Romanos 3

1Jich yu'un ¿bila ya sta a te mach'a judioe? Soc ¿bila ya xloc' a te circuncisione? 2Ay na'ax, soc ay bayal ta jten sc'oplal. Te sbabiale, ja' te bit'il ja' ac'bot ta sc'abic te sc'op Diose. 3Ja'uc me to, ay mach'atic ma junuc yo'tanic ta stojol te Diose. ¿Te bit'il ma junuc yo'tanic, tey bal yanaj yo'tan ta stojolic a te Diose? 4Ma jichuc. Melel ma sujt'es sc'op stuquel te Diose, manchuc teme jpas-lot spisil te ants-winiquetique. Jich te bit'il ts'ibubil jilel ta Sjun te Diose: “Ta swenta te bila ya awale, toj ya xc'oat yu'un. Jich me ya awaiy tsalaw te c'alal ya awich' chajbanele”, te xi' sc'oplale. 5Teme ta swenta te bila ma lecuc la jpastique, tey chican xan ta lec a te bit'il toj ya xchajbanwan te Diose, ¿bila ya caltic yu'un? ¿Yu'un bal ma lecuc te bila ya spas te Dios te ya yac'botic castigo yu'un te jmultique? (Jich ya xc'opojon te bit'il ya xc'opojic te ants-winiquetique.) 6Ma jichuc. Teme ma tojuc te bila ya spas te Diose, ¿bit'il c'an ju'uc yu'un xchajbanel smulic te mach'atic ayic ta balumilale? 7Ay mach'a ya yal: “Teme ta swenta bit'il jpas-loton jtuquel te tey ya xchicnaj xan yutsilal yo'tan a te Diose, ¿bi yu'un te ayon ta chajbanel yu'un te jmulawilone?”, te xie. 8Teme jiche, ¿bi yu'un ma jichuc ya caltic: “Jpastic te bila amene, swenta yu'un tey me ya xchicnaj a te bila leque”, bi yu'un ma xo'ocotic? Ta melel ay cha'oxtulic ya yalic te jich ya cac' ta nopele. Ja'uc me to, puersa me ya x'ac'ot bael ta castigo yu'un te bila ya yalique. 9¿Bit'il c'oem jiche? ¿Ja' bal c'ax lecotic, jo'otic te judiootic, te bit'il te yantique? Ma jichuc. Melel la caltiquix ta jamal te pajal ay smulic te judioetique soc te jyanlumetique. Pajal ts'ajalotic ta mulil ta jpisiltic. 10Melel jich ts'ibubil jilel ta Sjun te Diose: “Ma'yuc mach'a toj ta q'uinal, ni jtuluc. 11Jtul ma'yuc mach'a c'oem ta yo'tan. Jtul ma'yuc mach'a ya sle te Diose. 12Spisil ants-winiquetic jowejemic ta be, spisil lajix yutsilic. Ma'yuc mach'a ya spas te bila leque, ma'yuc ni jtuluc. 13Lomen muquenal ch'en te yeique; te yaquique, ya xlo'laywanic a. Svenenoil jti'awal chan te ay ta yeique. 14Nojel ta yeic bol-c'opetic; toyol xc'uxul te bi ya yalique. 15Xtananet nax yacanic ta milaw ta smalel ch'ich'. 16Te banti ya xc'axic ta beele, ya xlajinwanic, soc ya yaq'uic jilel woclajel. 17Ma'yuc bay lamal q'uinal yu'unic ta bay ya xbeenique. 18Xujt' ma'yuc ta xi'el yu'unic te Diose”, te xie. 19Jna'ojtic stojol te bit'il spisil te bila ya yal te mandalile, ja' sc'oplalic te mach'atic ayic ta swenta te mandalile, swenta yu'un jich macal yeic ya xc'ot spisilic a. Spisil ants-winiquetic quechelic ta yich'el castigo yu'un te Diose. 20Yu'un jtul ma'yuc mach'a ya x'ac'ot ta libre yu'un smul yu'un te ya yat'elin spasel te bi ya yal te mandalile. Melel te mandalile, ja' nax ya yac' ta na'el stojol te ay te mulile. 21Ja'uc me to, ac'a jiluc te mandalile. Ta ora to, Dios la yalix te bit'il ay te chajbanel yu'une, melel jamal ts'ibubil jilel sc'oplal ta bay nix te mandalil soc ta bay sjunic te j'alwanejetique. 22Ja' nax toj ya x'ilot yu'un Dios te mach'atic ay xch'uunjel yo'tanic ta stojol te Jesucristoe. Pajal sc'oplal spisil te ants-winiquetique, 23te melel sleoj smulic ta spisilic. Loq'uemic tey a ta bay yutsilal te Diose. 24Ja'uc me to, ta swenta yutsil yo'tan te Diose, ta majt'anil ya yac'otic ta libre yu'un jmultic, ta swenta bit'il la stojbotic jmultic te Cristo Jesuse. 25Dios la yac' te ja' la jelolintic ta stojel jmultic te Cristo Jesuse, teme ya jch'uuntic te la smal xch'ich'el cu'untique. Jich chicnaj te stojil chajbanel yu'un te Diose, manchuc me ma la sna'bey smulic te ants-winiquetique soc la sts'icbey te smulic ta neelal toe. 26Ta ora to, Dios la yac' ta ilel te stojil chajbanel yu'un jmultic swenta yu'un tey me ya xchicnaj ta jamal te bit'il toj yo'tan stuquele. Soc te mach'a ya yac' xch'uunjel yo'tan ta swenta te Jesuse, ja' toj ya x'ilot yu'un te Diose. 27¿Banti ay te bila ya jtoy jbatic yu'une? Ma'yuquix swentail. ¿Bi yu'un jiche? ¿Ja' bal ma xju' ya jtoy jbatic yu'un te ma ba ju' cu'untic xch'uunel te mandalile? Ma'uc. Melel ja' nax ya cac' xch'uunjel co'tantic ta swenta te Jesuse. 28Ja' yu'un, jich me ya xc'ot ta loq'uel in to: Te ants-winique, ja' libre ya xc'ot yu'un smul ta swenta te xch'uunjel yo'tane, ma ja'uc ta swenta xch'uunel soc spasel te mandalile. 29Melel te Diose ¿Ja' nax bal Dios yu'un te judioetique? ¿Ma bal ja'uc Dios yu'un uuc te jyanlumetique? Ja' na'ax Dios yu'unic uuc te jyanlumetique. 30Melel jun nax te Diose. Ja' ya x'ac'awan ta libre yu'un mulil ta swenta xch'uunjel-o'tanil, chican teme yich'ojic circuncisión o teme ma ba yich'ojique. 31¿Yu'un bal ya jlajinbeytic sc'oplal xch'uunel te mandalil ta swenta xch'uunel te Jesucristoe? Ma jichuc. Ja' c'axem to xan ay sc'oplal ya xc'ot cu'untic te mandalile.


Copyright
Learn More

will be added

X\