Romanos 14

1Ic'a me ta atojol te mach'a peq'uel xch'uunjel yo'tane. Ma me ayuc bi tulan xawalbey ta stojol. 2Jich bit'il ay mach'atic xch'uunejic te spisil ay ta tuuntesel te we'eliletique. Ay yantic te mach'a ma'yuc yip yo'tane, ja' nax ya swe'elin te boc itaje. 3Te mach'a spisil ya swe'eline, ma me slaban te mach'a ma spisiluc ya swe'eline. In te mach'a ma spisiluc ya swe'eline ma me slebey smul te mach'a spisil ya swe'eline, te melel pajal ic'bilic yu'un te Diose. 4¿Mach'a ya acuy abaic a te ya alebey smul yabat te yane? Te yajwale ay ta swenta stuquel teme ya yalbey lec sc'oplale, o teme amen sc'oplal ya yalbeye. Ja'uc me to, puersa me lec ya xc'ot, melel te Cajwaltique ya xju' yu'un te lec ya xc'ot yu'une. 5Ay mach'atic yanyantic sc'oplal yu'unic te jujun c'aale, soc ay yantic ya yalic te pajal sc'oplal te jujun c'aale. Jich yu'un juju-jtul ac'a snop ta lec te bit'il c'oem ta yo'tane. 6Te mach'a ay jun c'aal stsaoje, ja' ya yich' ta muc' a te Cajwaltique. Ja' nix jich te mach'a ma stsa te c'aale, jich ya spas yu'un te ya yich' ta muc' a te Cajwaltique. Ja' nanix jich te mach'a spisil ya stuuntes te we'elile. Ja' ta swenta Cajwaltic te ya swe'eline, melel tey ya yalbey wocol a te Diose. Te mach'a ma spisiluc ya stuuntese, ja' nix jich ta swenta Cajwaltic te ma spisiluc ya swe'eline, soc ja' nix jich ya yalbey wocol Dios yu'un uuc. 7Melel ma'yuc mach'a cuxul ta stuquel nax, soc ma'yuc mach'a ta stuquel-o'tan te ya xlaje. 8Teme cuxulotique, ja' ta swenta Cajwaltic te cuxulotique. Soc teme ya xlajotique, ja' ta swenta Cajwaltic te ya xlajotique. Jich yu'un teme cuxulotique o teme ya xlajotique, yu'unotic te Cajwaltique. 9Melel te Cristoe laj, soc cha'cux tel, swenta yu'un ja' Ajwalil ya xc'ot yu'un te mach'atic lajemique soc te mach'atic cuxulique. 10Jich yu'un te ja'ate, ¿Bi yu'un te ya alebey smul te awermanoe? Soc te ja'ate, ¿Bi yu'un te ya ap'aj te awermanoe? Melel ta jpisiltic ya me xc'o jtejc'an jbajtic ta muc'ul chajbajibal yu'un te Cristoe. 11Yu'un jich ts'ibubil jilel ta Sjun Dios: “Te bit'il cuxulon te jo'one, ya me squejan sbaic ta jtojol spisil te ants-winiquetique, soc spisilic ya me yalic ta jamal te jo'on Dioson, xi' te Cajwaltique”, te xie. 12Jich yu'un, juju-jtulotic ya me xc'o cac'tic ta stojol Dios te bila la jpastic ta q'uinale. 13Jich yu'un, ma me jech jlebey jba jmultic. Ja' lec ac'a jletic te bila ma xpejc'aj yo'tan yu'un te quermanotique soc te ma xyalesot ta mulil yu'une. 14Te jo'one, jna'oj stojol ta swenta Cajwaltic Jesús, te ma'yuc we'elil te ya xju' ya xbolob jc'oplaltic ta stojol Dios yu'une. Yan teme ay mach'a jich c'oem ta yo'tan te ya xbolob sc'oplal yu'un te we'elile, yu'un nanix amen teme ya stuuntese. 15Soc teme ta swenta jwe'eltic te ya smel yo'tan jtuluc te quermanotique, yu'un nanix ma c'uxuc ta awo'tan abi. Ma me xcac'tic ch'ayuc jtuluc te mach'a lajem Cristo yu'un ta scaj nax te jwe'eltique. 16Ma me xawac' bolobuc sc'oplal te bila leque. 17Melel te bit'il ay ta ajwalinel te Diose, ma ja'uc ta swenta jwe'el-cuch'eltic. Ja' nax ta swenta te bila toje, te lamal q'uinale soc te ay sbujts' co'tantic ta swenta te Ch'ul Espiritue. 18Te mach'a jich ya yac' sba ta abatinel yu'un te Cristoe, ja' lec yo'tan yu'un te Diose, soc lec sc'oplal yu'un uuc te ants-winiquetique. 19Jich yu'un, ac'a me cantaytic te bila lamal q'uinal ya caiytic yu'une, jich me ya xmuc'ub ta ch'uunel cu'untic a te Diose. 20Ma me xajinbey yat'el Dios ta swenta te we'elile. Melel spisil ta jchajp te we'elile, lec sc'oplal. Ja'uc me to, ja' ma lecuc teme ya ayales ta mulil yantic ta swenta te bit'il ya xwe'e. 21Ja' lec ma x'ati' ti'bal soc ma xawuch' vino soc ma xapas te bila ya xchebaj yo'tan awermano yu'une, te ya xyalesot yu'une, soc te ya xpejc'aj yip yo'tan yu'une. 22Te bit'il ay xch'uunjel awo'tan te ja'ate, jich me ya sc'an ya apasulay ta stojol te Diose. Bin nax me yutsil te mach'a ya sna' te ma ja'uc ya sta smul a te bila ya spase. 23Yan teme ay mach'a ya x'ayan yo'tan yu'un te bila ya swe'eline, jich me ya sta smul ta stojol Dios a, melel ma ta swentauc xch'uunej yo'tan ya spas. Spisil te bitic ma ja'uc ta swenta xch'uunjel-o'tanil te ya yich' pasele, ja' mulil abi.


Copyright
Learn More

will be added

X\