Romanos 6

1¿Bila ya caltic yu'un jiche? ¿Ja' bal lec teme ya jleulaytic xan jmultic swenta yu'un jich ya x'esmaj xan ta jtojoltic a te yutsil yo'tan te Diose? 2¡Ma jichuc! Melel lajemotiquix ta stojol te mulile, ¿bit'il c'an cac' jbatic xan ta swenta? 3¿Yu'un bal ma ba ana'ojic te bit'il jun nax c'oemotic ta stojol Cristo Jesús ta swenta te ich'ja'e? Melel jich c'oem te bit'il la jointic ta lajele. 4Melel te bit'il la quich'tic ja'e, tey la join jbatic ta muquel c'oem soc a. Jich nix te bit'il la yich' cha'cuxesel te Cristo ta bay te animaetic ta swenta yutsil yu'el te Jtatic Diose, jich me ya quich'tic yach'il jcuxlejaltic uuc. 5Melel teme la jointic ta lajel c'oem te Cristoe, ja' nanix me jich jun ya xcha'cuxotic tel soc. 6Jna'ojtic stojol te la yich' jijp'anel ta cruz-te' soc Cristo te jpocol jcuxlejaltique, swenta yu'un ya slajinbey yip te jmulawil jbaq'uetaltique, jich ma ba ya yabatinotic xan te mulile. 7Melel te mach'a lajeme, ya x'ac'ot ta libre yu'un te smule. 8Teme ya xlajotic soc te Cristoe, jich xch'uunej co'tantic te ya xcuxinotic soque. 9Melel te Cristoe, cha'cuxemix tel ta bay te animaetique, jich ma ba ya xlajix, soc ma ba ya xwentainot xan yu'un te lajele. 10Yu'un te bit'il laj te Cristoe, jun nax buelta laj ta swenta te mulile. Jich yu'un te bit'il cuxulixe, jich pajal cuxulix soc te Diose. 11Jich uuc te ja'exe, lajemuquex me ta swenta te mulile. Ja'uc me to, pajaluc me cuxulex soc te Diose, ta swenta te jun c'oemex soc te Cristo Jesuse. 12Jich yu'un ma me xawac'bey permiso te mulil te ya yu'uninbeyex xan abaq'uetalic te stalel ya xlaje. Ma me xawac' te ya sujat xan ta spasel te bila ya sc'an te abaq'uetalique. 13Ma me xawac' ta tuuntesel yu'un mulil te abaq'uetal ta spasel te bila amene. Jich yu'un ac'a abaic ta sc'ab Dios jich bit'il te mach'a cha'cuxemix tel ta bay te animaetique. Jich yu'un ac'aic ta tuuntesel yu'un Dios te abaq'uetalic ta spasel te bila toje. 14Melel ma xju'ix te ya yu'uninex xan te mulile, yu'un ma'yuquex ta swenta te mandalile. Ja' ayex ta swenta yutsil yo'tan te Diose. 15¿Bit'il ay a jiche? ¿Ya bal jle xan jmultic te bit'il ma'yucotiquix ta swenta te mandalile te bit'il ja' ayotiquix ta swenta yutsil yo'tan te Diose? Ma jichuc ya sc'an. 16¿Yu'un bal ma ba ana'ojic stojol teme spasemal awo'tan ya awac' abaic ta mosoile, puersa me ya ach'uunbeyic smandal te awajwale? Jich yu'un chican teme ja' ya awajwalinic te mulil te ya yaq'uex ta lajele, o teme ja' ya awajwalinic te Diose, te ja' ya yac'beyex apasic te bila toj ta pasele. 17Wocol la yalbotic te Diose, manchuc teme ayex ta mosoil yu'un mulil ta neelale, ja'uc me to, ach'uunejiquix soc awo'tanic te bit'il ay te p'ijubtesel te ac'ot ta awentaic snopele. 18Soc libre ayexix yu'un te mulile, ja' abatexix yu'un te bila toj ta pasele. 19La calix ta seña te bi yilel ayic ta balumilal te ants-winiquetique, ta scaj te wocol ya ana'ic stojole. Melel ta neelal to la awaq'uic ta abatinel abaq'uetalic ta spasel te chijubele soc spisil yantic muliletic. Ta ora to, te jayeb c'aal cuxulex ta q'uinal, ac'a me abaic ta sc'ab te Diose. Jich me ya awac' abaic ta abatinel soc abaq'uetalic ta spasel te bila toj ta pasele. 20Melel te c'alal ayex ta mosoil yu'un a te mulile, ma ju' awu'unic te la awac' abaic ta spasel te bila toj ta pasele. 21Ja'uc me to, ¿bila loc' awu'unic a? Melel ja' nax la yaq'uex ta q'uexlal, melel ta slajibal te bitic ya apasique, ja' nax ya yaq'uex ta lajel. 22Yan ta ora to, colemex ta libre yu'un te mulile. Ja' ayexix ta abatinel yu'un te Diose. Ja' me sit ya ataic a te bit'il yanyanex ta lecubele, soc ta slajibal, ja' te cuxlejal sbajt'el q'uinale. 23Melel te stojol te mulile, ja' te lajele. Yan te majt'anil yu'un te Diose ja' te cuxlejal sbajt'el q'uinal ta swenta te jun c'oemotic soc Cristo Jesús te Cajwaltique.


Copyright
Learn More

will be added

X\