Romanos 2

1Jich yu'un, te ja'ate, ma'yuc bi ya xju' ya amac aba ta c'op a. Mach'a ya acuy aba a te ya alebey smul te yane. Te bit'il ya alebey smul te yane, ja'at nix ya ale castigo ta atojol. In te smul te ya alebey te yane, jich nix yacat ta spasel uuc. 2Jna'ojtic stojol te ya x'ich'awan ta c'op Dios yu'un te mach'atic yat'elinejic spasel te bila amene, jich te bit'il ya yal te smelelil c'ope. 3Jich yu'un te ja'ate ¿bi ya anop yu'un? Te bit'il ya awalbey smul te yantique soc te bit'il yacat nix ta spasel uuque, ¿yu'un bal ya acuy te ma x'ac'botat castigo yu'un uuc te Diose? 4¿Ya bal ap'aj te bayal xc'uxtayejat te Dios te bit'il jal c'aal ya xmaliywane? ¿Yu'un bal ma ba c'oem ta awo'tan te ja' swentail te bit'il ayat ta c'uxtayel yu'une te yacuc asujt'es awo'tan ta stojol te Diose? 5Ja'uc me to, c'ax tulan te awo'tane, yu'un ma ba asujt'esej te awo'tane. Jich yac ta toyel xan castigo ta atojol te quechel ya sta sc'aalelal castigoe. Tey ya xchicnaj a te Dios ya yal ta jamal te stojil te chajbanel yu'une. 6Ya me yac'bey stojol juju-jtul chican te bi yilel te yat'ele. 7Ya me yac'bey xcuxlejal sbajt'el q'uinal ta stojol te mach'a ya yat'elin spasel spisil ora te bila lec ta pasele, soc te ya sle yutsilal te ma xlaje. 8Yan te mach'atic toybaetique, ya me x'ac'bot castigo soc yilimba Dios, yu'un ma xch'uunic te smelelil c'ope, soc te ja' nax baem ta yo'tanic spasel te bila ma lecuque. 9Ya me yaiybeyic swocolil soc xc'uxul te mach'atic yat'elinejic spasel te bila ma lecuque. Ja' neel te judioetique soc uuc te jyanlumetique. 10Yan te mach'atic yat'elinejic spasel te bila leque, ya me x'ac'bot yutsilalic yu'un soc lec me sc'oplal ya xc'otic yu'un soc lamal me q'uinal ya yaiyic yu'un. Ja' neel te judioetique soc uuc te jyanlumetique. 11Melel te Diose, ma'yuc mach'a stsaoj nax ta yo'tan jtuluc. 12Spisil te mach'atic ya sle smulic, manchuc teme ma ba yaiyojic stojol te mandalile, ch'ayel ya xbajt'ic. In te mach'atic ya sle smulic te yaiyojic stojol te mandalile, ja' ya x'ich'otic ta c'op yu'un te mandalile. 13Melel ma ja'uc toj ya x'ilotic yu'un Dios te mach'atic ja' nax ya yaiyic stojol te mandalile, ja' toj ya x'ilotic yu'un Dios te mach'atic ya spasic te bila ya yal te mandalile. 14Melel ay mach'atic jyanlumetic te ma xyaiyic stojol te mandalile, ja'uc me to, ya spasic uuc te bila ya yal te mandalile. Melel ay mandalil yu'unic ta yo'tanic. 15Melel tey chican ta ilel a ta swenta te bila ya spasic te bit'il ts'ibubil ta yo'tanic te mandalile. Jich ya sna'ic stsajtayel yo'tanic, te melel ta yo'tanic nax sna'ojic stojol teme ma lecuc te bila ya spasique o teme lec te bila ya spasique. 16Jich yu'un ya me sta sc'aalelal yu'un Dios te ya x'ich'bot sc'opic ta swenta te Jesucristo yu'un spisil te bila muquen la spasic te ants-winique, jich nix te bit'il ya yal te lec yach'il c'op te yacon ta spuquele. 17Te ja'at te abiilinej te judioe, ja' yipinej awo'tan te mandalile soc te bit'il ach'uunej te cuxul Diose. 18Soc ana'oj te bila ya sc'an yo'tan te Diose. Soc p'ijubtesbilat yu'un te mandalile, jich ya ana' tsael te bila lec ta pasele. 19Soc jich ay ta awo'tan te ya xju' awu'un stojobtesel te ma'site, soc te ya awac' sacubuc q'uinal ta stojolic te mach'atic ayic ta ijc' q'uinale. 20Acuyoj aba ta jp'ijubteswanejat yu'un te mach'atic ma p'ijuque, soc maestroat yu'un te alaletique, yu'un ay ta awenta te p'ijil c'op, te smelelil c'op soc te mandalile. 21¿Bi yu'un te ya awaiy p'ijubteswanej ta stojol yan? ¿Ma bal ja'uc lec te ja' neel ya ap'ijubtes abae? Tojol ya acholbey sc'oplal te ma lecuc te eleq'ue, ja'uc me to, j'elec'at. 22Ja'at te ya awal te ma lecuc te mulweje, ja'uc me to, jmulwejat. Ja'at te awilayej te loc'ombaetique, ja'uc me to, ya awelc'anbey te bitic ay ta ch'ul na yu'unique. 23Ja'at te atoyoj aba yu'un te mandalile, ja'uc me to, ya ach'ay te mandalil yu'un te Diose. Jich ya awac' ta ixtac'optayel te Diose. 24Melel nix a te bila ts'ibubil jilel ta Sjun te Diose: “Ja'ex ta awentaic te ya yixtac'optaybey sbiil Dios te jyanlumetique”, te xie. 25Melel nix a te ay sc'oplal awu'un te circuncisione, teme ya awat'elin spasel te bila ya yal te mandalile. Yan teme jc'axintayej-mandalate, tojol te awich'oj circuncisione. 26Ja'uc me to, te mach'a ma ba yich'oj te circuncisione, teme jich ya spas te bit'il ya yal te mandalile, jich c'oemix ta stojol Dios te yich'oj circuncisione. 27Te mach'a ma ba yich'oj ta sbaq'uetal te circuncisione, teme ju' yu'un spasel ta lec te bi ya yal te mandalile, ya me yac'at ta q'uexlal, ja'at te jch'ay-mandalate, yu'un te bit'il ma ba ju'em awu'un spasele manchuc teme awich'oj te mandalil te ts'ibubil ta june soc manchuc teme awich'oj circuncisione. 28Chican ta jamal te ma ja'uc mero judio-winic te mach'a judio-winic ta ilele, soc ma ja'uc mero circuncisión te mach'a yich'oj nax ta sbaq'uetale. 29Ja' mero judio-winic te mach'a jich ay ta yo'tan soc te mach'a yich'oj ta yutil yo'tan te circuncisione. Melel ja' ya x'at'ej ta o'tanil stuquel te Espíritu yu'un te Diose, ma ja'uc ya x'at'ej te bila ts'ibubile. Te mach'a jich ay te yo'tane, lec sc'oplal ya xc'ot yu'un te Diose, ma ja'uc lec sc'oplal ya xc'ot yu'un te winiquetique.


Copyright
Learn More

will be added

X\