Romanos 16

1Ya me calbeyex awaiyic sc'oplal te quermanatic ants, te Febe sbiil, te ay yat'el ta diaconoil ta bay jch'uunjeletic te ayic ta lum Cencreae. 2Ic'bonic me ta atojolic ta swenta sbiil te Cajwaltique, jich te bit'il ay ta pasel yu'unic te quermanotactic te ay xch'uunjel yo'tanique. Soc ya me acoltaybonic teme ay to sc'an te bila ya xtuun yu'une, yu'un ay tsobol te mach'atic la scoltayixe, soc la scoltayonix uuc te jo'one. 3Albon spatjibal yo'tanic te Priscila soc te Aquila te joy jba ta at'el soc ta stojol te Cristo Jesuse. 4Ja'ic te c'an yac' sbaic ta lajel cu'un, jich colon ta swentaic. Jich yu'un te jo'on soc spisil te jyanlum jch'uunjeletic, bin nax co'tantic yu'unic. 5Soc albon spatjibal yo'tanic te jch'uunjeletic te ya stsobilay sbaic ta bay snaic te Priscila soc te Aquilae. Albon spatjibal yo'tan uuc te Epeneto te bayal c'ux ta co'tane, te ja' sbabial jnopojel yu'un Cristo ta bay sq'uinal Asia. 6Albon spatjibal yo'tan uuc te María, te bayal at'ejemix ta awolilique. 7Albon spatjibal yo'tanic uuc te Andrónico soc te Junias te jchapomale, te la quich' chuquel soque. Ja'ic te muc' sc'oplalic yu'un te jpuc-c'opetique. Ja' neel la xch'uunic Cristo cu'un. 8Albon spatjibal yo'tan uuc te Amplias te bayal c'ux ta co'tan ta stojol te Cajwaltique. 9Albon spatjibal yo'tan uuc te Urbano te joy jba soc ta at'el ta stojol te Cristo Jesuse, soc uuc te Estaquis te bayal c'ux ta co'tane. 10Albon spatjibal yo'tan uuc te Apeles te lec c'oem ta stojol te Cristoe, soc uuc te mach'atic ayic ta sna te Aristóbulo. 11Albon spatjibal yo'tan uuc te Herodión te jchapomale, soc uuc te mach'atic ayic ta sna te Narciso te xch'uunejic te Cajwaltique. 12Albon spatjibal yo'tanic uuc te Trifena soc te Trifosa te yacalic ta at'el ta stojol te Cajwaltique, soc uuc te quermanatic Pérsida te bayal c'ux ta co'tane, ja' te bayal at'ejemix ta stojol te Cajwaltique. 13Albon spatjibal yo'tan uuc te Rufo te tsabil yu'un te Cajwaltique, soc uuc te sme'e, te jme' c'oem ta co'tan uuc te jo'one. 14Albon spatjibal yo'tanic uuc te Asíncrito, te Flegonte, te Hermas, soc te Patrobase, soc te Hermese, soc ta spisil te quermanotactic te sjoinej sbaic soque. 15Albon spatjibal yo'tanic uuc te Filólogo, te Julia, te Nereo, soc uuc te xwixe, te Olimpas, soc ta spisil te mach'atic ch'ul lum yu'un Dios te sjoinej sbaic soque. 16Te ja'exe, talel c'axel patbeya aba awo'tanic ta swenta te ch'ul bujts'iyele. Ya sticunbeyex spatjibal awo'tanic uuc ta spisilic te jch'uunjeletic yu'un te Cristoe. 17Quermanotac, ya calbeyex xan wocol: Ila me abaic yu'un te mach'atic ya yaq'uic xatomba soc te ya sc'an ya xyaleswanic soc te ya scontroinic te bila ach'uunejic te ac'botex anopic ta apisilique. Ma me xajoin abaic soc. 18Melel te mach'atic jich yo'tanique, ma ja'uc yac'oj sbaic ta abatinel yu'un te Cajwaltic Jesucristoe. Ja' nax baem ta yo'tanic sleel te sbaal xch'ujt'ique. Bin nax yutsil ya xc'opojic, soc xcholchon nax yu'unic ta alel. Jich ya slo'laybey yo'tanic a te mach'atic ma sna'ic stsajtayel te aiyeje. 19Ta apisilic pujq'uemix ac'oplalic te bit'il jun awo'tan ach'uunejic te sc'op Diose, jich bin nax co'tan awu'unic. Soc ya jc'an te ay sp'ijil awo'tanic ta spasel te bila leque; ja' ma jc'an teme ja' ay sp'ijil awo'tanic ta spasel te bila amene. 20Te Dios yu'un lamal q'uinal, nopolix te ya yac'beyex apech'ic ta teq'uel te Satanase. Te yutsil yo'tan cu'untic te Cajwaltic Jesucristoe, ac'a me sjoinex ta apisilic. 21Ya spatbeyex awo'tanic te Timoteo te joy jba ta at'el soque, soc uuc te Lucio, te Jasón, te Sosípater, te ja'ic te jchapomale. 22Jo'on Tercioon te yacon ta sts'ibuyel ta jc'ab in jun to. Ya calbeyex spatjibal awo'tanic uuc ta stojol te Cajwaltique. 23Ya me spatbeyex awo'tanic uuc te Gayo te jmajanejbey sna ta bay ya stsobilay sbaic ta spisilic te jch'uunjeletique. Soc ya spatbeyex awo'tanic te Erasto te tesorero yu'un te lume, soc uuc te quermanotic Cuarto. 24Te yutsil yo'tan cu'untic te Cajwaltic Jesucristoe, ac'a me sjoinex ta apisilic. Jichuc. 25Ac'a calbeytic bayal wocol Dios te ya xju' ya stulantesbeyex awo'tanic ta swenta te lec yach'il c'op te yacon ta xcholel ta bayuque, ja' bi, ja' te p'ijubtesel yu'un te Jesucristoe. Ja' in to, la yaq'uix ta na'el stojol te Diose te bila muquen ay ta neelal te la xchap ta yo'tan te c'alal ma to ayuc a te ch'ulchan balumilale. 26Ja'uc me to, yac'ojix ta na'el stojol ta swenta te bila ts'ibubil jilel yu'un te j'alwanejetique. Yu'un jich smandal te Dios te stalel cuxul sbajt'el q'uinale. La yaq'uix ta na'el ta stojol spisil ants-winiquetic, swenta yu'un ya me yac' xch'uunjel yo'tanic ta stojol te Jesucristoe. 27Te Dios te jip nax ay sp'ijile, ac'a ich'otuc ta muc' sbajt'el q'uinal ta swenta te Jesucristoe. Jichuc.


Copyright
Learn More

will be added

X\