic a te quermanotac te jun jts'umbal soque. 4Ja'ic te israeletic te ochic ta yal-snich'an te Diose. Ac'botic yilic te yutsilale, te la xchap trato soque, la yac'bey te mandalile. Ac'botic sna'ic te bit'il ay ta ich'el ta muc' te Diose, soc te bila yaloj te Diose. 5Ja'ic sts'umbalic te antiguo tatiletic cu'untic. Soc ja' sts'umbal te Cristoe, te bit'il la yich' sbaq'uetal ta balumilale, te ja' Dios stuquele, cajal yu'un spisil te bitic aye, soc te jelawen yutsil sbajt'el q'uinal stuquel. Jichuc. 6Ja'uc me to, ma yu'unuc ma c'ot ta pasel te bila yaloj te Diose. Te melel ma spisiluc te sts'umbal israeletic ayic ta swenta te Israele. 7Soc ma ja'uc sts'umbal Abraham c'oem spisilic te yal-snich'nabe. Te melel jich albot yu'un Dios te Abrahame: “Ja' nax ay ats'umbal ya xc'ot ta swenta te Isaaque”, te xi' sc'oplale. 8Jich ya jna'tic te ma'yuc mach'a yal-snich'an Dios ya xc'ot ta swenta nax te sts'umbale. Ja' nax mero yal-snich'an Dios stuquelic te mach'atic ayic ta swenta te bila la yalbey sc'oplal te Diose. 9Melel te bila yaloj Dios ta stojol te Abrahame, ja' in to: “Jich me ora ya xtalon te bit'il to. Jich me ya x'ayin yal te Sarae”, te xi' sc'oplale. 10Soc jich ay sc'oplal uuc te Rebecae. La yic' lo'alal ta swenta jtul nax tatil, ja' bi ja' te antiguo jtatic Isaaque. 11- 13Ja'uc me to, te c'alal ma to x'ayinic a soc ma'yuc bila spasojic ta bay leque soc ta bay amene, jich albot yu'un Dios te Rebecae: “Te ijts'inale ya me smosoin te sbanquile”, te xi' sc'oplale. Ja' pajal soc te bit'il jich ts'ibubil jilel ta Sjun te Diose: “Te Jacobe, c'ux la caiy ta co'tan. Yan te Esaú, la jp'aj ta co'tan stuquel”, te xie. Jich chican ta jamal te bit'il ay ta swenta stsael stuquel te mach'a ya yic' te Diose, chican te bila snopoj ta yo'tan stuquel. Ma ba ya yich' ta wenta te bila ya spasique. 14¿Bi ya caltic yu'un? ¿Ya bal xju' ya caltic te ma tojuc te bila ya spas te Diose? ¡Ma jichuc! 15Melel jich albot yu'un Dios te Moisese: “Chican co'tan jtuquel te mach'a jayeb ya jc'uxtaye soc chican co'tan te mach'a jayeb ya jna'bey yo'bolil sba”, te xi' sc'oplale. 16Jich yu'un ma ja'uc chican te mach'a ya yal sbae, soc ma ja'uc chican teme at'ejeme. Ja' chican te bit'il ay yutsil yo'tan stuquel te Diose. 17Te melel jich ts'ibubil jilel sc'oplal ta Sjun Dios te Faraone: “La cac'at ta muc' ajwalil swenta yu'un jich ya cac' ta ilel cu'el ta awenta, soc swenta yu'un ya me xpujc' jc'oplal ta spamal balumilal”, te xie. 18Jich yu'un ja' chican yo'tan stuquel te Dios te mach'a ya xc'uxtaye, soc ja' chican yo'tan te mach'a ya yac' tulanubuc yo'tane. 19Ja'uc me to, ay niwan jich ya awalbonic: “Teme jiche, ¿bistuc te ya yac'botic jcuchtic jmultic te Diose? Melel ma'yuc mach'a ya xju' yu'un scontroinel te bila sc'anjel yo'tan te Diose”, teme xaexe. 20Ja'at te ants-winicate, ¿mach'a ya acuy aba a te ya asujt'esbey sc'op te Diose? ¿Ya bal x'albot te jpac'jom yu'un te vaso te pasbil ta ajch'ale: “¿Bistuc jich la apason?”, xi' bal? 21Melel te mach'a jpac'jome, ja' chican yo'tan te bila ya spas a te yajch'ale. Ya xju' ya spas te bay t'ujbil ya xtuun yu'une, soc ya xju' ya spas te bay ma t'ujbiluc ya xtuun yu'une. 22Ja' nanix jich uuc te Diose. La sc'an yo'tan te ya yac' ta ilel te ja' ya yac' castigo stuquel soc te ya xpujc' sc'oplal te yu'ele. Jich bayal ja'wil la sts'icbey sbolilic te mach'atic chapal sc'oplalic ta yich'el castigo te ya xbajt'ic ta ch'ayele. 23Soc la sc'an yo'tan te ya xpujc' sc'oplal te yutsilal te ay xojobile, soc jich la yac' ta ilel te yutsil xc'uxul yo'tane, te namey chajbanbil yu'un te ya quich'beytic te yutsilale. 24Jich yu'un Dios la yic'otiquix. Ma ja'uc nax te judioetique, jich uuc te jyanlumetique. 25Jich bit'il ts'ibubil ta sjun te Osease: “Ya me cu'unin te lum te ma cu'unuc ta neelal toe. Ja' me ya jc'uxtayix te lum te ma c'uxtaybiluque. 26Ta bay jich albotic yu'une: ‘Te ja'exe, ma lumuquex cu'un’, te xie, tey me ya x'albotic sc'oplalic a te yal-snich'an cuxul Dios sbiilic ya xc'ot”, te xie. 27Jich uuc te Isaiase, la yalbey sc'oplal te israeletique: “Manchuc teme jich yipal sts'umbal Israel te bit'il sji'al te mare, ja'uc me to, scomenal xanix te ya xcolique. 28Melel te Cajwaltique, jc'axel me ya sc'otes sc'op ta ora nax ta balumilal” te xie. 29Jich bit'il la yal ta neelal to te Isaiase: “Te Cajwaltic te Spisil ya xju' yu'une, te manchuc ayuc jts'umbaltic jilel yu'une, jich pajal c'ootic soc te lum Sodoma soc te lum Gomorra te jichuque”, te xie. 30¿Bi ya caltic yu'un? Te jyanlumetic te ma'yuc ta swentaic te colele, ja'uc me to, libre c'otic yu'un smulic, ja' nax ta swenta xch'uunjel yo'tanic. 31Yan te israeletique, ja' yantayejic te toj ya x'ilot yu'un Dios yu'un xch'uunel te mandalile, ja'uc me to, ma ba ju' ta ch'uunel yu'unic. 32¿Bi yu'un? Melel ma ja'uc yantayejic te xch'uunjel yo'tanique, melel scuyojic te lec ya xc'otic ta swenta spasel te bila ya yal te mandalile. Ja' swentail te la sc'ojch'in sbaic a te ton swenta c'ojch'injibale. 33Jich bit'il ts'ibubil ta Sjun te Diose: “Jo'on ya cac' ta bay wits Sión te ton swenta c'ojch'injibale, soc te ton te ya xyaleswane. Te mach'a jayeb ya xch'uunique, ma'yuc bi ora ya staic q'uexlal yu'un”, te xie.


Copyright
Learn More

will be added

X\