Romanos 11

1Jich ya cal in to: “¿Yu'un bal jc'axel la xch'ojix jilel te lum yu'un te Diose?”, xoon yu'un. ¡Ma jichuc! Melel te jo'one, israelon uuc, sts'umbalon te Abrahame. Ayon ta swenta sts'umbal Benjamín. 2Ma ba yijq'uitayej ta yo'tan te lum yu'un te Diose, melel namey tsabil yu'un. ¿Yu'un bal ma xana'ic te bila la yal te Elías te ts'ibubil jilel sc'oplal ta Sjun Dios te c'alal la yalbey ta jamal smulic te israeletic ta stojol te Diose? Te jich la yale: 3“Cajwal, la smiliquix te j'alwanejetic awu'une soc la sjintilayiquix te scajtijib amajt'an yu'unique. Jtuquel xanix jilemon ta ora to, soc yo'tan smilonic uuc”, te xie. 4¿Bila la yal ta sujt'esel te Diose? “Ay to jucmil (7,000) ta jtul winiquetic te jilemic cu'un te ma ba slajinej sbaic ta stojol te Baale”, te xie. 5Ja' nanix jich ta ora to, ay to scomenal jilemic te israeletic te tsabilic ta swenta nax yutsil yo'tan te Diose. 6Teme ta swenta yutsil yo'tan te Diose, jich ma ja'uquix ta swenta te yutsil yat'elique. Te ja'uc ta swenta yat'elic, jich ma ja'uquix ta swenta te yutsil yo'tan te Diose. 7¿Bit'il ayix a jiche? Te bila yacalic ta sleel te israeletique, ma ba staojic. Yan te mach'atic tsabilique, staojix stuquelic. Yan te yantique la yac' tulanubuc yo'tanic stuquelic, 8jich bit'il ts'ibubil jilel ta Sjun te Diose: “Dios la yac' wayuc yo'tanic, soc te ma xyilic q'uinal ta sitic, soc te ma xyaiyic stojol c'op ta xchiquinic. Jich ayic c'alal ta ora to”, te xie. 9Soc jich la yal uuc te Davide: “Ac'a c'atp'ujuc ta spejts'ulic soc syacjibalic te sq'uinique, ac'a sta swocolic a, soc ac'a staic castigo tey a. 10Ac'a majc'uc te sitique, swenta yu'un ma xyilic te q'uinale. Spisil ora ac'a c'ujajuc te spatique”, te xie. 11Jich ya cal in to: ¿Yu'un bal jc'axel yalic yu'un te bit'il la sc'ojch'in yacanic te judioetique? ¡Ma jichuc! Melel ta swenta bit'il la xc'axintayic mandal te tal colel ta stojol te jyanlumetique, swenta xjajch'ib sbic'tal yo'tanic c'ot te judioetique. 12Melel ta swenta bit'il la xc'axintayic mandal te judioetic, jich ay bendición c'ot ta stojol spisil te ants-winiquetic ta balumilal. Soc ta swenta bit'il la staic falta ta stojol te Diose, jich ay bendición c'ot ta stojol te mach'atic jyanlumetique. Ja'uc me to, c'axem to xan ay me yutsil te c'alal ya xcha'ic'otic xan te judioetique. 13Jich yu'un, ay bila ya calbeyex ja'ex te jyanlumexe. Melel jo'on jpuc-c'opon yu'un te jyanlumetique, jich bayal sc'oplal ta co'tan te cat'el quich'oje. 14Jich yu'un yacon ta sleel te bit'il ya jachbey sbic'tal yo'tanic te jlumale, swenta yu'un ay me cha'oxtul ya sta scolelic a. 15Melel te bit'il ijq'uitayot te judioetic yu'un te Diose, jich junaj yo'tanic ta stojol Dios spisil te yantic ta balumilale. Ja'uc me to, c'alal ya xcha'ic'otic xane, ¿Ma bal jichuc ya xc'ot te bit'il cha'cux tel te mach'atic lajemique? 16Teme ch'ultesbil te sbabial waje, yu'un nanix ch'ultesbil ta swolol a te mats'e. Soc teme ch'ultesbil te yisim te'e, yu'un nanix ch'ultesbil a te sc'abe. 17Te judioetic ay jich c'oemic bit'il sc'ab te olivo-te' te la yich' bojel loq'uel sc'abe. Te banti la yich' loq'uesele, la yich' ts'aquel ta sc'ab ja'mal olivo-te'. Ja'ex te la awich'ic ts'aquele. Jich jun c'oexix soc te yisim olivo-te'e. Jich la awich'beyic xcuxlejal te ts'unbil olivo-te'e. 18Jich yu'un, ma me xatoy abaic ta stojol te mach'a mero sc'abe. Teme jich ya apasique, na'aic me te ma ja'uc cuxul ta awentaic te yisim olivo-te'e, ja' cuxulex ta swenta stuquel. 19Soc ay niwan jich ya awalic: “La yich'ic loq'uesel te sc'ab swenta yu'un la quich'tic ts'aquel tey a te jo'otique”, xaex niwan. 20Melel nix a te la yich'ic loq'uesele, ta scaj te ma la yac' xch'uunjel yo'tanique. Yan te ja'exe, la awich'iquix ts'aquel tey a ta swenta nax xch'uunjel awo'tanic. Ma me xatoy abaic. Xiwanic me yu'un. 21Melel teme ma ba pasbot perdón yu'un Dios te mach'atic mero sc'ab te te'e, ¿ja'uc to bal ya spasbeyex perdón a te ja'exe? 22Awaiy bit'il ay yutsil yo'tan soc te bit'il ya yac' castigo te Diose. Jich la yac'beyix tulan castigo te mach'atic yalique. Ja'uc me to, te ja'exe ay bayal yutsil yo'tan awu'unic teme jc'axel ya x'ainex ta stojole. Yan teme ma ba la awich'ic ta muq'ue, ya me awich'ic bojel loq'uel uuc te ja'exe. 23Yan te judioetique, teme ma jc'axeluc ya xchebaj yo'tanique, ya me yich'ic xan ts'aquel uuc, te melel ya xju' yu'un stuquel te Dios te ya sts'ac xane. 24Melel ja'ex sc'abex te ja'mal olivo-te' te ma staleluc ay ta ts'aquel soc te ts'unbil te'e. Ja'uc me to, la awich'ic ts'aquel yu'un Dios tey a ta bay te lequil ts'unbil olivo-te'. ¿Ja'uc to bal a te mach'atic mero israeletique, ja'ic te mero sc'ab te ts'unbil lequil olivo-te'e? Ma ba wocol te ya yich' ts'aquel xan yan buelta ta bay nix te mero olivo-te'e. 25Quermanotac, ya jc'an te ya ana'ic stojol in c'op to, te ma ac'ot ta na'el ta neelal toe. Ya me calbeyex awaiyic, swenta yu'un ma ba ya atoy abaic yu'un te ac'oplalique. Melel te sts'umbal Israele tulanuben yo'tanic ja' to teme ochic spisilic te mach'atic jyanlumetique. 26Teme c'otix ta pasele, ya me xcol ta spisil te sts'umbal Israele, jich bit'il ts'ibubil jilel ta Sjun te Diose: “Ta wits Sión ya xtal te mach'a ya x'ac'awan ta libre. Ya me xch'aybey spisil smulic te sts'umbal Jacobe. 27Ja' in to, ja' te trato ya jpas soque te c'alal ya jpasbey perdón yu'un te smulique, xi' te Diose”, te xie. 28Te bit'il la sp'ajic te lec yach'il c'ope, jich yajcontro Dios c'otic te judioetique, swenta yu'un jich la awich'ic c'uxtayel te ja'exe. Ja'uc me to, te Diose ay to sc'uxul yo'tan ta stojolic, ta scaj te ja' la stsa stuquel te antiguo jme'-jtatique. 29Melel teme Dios la yal te ya xc'uxtaywane, soc te ay mach'a ya x'ic'ot yu'une, ma ba ya sujt'es sc'op stuquel te Diose. 30Ta neelal to te ja'exe, jc'axintayej-mandalex ta stojol Dios. Yan ta ora to, la xc'uxtayexix Dios ta scaj te la xc'axintaybeyic smandal Dios te jlumale. 31Jich nix ayic ta ora to, te judioetic la xc'axintaybeyic smandal te Diose, swenta yu'un ya me awich'ic c'uxtayel yu'un Dios uuc te ja'exe; soc jich me ya to yich'ic c'uxtayel uuc te judioetique. 32Melel Dios la yac' te pajal ma'yuc mach'a ya xch'uun te mandale, swenta yu'un jich me ya xc'uxtay ta pajal spisil a te ants-winiquetique. 33¡Jelawen yutsil te sp'ijil yo'tan te Diose soc te bila snopoj ta yo'tane! Ma xju' ta na'el stojol cu'untic te bila xchapoj ta yo'tan soc te bila ya spase. 34Te melel jich ts'ibubil jilel: “¿Mach'a c'an ju'uc yu'un sna'el te bila snopoj te Cajwaltique? ¿Soc mach'a c'an ac'botuc consejo yu'un? 35¿Mach'a c'an majt'antesotuc yu'un neeluc te Cajwaltique te ya xju' ya sujt'esbot sjelol yu'un ta patile?”, te xie. 36Te melel spisil te bitic aye, ja' yu'un. Ja' nix spasoj spisil, soc ja' swentainej stuquel. Ja' ac'a chicnajuc yutsilal ta bayuc sbajt'el q'uinal. Jichuc.


Copyright
Learn More

will be added

X\