Romanos 15

1Te jo'otic te ayix quiptic ta swenta xch'uunjel co'tantique, ya sc'an ya jna'beytic yo'bolil sbaic uuc te mach'atic ma to ayuc yipique. Ma me ja'uc nax ya jle jtuqueltic te bila ya jmulantique. 2Juju-jtulotic ac'a me jletic te bila lec yo'tanic yu'un te jpat-xujc'tique. Ja' te bila ya xlecubic yu'une soc te bila ya x'ipaj xan yo'tanic yu'une. 3Melel te Cristoe, ma ja'uc la sle te bila lec nax yo'tan yu'une. Jich te bit'il ts'ibubil jilel ta Sjun te Diose: “Te sbol-c'opic te mach'atic la sbolc'optayate, jo'on c'ot ta jwenta”, te xie. 4Spisil te bila la yal te Sjun Diose, ja' la yich' ts'ibuyel yu'un te ya sp'ijubtesotique. Swenta yu'un ya xchicnaj ta ilel te ayix smuc'ul q'uinal ya caiytic ta swenta, jich jun co'tantic ya jmaliytic. 5Te Diose, ja' te ya yac' ts'ijc'uc cu'untique soc te ya smuc'tesbotic q'uinal caiytique, ac'a at'ejuc ta awo'tanic, swenta yu'un jun nax me awo'tan ya x'ainex ta swenta Cristo Jesús. 6Jich me jun nax ac'opic ta yalel te bit'il jelawen yutsil te Diose te Stat te Cajwaltic Jesucristoe. 7Jich yu'un, junuc me awo'tan abaic, jich te bit'il jun nax yo'tan ta atojolic te Cristoe, swenta yu'un jich me jelawen yutsil sc'oplal ya xc'ot awu'unic te Diose. 8Ja' ya calbeyex sc'oplal te Cristo te tal yac' sba ta abatinel yu'un te judioetique swenta yu'un tal sc'otes ta pasel te bila yaloj ta stojol te tatiletic cu'untique. Jich la yac' ta ilel te smelelil te bila yaloje. 9Soc ja' tal yu'un uuc te mach'atic jyanlumetique, swenta yu'un jich ya yalbeyic yutsilal Dios yu'un te xc'uxul yo'tane: “Ja' swentail ya me calbat yutsilal ac'oplal ta bay te nacionetique”, te xi' ta c'ayoje. 10Soc jich ts'ibubil xan jilel: “Ja'ex te jyanlumexe, bujts'najuc me awo'tanic soc te lum yu'un te Diose”, te xie. 11Soc jich ts'ibubil xan jilel: “Spisil nacionetic soc spisil lumetic, albeyaic yutsilal te Cajwaltique, soc c'ajintayaic ta c'ayojetic”, te xie. 12Soc jich la yal ta sjun uuc te Isaiase: “Ya xpulin loq'uel yisim te Isaí, ja' ajwalil ya xc'ot yu'un te jyanlumetique. Ja' me ya smuc'ulin yo'tanic te jyanlumetique”, te xie. 13Te Diose, ja' yac'oj smuc'ul co'tantic ta smaliyel, ac'a snojesbeyex bayal sbujts' awo'tanic soc lamaluc me q'uinal awaiyic ta stojol ta swenta te bit'il ach'uunejique. Jich me jelawen to xan ay smuc'ul awo'tanic ta smaliyel ta swenta yu'el te Ch'ul Espiritue. 14Quermanotac, te jo'one jna'oj stojol te ay bayal yutsil awo'tanique, soc te ay bayal sp'ijil awo'tanique, soc te ya xju' awu'unic te talel c'axel ya ajechtac'uy abaique. 15Ja'uc me to, te bit'il quich'oj cat'el ta swenta yutsil yo'tan te Diose, la jts'ibubeyex cha'oxcum aiyej ta bay in jun to, yu'un ya jc'an te ya xc'ot ta awo'tanique. 16Yabaton te Jesucristo ta stojol te jyanlumetique, jich yacon ta spuquel te lec yach'il c'op yu'un te Diose. Jich me smajt'an Dios ya xc'otic te lec yo'tan Dios yu'une soc te ch'ultesbil yu'un te Ch'ul Espiritue. 17Ya xju' te toyol q'uinal ya caiy ta swenta te Cristo Jesús te bit'il ayon ta abatinel yu'un te Diose. 18Ja' nax ya calbey sc'oplal te bila spasoj ta jwenta te Cristoe, swenta yu'un ya cac'bey xch'uunbeyic sc'op Dios te jyanlumetique. Ja' ta swenta te smelelil c'op la cale, soc ta swenta te bila la jpase, 19soc ta swenta yip te señailetic soc te jchajp at'eliletique, soc ta swenta yu'el te Ch'ul Espiritue. Jich ta bayuc nax ta spamal te q'uinale, ja' to c'alal ta Jerusalén soc c'alal to ta sq'uinal Ilírico, nojix cu'un ta alel te lec yach'il c'op yu'un te Cristoe. 20Jich cat'elinej yalel sc'oplal te colel te banti ma to xyaiybeyic sc'oplal te Cristoe, swenta yu'un ma teyuc la jach cat'el a te banti ayix yat'el te yane. 21Jich te bit'il ts'ibubil jilel ta Sjun te Diose: “Ja' me ya yilic te mach'atic ma ba albot yaiyic sc'oplale. Ja' ya xc'ot ta yo'tanic te mach'atic xujt' ma'yuc bay yaiyojbeyic stojol sc'oplale”, te xie. 22Ja' swentail te ma ju' cu'un tal quilex manchuc teme ay bayal buelta te c'an talucone. 23Yan ta ora to, ju'ix cu'un te cat'el li'to ta bay spamal te q'uinale. Soc bayalix ja'wil te toyol co'tan c'an talucon ta banti ayexe. 24Te c'alal ya xboon ta España ay ta co'tan te ya xc'ax quilex te ja'exe. Teme la joinex che'oxebuc c'aale, co'tanuc ya awac'bonic jbeib te c'alal ya xboon tey a. 25Ta ora to ya xboon ta Jerusalén, yu'un ya quich'bey bael scoltayel te quermanotactique. 26Yu'un te mach'atic ayic ta sq'uinal Macedonia soc ta sq'uinal Acaya, bin nax yo'tanic la stsobic taq'uin yu'un scoltayel te me'baetic te sjoinej sbaic soc te ch'ul lum yu'un Dios ta Jerusalén. 27La snopic soc spasemal yo'tanic, jich lec c'ot te bila la spasique. Ja' ya sna'ic te ay sbetic ta stojol te judio jch'uunjeletique, melel ja' ta swenta te judio jch'uunjeletic te c'ot bendición ta stojolic te jyanlumetique. Ja' swentail ta ora to ja' ayix ta swentaic scoltayel uuc te bila ya xtuun yu'unic te judio jch'uunjeletique. 28Jich yu'un, teme laj co'tan ta yijq'uitayel jilel te majt'anile, tey me ya xjajch'onix ta beel ta España abi, soc ya me xc'ax quilex te ja'exe. 29Ya jna' stojol te c'alal ya xc'oon ta banti ayexe, ya me yac'beyex bayal bendición te Cristoe ta swenta te lec yach'il c'op yu'une. 30Quermanotac, ya calbeyex wocol ta swenta te Cajwaltic Jesucristo soc ta swenta te xc'uxul yo'tan yac'ojbotic te Espiritue: Coltayawonic ta sc'oponel te Diose, 31swenta yu'un yacuc xcolon ta sc'ab te jc'axin-c'opetic te ayic ta sq'uinal Judea, soc swenta yu'un lecuc yo'tanic te mach'atic ch'ul lum yu'un Dios ta Jerusalén yu'un te scoltayelic te ya quich' baele. 32Teme jich sc'anjel yo'tan te Diose, bayal me sbujts' co'tan ya xc'oon ta atojolic ta banti ayex, soc tey me ya xco jcux co'tan ta awolilic a. 33Te Dios yu'un lamal q'uinal, ja' me ya sjoinex spisil ora stuquel. Jichuc.


Copyright
Learn More

will be added

X\