Romanos 5

1Ta swenta te xch'uunjel co'tantique, libre c'oemotiquix yu'un te jmultique. Jich me junajemix co'tantic soc te Diose, ta swenta nax te Cajwaltic Jesucristoe. 2Ja' ta swenta Cristo te quich'ojtic c'uxtayel yu'un te Diose, ta swenta te xch'uunjel co'tantique. Jich ay yip co'tantic yu'une, soc jich toyol co'tantic ta smaliyel te yutsilal te Diose. 3Soc ma jipuc nax a. Ja' nix jich toyoluc me co'tantic yu'un uuc te uts'inele, melel jna'ojtic stojol teme ay te uts'inele, tey ya xchicnaj a teme ya sts'ijc' cu'untique. 4Teme la yich'ix yip te co'tantique, jich me ya sts'ijc' cu'untic te pruebae. Teme sts'ijc' cu'untic te pruebae, jich me jun co'tantic ya jmaliytic te utsilale. 5Soc smuc'ul co'tantic ya me jmaliytic te cutsilaltic, melel te xc'uxul yo'tan te Diose, malbilix ta co'tantic ta swenta te Ch'ul EspĂ­ritu te ac'bilotiquix yu'une. 6Te c'alal ma'yuc quiptic a, te c'alal la sta yorail yu'un te Diose, la yac' sba ta lajel te Cristo ta swenta te jmulawiletique. 7Wocol ya xwejt' te mach'a ya yac' sba ta lajel yu'un te mach'a toj ta winiquile. Manchuc teme ay nix mach'a ya xwejt' jtuluc te ya yac' sba ta lajel yu'un te mach'a buen lec te yat'ele. 8Ja'uc me to, te Diose la yaq'uix ta ilel te bayal c'uxotic ta yo'tan te bit'il la yac' sba ta lajel cu'untic te Cristoe, manchuc teme mero jmulawilotique. 9Jich yu'un, te bit'il libre c'oemotic yu'un te jmultic te bit'il la smal xch'ich'el te Cristoe, c'axem to xan ya xcolotic ta yilimba te Dios ta swenta te Cristoe. 10Melel te bit'il contro quiloj jbatic soc te Diose, jich la yac' junajuc co'tan jbatic soc ta swenta bit'il laj te Snich'ane. In te bit'il junajemix co'tan jbatic soque, jich me c'axem to xan ya xcolotic ta swenta te bit'il cuxulix stuquele. 11Soc ma jipuc nax a. Ja' toyol co'tantic ta stojol Dios ta swenta te Cajwaltic Jesucristoe, te melel ja' ta swenta te junajix co'tan jbatic soc te Diose. 12Ta swenta nax jtul winic te och mulil ta balumilale, soc ta swenta mulil te och lajele. Jich te lajele, c'ax ta stojol spisil te ants-winiquetic, melel spisil la sle smulic. 13Ayix mulil ta balumilal a te c'alal ma to ayuc te mandalile, ja'uc me to, ma ba la yich' ajtayel te mulile, ta scaj te ma to ayuc a te mandalile. 14Jich yu'un, te lajele la yu'unin spisil te ants-winiquetic c'alal yorail te Adane ja' to c'alal yorail te Moisese, manchuc teme ma jichuc smulic te bit'il la xc'axintaybey smandal Dios te Adane. In te Adane ja' sloc'ombail te mach'a patil xtaluque. 15Ja'uc me to, te bit'il la xc'axintay mandal te Adane, ma pajaluc soc te jmajt'antic ya yac' te Diose. Yu'un ta swenta jtul winic te la xc'axintay mandal te bayal lajic yu'une. Ja'uc me to, ta swenta te yutsil yo'tan Dios cu'untic, tsobolotic ay jmajt'antic ta swenta nax yutsil yo'tan te jtul winique, ja' te Jesucristoe. 16Te smul te jtul winique, ma pajaluc soc te majt'anil ya yac'botic te Diose. Melel chicnaj castigo ta swenta nax te jun buelta la xc'axintaybey smandal Dios te jtul winique. Yan te majt'anil yu'un te Diose, ja' te ya yac' ta libre yu'un smulic te ants-winiquetique. 17Teme ta swenta nax jtul winic te la xc'axintay mandal la yu'unin spisil ants-winiquetic te lajele, ja' nix jich c'axem to xan ya me yich'ic xcuxlejalic spisil te mach'atic ayic ta c'uxtayel yu'un Dios ta swenta jtul Winic, ja' te Jesucristoe. Soc majt'anil ya x'ac'otic ta libre yu'un te smulique. 18Jich bit'il ta swenta jtul winic te la xc'axintaybey smandal te Diose, jich tal castigo ta stojol spisil ants-winiquetic, ja' nanix jich ta swenta te bila toj la spas te jtul Winic, jich ac'otic ta libre yu'un smulic soc ac'botic xcuxlejalic spisil ants-winiquetic. 19Ja' bi ta swenta bit'il la xc'axintay mandal te jtul winique jich jmulawiletic c'ot spisil te ants-winiquetique, ja' nanix jich ta swenta bit'il la xch'uun mandal te jtul xan Winique, Dios la yac' ta libre yu'un smulic spisil te ants-winiquetique. 20Melel te mandalile, la yac' toyuc xan yip te mulile. Jich toy xan te mulile. Ja'uc me to, c'axem to xan la yac' ta ilel te yutsil yo'tan te Diose. 21Jich bit'il ay yu'el ta yaq'uel lajel te mulile, ja' nanix jich te yutsil yo'tan te Diose ay yu'el ta yaq'uel ta libre yu'un mulil soc ta yaq'uel cuxinel sbajt'el q'uinal ta swenta te Cajwaltic Jesucristoe.


Copyright
Learn More

will be added

X\