Romanos 13

1Spisil ants-winiquetic junuc me yo'tan ac'a xch'uunbeyic smandal te ajwaliletic te yich'oj yat'elique. Melel ja' ta swenta Dios te ay ajwaliletique, soc ja' nix Dios te ac'otic ta ajwalil yu'un te mach'atic yich'oj yat'elique. 2In te mach'atic ya scontroinic te ajwaliletique, ja' ya scontroinic te bila xchapoj te Diose. Te mach'atic ya scontroinic te ajwaliletique, ya me sta swocolic yu'un. 3Melel te mach'atic yich'oj tulan yat'elique, ma ja'uc yich'oj yat'elic ta xiwtesel te mach'atic lec yat'elique. Ja' ya xiwtesic te mach'atic amenique. Teme ya ac'anic te ma ba ya xiwex ta stojol te ajwaliletique, pasaic me te bila leque. Jich me lec ac'oplalic yu'un. 4Melel ja' abatetic yu'un Dios ta swenta alequilalic. Yan teme amen te bila ya jpastique, xiwanic me ta stojol. Melel ma tojoluc te ay ta sc'ab te yat'ejibe, yu'un ay ta abatinel yu'un Dios te ya yac'bey spacol ta castigo te mach'a ya x'uts'inwane. 5Jich yu'un, ja' ya sc'an te jun co'tantic ya jch'uunbeytic smandal te ajwaliletique. Ma me ja'uc nax ya quich'tic ta muc' yu'un te bit'il swentainej yaq'uel te castigoe. Na'a me ta awo'tanic te jich nix ya sc'an pasele. 6Ja' swentail te ya jtojtic jpatantic yu'une, melel ayic ta abatinel yu'un Dios ta spasel te yat'elique. 7Tojbeya spisil te mach'a ay abet yu'une: Teme ja' te patan taq'uine, ac'a me. Teme ja' te spatanul biluque, ac'a me. Te mach'a ay ta ich'el ta muq'ue, ich'a me ta muc'; te mach'a ay ta xi'ele, xi'a me. 8Ma me ayuc mach'a ay abet ta stojol. Ja' nax me quechel ta awentaic te talel c'axel c'ux ya awaiy abaique. Melel te mach'a c'ux ya yaiy ta yo'tan te spat-xujq'ue, jich ju'ix yu'un xch'uunel te bila ya yal te mandalile. 9Yu'un te mandalile jich ya yal: “Ma me x'awaiy mulwej, ma me x'awaiy milaw, ma me x'awaiy elec', ma me xawal lotil testigo c'op, soc ma me xbic'taj awo'tan”, te xie. Ja' in mandalil to soc spisil te yantic mandalile, jun nax sc'oplal c'oem ta spisil, jich te bit'il ya yal te: “C'ux me x'awaiy ta awo'tan te apat-axujq'ue, jich bit'il c'ux ya awaiy aba atuquel te ja'ate”, te xie. 10Te mach'a ay xc'uxul yo'tane ma spas bila amen ta stojol te spat-xujq'ue. Jich yu'un te sju'tesel ta pasel te mandalile, ja' te c'uxul-o'tanile. 11Spisil in to ja' me ya apasic, yu'un ana'ojic te bin ja'wil ayotic ta ora to. Ac'a wijc'uquix jsitic yu'un te jwayeltique, melel te jcoleltique nopol ayix tel. Ma jichuquix te bit'il najt' to xan sc'an a te c'alal la jch'uuntic te sc'op Diose. 12Te ajc'ubale nopol xc'axix bael. Ja' nopol ya sacubix tel te q'uinale. Jich yu'un, ya sc'an ya quijq'uitaytic jilel ta pasel te bila swenta te ijc' q'uinale. Ya sc'an te ya c'u'intiquix te cat'ejibtic ta swenta te saquil q'uinale. 13Toj me ac'a beenucotic te bit'il ayotic ta c'aaleltique. Ma me ja'uc nax ya xbajt' ta awo'tanic we'el, yacubel, chijil-o'tanil, antsiwej, jach-c'op soc jex-o'tantaywanej. 14Ac'a me jc'u'inbeytic yu'el te Cajwaltic Jesucristoe. Ma me xawac' abaic xan ta spasel te bila ya sc'an te abaq'uetalique.


Copyright
Learn More

will be added

X\