Romanos 8

1Jich yu'un ta ora to, te mach'atic ayic ta swenta te Cristo Jesuse, ma'yuquix ta swentaic te castigo yu'un te smulique. [Ja' te mach'atic ma ba st'unojix pasel te bila swenta nax te sbaq'uetale, te ja' st'unojix ta pasel te bila swenta te Espiritue.] 2Melel te mandalil yu'un te Espiritue, ja' ya yac' cuxlejal ta swenta te Cristo Jesuse, jich colon loq'uel ta libre yu'un te mulile soc te lajele. 3Melel ma ju' yu'un te la scoltayotic te mandalile, ta scaj te ma'yuc yip te jbaq'uetaltique. Jich yu'un Dios la sticun tel te Snich'ane, jich bit'il milbil majt'anil yu'un mulil. Pajal sbaq'uetal c'ot soc te jmulawil ch'ich'-baq'uete. Jich ta swenta sbaq'uetal ju' yu'un te la yac' ta lajel te mulil te ay ta jbaq'uetaltique. 4Jich la spas te Diose, swenta yu'un jich ya xju' cu'untic spasel te bila ya sc'an te mandalile. Ma me ja'uc ya jt'uuntic spasel te bila ya sc'an te jbaq'uetaltique. Ja'uc me ya jt'uuntic spasel te bila swenta te Espiritue. 5Melel te mach'a wentainbil yu'un te sbaq'uetale, ja' nax ya xbajt' ta yo'tan sna'el te bila ya sc'an te sbaq'uetale. Yan te mach'a wentainbil yu'un te Espiritue, ja' ya xbajt' ta yo'tan sna'el te bila ya sc'an te Espiritue. 6Melel teme ja' nax ya xbajt' ta o'tanil te bila ya sc'an te baq'uete, ja' ya x'ac'awan ta lajel yu'un. Yan teme ya xbajt' ta o'tanil te bila ya sc'an te Espiritue, ja' ya yac' cuxinel soc lamal q'uinal. 7Te mach'atic ja' nax ya xbajt' ta yo'tanic sna'el te bila ya sc'an te sbaq'uetalique, ja' scontroinejic a te Diose. Melel ma xch'uunbeyic smandal te Diose, soc yu'un nanix ma xju' yu'unic a. 8Teme ja' nax cuxulic ta swenta te sbaq'uetalique, jich ma xju' yu'unic spasel te bila lec yo'tan yu'un te Diose. 9Ja'uc me to, te ja'exe, ma me ja'uc cuxulex xan ta swenta te abaq'uetalique. Ja'uc me cuxulex ta swenta te Espiritue, nainemuc ta awo'tanic te Espíritu yu'un te Diose. Yan teme ma nainemuc ta awo'tanic te Espíritu yu'un te Cristoe, ma yu'unuquex Cristo abi. 10Yan teme ay ta awo'tanic te Cristoe, manchuc teme lajem abaq'uetalic yu'un te mulile, ja'uc me to, cuxulex yu'un te espíritu ta swenta te bit'il toj ya yilex te Diose. 11Soc teme nainem ta awo'tanic te Espíritu te la xcha'cuxes tel ta bay animaetic te Cristo Jesuse, ja' nanix jich te abaq'uetalic te ya xlaje, ya xcuxin ta swenta te Espíritu te nainem ta awo'tanique. 12Jich yu'un quermanotac, ay bila quechel ta jwentatic spasel, ma me ja'uc ya jpastic te bila ya sc'an te jbaq'uetaltique. 13Melel teme ja' ya apasic te bila ya sc'an te abaq'uetalique, ya me xlajex yu'un. Yan teme ta swenta Espíritu te ya awaq'uic ta lajel te bila yat'el te abaq'uetalique, jich me xcuxinex yu'un. 14Spisil mach'a ja' j'ic'wanej yu'unic te Espíritu yu'un te Diose, ja' alnich'anetic yu'un Dios abi. 15Melel te Espíritu te ac'botex awiq'uique, ma ja'uc ya yaq'uex xan ta mosoil yu'un te xiwele. Melel ja' ya yaq'uex ta alnich'an yu'un te Diose. Ja' swentail te jich ya caltique: “Jtat”, te xootic ta stojole. 16Ja' nix te Espíritu te ya xc'opoj ta co'tantique, te ya yac' jna'tic te jo'otic yal-snich'anotic te Diose. 17Teme yal-snich'anotic te Diose, ja' cu'untic uuc te bila ay yu'un te Diose. Pajal me ya quich'tic soc Cristo teme pajal ya xc'ax jwocoltic jich te bit'il c'ax swocol stuquele. Jich me pajal ya quich'tic cutsilaltic soc. 18Jna'ojtic stojol te ma'yuc sc'oplal teme ayotic ta woclajel ta ora to. Melel ja' bayal sc'oplal te utsilal te yac ta talel te ya xchicnaj ta patile. 19Soc spisil te bitic pasbil yu'un te Diose, yo'tanuc ya xchicnantesot ta ora te mach'atic yal-snich'an te Diose. 20Melel te bitic pasbile, ch'ay ta jc'axel te yutsilale. Ma yolojuc te bolobe. Melel ja' nix Dios te la yac' c'otuc ta pasele. Ja'uc me to, ay ta yo'tan te ya to xlecube, 21melel spisil te bitic pasbile, ya me sta yorail te ya xcol ta mosoil yu'un te bit'il bolobene soc te bit'il jineme, swenta yu'un jelawen yutsilal te libre ya xc'ot spisil te yal-snich'an te Diose. 22Jna'ojtic stojol te ay ta ajc'an spisil te bitic pasbile, ja' to ta ora to. Yac ta nacbal yu'un xc'uxul, jich bit'il jtul ants te ya x'ayin te yale. 23Soc ma stuqueluc nax te yac ta woclajele. Jichotic uuc yacotic ta woclajel manchuc teme quic'ojtiquix te Espiritue, te ja' sbabial seña te jayeb bi ya yac'botic ta spisil te Diose. Jich bayal ayotic ta ajc'an jpisiltic te bit'il yacotic ta smaliyel te bi ora yal-snich'an Dios ya xc'ootique. Tey me ya xcolotic soc a te jbaq'uetaltique. 24Colemotiquix ta swenta te bila yacotic ta smaliyele. Yan teme la quiltiquix ta sitique, jich ma'yuquix bi ya jmaliytic abi. Melel teme chicanix ya quiltique, ¿bistuc xan ya jmaliytic? 25Yan teme ma to chicanuc te bila yacotic ta smaliyele, ya sc'an te jun co'tantic ya jts'ictic smaliyel, ja' to teme chicnaje. 26Ja' nanix jich uuc te Espiritue, ya scoltayotic te bit'il ma'yuc quiptique. Yu'un ma jna'tic sc'anel te bila ya jc'antique. Ja'uc me to, te Ch'ul Espiritue, ja' ya xc'opoj cu'untic. Ts'ujet nax yo'tan ta oq'uel ta c'op. Ma xju' ta alel ta jc'optic te bila ya yale. 27Te Diose ya sna' te bila ay ta co'tantique soc ya sna' uuc te bila ya yal te Espiritue. Melel te Espiritue, ja' ya sc'anbey te sc'anjel yo'tan te Dios ta stojol te mach'atic ch'ul lum yu'un te Diose. 28Jna'ojtic stojol te mach'atic c'ux ta yo'tanic te Diose, ya x'ac'botic yu'un spisil bila leque, ja'ic me te mach'atic ic'bilic yu'un Dios te bit'il jich la sc'an yo'tan stuquele. 29Melel te mach'atic namey to na'bil sbaic yu'un te Diose, xjajch'ibal to tel chapal sc'oplalic yu'un Dios te bit'il pajal yilelic ya xc'ot soc te Snich'ane, swenta yu'un ja' sbabial ya xc'ot ta yolil te tsobol yijts'inabe. 30Te mach'atic xjajch'ibal to tel jich chapal sc'oplalic yu'un Diose, ja'ic te la yich'ic iq'uel yu'une. In te bit'il la yich'ic iq'uel yu'une, Dios la yac' ta libre yu'un smulic. In te mach'atic la yac' ta libre yu'un smulic, la yac'bey yich'ic te yutsilale. 31¿Bi ya caltic yu'un in to? Teme ja' ay ta jtojoltic te Diose, ¿ay bal mach'a ya xju' te ya scontroinotique?. 32Melel ma la sna'bey yo'bolil sba te Snich'ane, spasemal yo'tan la yac' ta lajel ta jwentatic. ¿Ma bal spisiluc ya yac'botic ta majt'anil spisil te bit'il aye? 33¿Ay bal mach'a ya xju' ya xlebot smulic te mach'atic tsabilic yu'un te Diose? Ma'yuc. Melel te Diose, ja' ac'awanix ta libre. 34¿Ay bal mach'a ya xju' yu'un te ya x'ac'awan ta lajele? Ma'yuquix. Melel ja' la stojix te Cristo te c'alal laje. Soc ma jipuc a te laje, cha'cux tel, soc ayix ta swa'el sc'ab Dios te banti yac ta c'op cu'untique. 35¿Ay bal mach'a ya xju' yu'un ya sloq'uesotic ta bay xc'uxul yo'tan te Cristoe? ¿Ya bal xju' yu'un te uts'inele, te woclajele, te nutsele, te wi'nale, te t'analotique, o teme milel ta puñale? 36Jich te bit'il ts'ibubil jilel ta Sjun te Diose: “Ja'at ta acaj te quechelotic ta lajel spisil ora; jichotic ta yo'tanic te bit'il chijetic te ya yich'ic milele”, te xie. 37Manchuc teme spisil ya jtatic ta q'uinal in to, jc'axel me ya caiytic tsalaw ta swenta te Mach'a bayal c'uxotic ta yo'tane. 38Jich yu'un, jich ay ta co'tan: Ni ja'uc te lajele, ni ja'uc te cuxinele, ni ja'uc te ch'ul abatetique, ni ja'uc te mach'atic ay tulan yat'elique, ni ja'uc te mach'atic ay yu'elique, ni ja'uc ta ora to, ni ja'uc ta patil, 39ni ja'uc te bila ay ta cajale, ni ja'uc te bila ay ta ye'tal te q'uinale, ni ayuc xan yan te bitic pasbil yu'un Dios te ya xju' ya sloq'uesotic ta bay xc'uxul yo'tan te Diose, ta swenta te Cajwaltic Cristo Jesuse.


Copyright
Learn More

will be added

X\