Romanos 7

1Quermanotac, ana'ojic stojol te bit'il ay sc'oplal te mandalile, soc ana'ojic te mandalil te ja' nax ay yip ta stojol te ants-winic te jayeb c'aal cuxul ta q'uinale. 2Jich bit'il te ants te nujbinemixe, ay ta swenta te mandalil te jayeb c'aal cuxul ta q'uinal soc te smamlale. Ja'uc me to, teme ya xlaj te smamlale, jich colix ta libre yu'un a te mandalile. 3Yan teme cuxul to smamlal a te ya yic' sba soc te yan winique, ayix ta mulwej abi. Ja'uc me to, teme laj te smamlale, jich jilix ta libre yu'un a te mandalile. Jich ma'yuc ta mulwej teme ya xnujbin soc te yan winique. 4Quermanotac, ja' nanix jich te ja'exe, te jun c'oemex soc sbaq'uetal te Cristoe, lajemexix yu'un te mandalile. Jich me ya yu'uninex te yane, ja' bi, ja' te Cristoe, te cha'cux tel ta bay te animaetique, swenta yu'un jich me ya xtuunex yu'un te Diose. 5Melel te c'alal ayotic ta swenta nax te jbaq'uetaltique, te mandalil la stijbotic jajch'el te muliletic te ya smulan spasel te jbaq'uetaltique. Jich yu'un te sit ya yaq'ue, ja' te lajele. 6Yan ta ora to, libre ayotiquix ta swenta te mandalil, te bit'il lajemotic ta swentae. Jich yu'un ya me cac' jbatic ta abatinel yu'un te yach'il mandalil yu'un te Espiritue; ma ja'uquix ta swenta te poco mandalil te ts'ibubil jilele. 7¿Bila ya caltic yu'un jiche? ¿Mulil bal te mandalile? ¡Ma jichuc! Ja'uc me to, te manchuc ayuc te mandalile, ma la jna' te bila a te mulil te jichuque. Ma la jna' teme mulil te bic'tal-o'tanil te manchuc la yal ta jamal te mandalil te “ma me xbic'taj awo'tan”, te xie. 8Ja'uc me to, te mulile la yich' xan yip yu'un te mandalile. Jich la stijbon jajch'el bayal ta jchajp bic'tal-o'tanil. Melel te manchuc ayuc te mandalile, lajem te mulil te jichuque. 9Ay c'aal te ma'yuc sc'oplal ta co'tan te mandalile. Ja'uc me to, te c'alal tal te mandalile, cuxin xan la caiy te mulile. Jich lajon yu'un. 10Jich te mandalil te sc'oplal ya yac' cuxinucone, ja' la yac'on ta lajel. 11Melel te mulile la yich' xan yip yu'un te mandalile, la slo'layon. Jich la yac'on ta lajel. 12Jich yu'un te mandalile, ch'ultesbil ta melel stuquel, toj ay soc buen lec stuquel. 13¿Yu'un bal ja' la yac'on ta lajel te bila leque? Ma jichuc. Te bila la yac'on ta lajele, ja' stuquel te mulile. Tey chican ta ilel a te mulil te ma lecuque, melel la yac'on ta lajel ta swenta te bila leque. Soc ta swenta te mandalile, chicnaj te mero amen ta c'axem to xan te mulile. 14Melel jna'ojtic stojol te ja' yu'un Dios te mandalile. Yan te jo'one, ch'ich'-baq'ueton nax. Mosoinbilon yu'un te mulile. 15Melel te bila ya jpase, ma c'oemuc ta co'tan, melel ma ja'uc ya jpas te bila lec ya sc'an te co'tane. Ja' ya xba jpas te bila ya yilay te co'tane. 16Te bila ma jc'an ya jpase, ja' ya jpas, jich ya jna' stojol te bit'il lec te mandalile. 17Jich ma jo'ocon jtuquel te ya jpas te bila amene, ja' ya spas te mulil te ay ta co'tane. 18Jna'oj stojol te ma'yuc yutsil te jbaq'uetale, ma xnain tey a te bila leque. Melel jich co'tan ya jpas te bila leque, ja'uc me to, ma xju' cu'un spasel. 19Melel ma ja'uc ya jpas te bila lec te ya sc'an co'tan te ya jpase. Ja' ya xba jpas te bila amen te ma sc'an co'tan te ya jpase. 20Jich yu'un te bit'il ya jpas te bila ma sc'an co'tan ya jpase, jich ma jo'ocon te ya jpase. Ja' ya spas te mulil te nainem ta co'tane. 21Jich yu'un, te c'alal ja' ya jc'an ya jpas te bila leque, ja' nax ay ta co'tan yan mandalil, ja' te mulil te ay ta co'tane. 22Ta mero yutil te co'tane, bin nax co'tan yu'un te mandalil yu'un te Diose. 23Ja'uc me to, ay yan mandalil te ay ta jbaq'uetale, te scontroinej sba soc te mandalil te ay ta yutil te co'tane, ja' bi ja' te smosoinejbon jbaq'uetal te mandalil yu'un te mulile. 24¡Obol jba yu'un ya caiy! ¿Mach'a ya xju' ya scoltayon a te jbaq'uetal te ya yac'on ta lajele? 25Wocol la yalbon te Diose te ja' la scoltayon ta swenta te Cajwaltic Jesucristoe. Jich yu'un te jo'one, jnopoj ta co'tan te ya jch'uunbey smandal te Diose. Yan te jbaq'uetale, ja' ya xch'uunbey smandal te mulile.


Copyrighted Material
Learn More

will be added

X\